MOSŨNGĨO MA MAKŨLYO MA MBIVILIA

Mo alaĩka no matũtethye?

Yeova Ngai ambie kũmba alaĩka aingĩ atanamba kũmba andũ. (Yovu 38:4, 7) Alaĩka nĩ syũmbe syĩ vinya ila syĩthĩawa na mĩĩ ya veva na nimũthũkũmaa Ngai. Mavinda amwe Ngai nũmatũmaa masũvĩe na maitongoesya athũkũmi make kũũ nthĩ. (Savuli 91:10, 11) Ũmũnthĩ alaĩka nĩmatethasya andũ maunĩke nĩ ũvoo mũseo ũla ũtavanaw’a nĩ aatĩĩi ma Yesũ.—Soma Ũvuan’yo 14:6, 7.

Nĩtwaĩle kũmavoya alaĩka matũtethye? Aiee. Nĩkĩ? Nũndũ mboya nĩ kĩlungu kya ũthaithi na Ngai no we waĩle kũthaithwa e weka. (Ũvuan’yo 19:10) Nũndũ alaĩka nĩ athũkũmi ma Ngai, we nĩwe ũmeĩaĩaa, ĩndĩ ti andũ. Kwoou, twaĩle kũmũvoyaa Ngai e weka kwĩsĩla kũla kwĩ Yesũ.—Soma Savuli 103:20, 21; Mathayo 26:53.

Kwĩ alaĩka athũku?

Alaĩka, o ũndũ ũmwe na andũ, mombĩtwe me na ũthasyo wa kwĩnyuvĩa ũndũ mekwenda. Kwoou no manyuve kwĩka ũseo kana ũthũku. Ĩndĩ ũndũ wa kũmakya nĩ kana alaĩka aingĩ nĩmamũleile Ngai. (2 Vetelo 2:4) Satani nĩwe waĩ mũlaĩka wa mbee kũmũlea Ngai na ĩndĩ angĩ mamũatĩĩa na matw’ĩka ndaimoni. Satani na ndaimoni syake nĩmesie kũlũngw’a ĩtunĩ na mekw’a kũũ nthĩ.—Soma Ũvuan’yo 12:7-9.

Ũthũku na ũng’endu nĩsyongelekete mũno kuma mwaka wa 1914, na ũu wĩonany’a kana o mĩtũkĩ, Ngai akilyĩ anaananga Satani na ndaimoni syake. Na ĩndĩ Ngai aitũnga nthĩ yĩthĩwe yĩ nzeo o ũndũ wendaa kuma mwambĩĩonĩ.—Soma Ũvuan’yo 12:12; 21:3, 4.