KYONGO KYA ĨTHANGŨ YA MBEE | ALAĨKA ME KWʼO? NA MATŨTETHASYA ATA?

Ũndũ Alaĩka Matonya Ũkũtethya

Alaĩka ala aĩkĩĩku nĩmendeeawʼa mũno nĩ maũndũ makonanĩtye na andũ na nĩmethĩawa na kĩthito kingĩ kya kwĩka kwenda kwa Yeova. Ĩla Ngai woombie nthĩ, alaĩka onthe ‘nĩmainie vamwe, na ana onthe ma Ngai mookĩlya mawasya ũndũ wa kũtana.’ (Yovu 38:4, 7) Kuma ĩvinda ya tene vyũ, alaĩka nĩmendaa “ũkunĩkĩla” wathani ũla ũeleetye maũndũ ala makekĩka ĩvinda yũkĩte ĩũlũ wa nthĩ.—1 Vetelo 1:11, 12.

Mbivilia nĩyonanĩtye kana ve mavinda alaĩka masũvĩie athaithi ma wʼo ma Ngai nĩ kana meanĩsye kwenda kwake. (Savuli 34:7) Kwa ngelekanyʼo:

Ĩla Yeova waanangie ndũa nthũku sya Sotomo na Ngomola, alaĩka nĩmatetheeisye mũndũũme waĩ mũlũngalu weetawa Loto vamwe na mũsyĩ wake maume ndũanĩ isu.—Mwambĩlĩlyo 19:1, 15-26.
Ĩla Aevelania atatũ ma mũika ala maĩ Mbaviloni masilĩlwe kwĩkwʼa ikonĩ ya mwaki mũnene makwʼĩĩe vo, Ngai nĩwatũmie “mũlaĩka wake, na atangĩĩa athũkũmi make.”—Ndanieli 3:19-28.
Ĩla mũndũũme waĩ mũlũngalu Ndanieli wekiwʼe ngunganĩ ya mĩnyambũ na ekala vo ũtukũ mũima, aisye kana ‘Ngai nũtũmie mũlaĩka wake, na atumya makanywʼa ma mĩnyambũ.’—Ndanieli 6:16, 22.

Mũlaĩka aimũsũvĩa Ndanieli ndakalĩke nĩ mĩnyambũ — Alaĩka nĩmethĩĩtwe maitetheesya andũ aĩkĩĩku kwa ĩvinda yĩasa

ALAĨKA NĨMATETHEEASYA AKLĨSTO MA ĨVINDA YA ATŨMWA

Mavindanĩ amwe, alaĩka ma Ngai nĩmatetheeasya kĩkundi kya Kĩklĩsto kya ĩvinda ya atũmwa ĩla ve vata nĩ kana kĩeleelo kya Yeova kĩanĩe. Kwa ngelekanyʼo:

Ve mũlaĩka wavingũie mĩomo ya kolokolo na atongoesya atũmwa ala maĩ ove mathi makaendeesye wĩa wa kũtavanyʼa ĩkalũnĩ.—Meko ma Atũmwa 5:17-21.
Ve mũlaĩka weeyĩaĩie mũtavanyʼa weetawa Vilivu esĩle nzĩanĩ ya weũ ĩla yaumĩte Yelusaleme kũvika Ngasa akatavye ũvoo mũseo Mũethiovia waendete Yelusaleme kũthaitha.—Meko ma Atũmwa 8:26-33.
Ĩla ĩvinda ya Ngai yavikie nĩ kana andũ ala mataĩ Ayuti matwʼĩke Aklĩsto, mũlaĩka nĩwaumĩlĩĩile mũnene wa ita sya Alomi weetawa Kolinelio woninĩ na amwĩa atũmane mũtũmwa Vetelo oke kwake.—Meko ma Atũmwa 10:3-5.
Ĩla mũtũmwa Vetelo waĩ mwove, mũlaĩka nĩwamumĩlĩĩile na amumya kolokolonĩ.—Meko ma Atũmwa 12:1-11.

ŨNDŨ ALAĨKA MATONYA ŨKŨTETHYA

Ĩvindanĩ ya ũmũnthĩ, vai kĩndũ kĩtũĩkĩĩthasya kana Ngai nũtũmĩaa alaĩka matetheesye andũ kwa nzĩa ya kyama tondũ Mbivilia yonanĩtye meekaa tene. Ĩndĩ o na ũu wĩ o vo, Yesũ aisye ũũ ĩũlũ wa ĩvinda yitũ: “Ũvoo ũũ mũseo wa ũsumbĩ ũkatavanwʼa nthĩ yonthe wĩthĩwe ũkũsĩ kwa mbaĩ syonthe; na ĩndĩ mũminũkĩlyo ũkyũka.” (Mathayo 24:14) We nĩwĩsĩ kana amanyĩwʼa ma Klĩsto nĩmaendeee na kũtethya wĩa ũsu matongoewʼe nĩ alaĩka?

Andũ mesĩle vakuvĩ na kakalĩ ka kwilĩĩla mavuku — Alaĩka nĩmatetheeasya kũtavanyʼa ũvoo mũseo ĩũlũ wa nthĩ yonthe

Ĩvuku ya Ũvuanyʼo yonanĩtye kana alaĩka nĩmekĩaa kĩthito kũtetheesya andũ ĩũlũ wa nthĩ yonthe memanyĩsye ĩũlũ wa Yeova Ngai na kĩeleelo kyake kwondũ wa andũ. Mũtũmwa Yoana aandĩkie atĩĩ: “Na noona mũlaĩka ũngĩ akĩũlũka ĩtunĩ katĩ, e na ũvoo mũseo wa tene na tene wa ũtavanʼya kwa ala matwĩe nthĩ, na kwa kĩla mũthemba na mbaĩ na kĩthyomo na ũko wa andũ; na aneena na wasya mũnene, Kĩai Ngai, na mũtaĩei; nũndũ saa wa kũsilĩla kwake nĩ mũku: na mũthaithei ũla wombie ĩtu na nthĩ na ũkanga na nthongo sya manzĩ.” (Ũvuanʼyo 14:6, 7) Maũndũ maingĩ ala mekĩkĩte ĩvindanĩ yĩĩ nĩmaĩkĩĩthasya kana alaĩka nĩmatetheeasya wĩanĩ wa kũtavanyʼa ũvoo mũseo wa Ũsumbĩ ĩũlũ wa nthĩ yonthe. O na ĩla mwĩki ũmwe wa naĩ weelila na amũsyokea Yeova, nĩvethĩawa “ũtanu kwa alaĩka ma Ngai.”—Luka 15:10.

Kũkeethĩwa ata wĩa wa kũtavanyʼa wathela? Mbivilia yonanĩtye kana “ita ila syĩ ĩtunĩ” sya alaĩka ikatetheesya Yesũ Klĩsto, Mũsumbĩ wa asumbĩ, kũkita “kaũnĩ wa mũthenya mũnene wa Ngai, Mwene Vinya Wʼonthe” ũla wĩtawa Ali–Maketoni. (Ũvuanʼyo 16:14-16; 19:14-16) Alaĩka me vinya makatũmĩwa kũsilĩla andũ ĩla Mwĩaĩi Yesũ ‘ũkaĩvanĩsya kwa ala matawĩwʼaa ũvoo mũseo wa Mwĩaĩi waitũ Yesũ.’—2 Athesalonika 1:7, 8.

Kwoou ndũkethĩwe na nzika kana alaĩka nĩmendeeawʼa nue mũno. O na nĩmendete mũno kwona andũ ala mendete kũmũthũkũma Ngai maendeee nesa, na ve mavinda maingĩ Yeova ũmatũmĩĩte kwĩkĩa vinya na kũsũvĩa athũkũmi make aĩkĩĩku.—Aevelania 1:14.

Kwoou kĩla ũmwe witũ e na ũtwi wa vata vyũ waĩle kwĩka. Ĩkũlyo nĩ, Tũkeethukĩĩsya na kwĩwʼa ũvoo mũseo ũla ũendeee kũtavanwʼa nthĩ yonthe? Ngũsĩ sya Yeova kĩsionĩ kyenyu no syende ũkũtetheesya ũunĩke nĩ ũtethyo wa alaĩka me vinya ma Ngai.

Nĩ kana ũkwate ũvoo mwingangĩ ĩũlũ wa kĩla Mbivilia ĩmanyĩasya ĩũlũ wa alaĩka aĩkĩĩku na mate aĩkĩĩku, sisya kĩlungu kya 10 kya ĩvuku Mbivilia Yo Ĩmanyĩasya Ata? yĩla yumĩthĩtwʼe nĩ Ngũsĩ sya Yeova. O na no ũyĩkwate Kĩsesenĩ kya jw.org/kam kana ũkatũmĩa ũvano ũũ wa QR.