Watchtower LIBRARY INDANETINĨ
Watchtower
LIBRARY INDANETINĨ
Kikamba
Ũ
  • ũ
  • Ũ
  • ĩ
  • Ĩ
  • MBIVILIA
  • MAVUKU
  • MAŨMBANO
  • w14 1/9 ĩth. 7-11
  • We Nũĩkĩĩaa Vyũ Kana Nĩwakwatie Ũla W’o? Nĩkĩ?

Vai vitio ya kĩla wanyuva.

Vole, ve thĩna waumĩla.

  • We Nũĩkĩĩaa Vyũ Kana Nĩwakwatie Ũla W’o? Nĩkĩ?
  • Mũsyaĩĩsya Yĩtavanasya Ũsumbĩ wa Yeova—2014
  • Syongo Nini
  • Ũvoo Ũngĩ ta Ũũ
  • WĨA ŨLA MŨNENE VYŨ WA KŨMANYĨSYA
  • KĨLA KĨTUMAA AMWE MAĨKĨĨA KANA NĨMAKWATIE ŨLA W’O
  • TAVYA ALA ANGĨ ŨLA W’O
  • Lũmya Ũwʼo Vyũ ũte na Nzika
    Mũsyaĩĩsya Yĩtavanasya Ũsumbĩ wa Yeova (Ĩkaseti ya Kwĩmanyĩsya)—2021
  • Ĩyĩĩkĩĩthye Mwene Kana Nĩwakwatie Ũwʼo
    Mũsyaĩĩsya Yĩtavanasya Ũsumbĩ wa Yeova (Ĩkaseti ya Kwĩmanyĩsya)—2020
  • Ngũsĩ sya Yeova Nĩ Aklĩsto ma Wʼo?
    Tanĩa Thayũ Tene na Tene!—Masomo ma Mbivilia Matonya Kũũtethya
  • ‘Endai Mũkatwʼĩkĩthye Mbaĩ Syonthe Amanyĩwʼa’
    Mũsyaĩĩsya Yĩtavanasya Ũsumbĩ wa Yeova (Ĩkaseti ya Kwĩmanyĩsya)—2016
Mũsyaĩĩsya Yĩtavanasya Ũsumbĩ wa Yeova—2014
w14 1/9 ĩth. 7-11

We Nũĩkĩĩaa Vyũ Kana Nĩwakwatie Ũla W’o? Nĩkĩ?

“Mwĩkuũe ũndũ kũilyĩ kwenda kwa Ngai kũla kũseo na kũla kwĩtĩkĩlĩka na kũla kwĩanĩu.”—ALO. 12:2.

ŨTONYA KŨSŨNGĨA ATA?

  • Nĩkĩ andũ aingĩ mendeeaw’a nĩ ũndũ Ngũsĩ sya Yeova syĩkalaa ĩla kwaumĩla kaũ?

  • Nĩkĩ wĩa witũ wa kũtavany’a ũĩkĩĩthasya andũ aingĩ kana nithyĩ Aklĩsto ma w’o?

  • Nĩ kyaũ kĩtumaa we ũĩkĩĩa kana nĩwakwatie ũla w’o?

1. Atongoi ma ndĩni ila syĩyĩtaa sya Kĩklĩsto methĩĩtwe mayĩka ata ĩvindanĩ ya kaũ myakanĩ mĩvĩtu?

WE Ngai nĩwendaa Aklĩsto ma w’o mathi kaũnĩ na mayũaa andũ ma nthĩ ingĩ? Andũ aingĩ meyĩtaa Aklĩsto nĩmekĩte ũu kwa kĩlungu kya myaka 100 mĩvĩtu. Kwa ngelekany’o, Akatholeki nĩmoaĩte Akatholeki, namo andũ ma ndĩni sya Protestant makoaa angĩ o ma ndĩni isu. O na ĩngĩ, atongoi ma ndĩni isu syawetwa, nĩmethĩĩtwe maiathima mĩio ya kaũ na ita sya kaũ. Ũndũ ũsu nĩwoonekie nesa ĩvinda ya Kaũ wa Kelĩ wa Nthĩ Yonthe.

2, 3. Ngũsĩ sya Yeova syeekie ata ĩvindanĩ ya Kaũ wa Kelĩ wa Nthĩ Yonthe na ĩtina wa ũu, na nĩkĩ?

2 Ngũsĩ sya Yeova syeekie ata ĩvindanĩ yĩu ya kaũ? Syo iyaaĩlikya kaũnĩ. Nĩkĩ Ngũsĩ itaalika kaũnĩ? Mũno mũno kĩla kyatumie italika nĩ momanyĩsyo ma Yesũ na ngelekany’o ĩla wamatiĩe. Yesũ aisye atĩĩ: “Na kwondũ wa ũu andũ onthe makamanya kana mwĩ amanyĩw’a makwa, ethĩwa mwĩthĩwa na wendo ĩnyw’ĩ kwa inyw’ĩ.” (Yoa. 13:35) O na ĩngĩ, nĩmatũmĩie mwolooto ũla wĩ ndetonĩ sya Vaulo ila waandĩkĩie Akolintho.—Soma 2 Akolintho 10:3, 4.

3 Kwoou, Aklĩsto ma w’o, ala wasya woo wa ngoo ũmanyĩĩtw’e nĩ Mbivilia, mayĩmanyĩasya kaũ kana makokita. Nũndũ wa kwĩthĩwa mailyĩ ũu, Aklĩsto ngili mbingĩ ma mũika na akũũ, aũme na aka, nĩmethĩĩtwe maithĩnw’a. Amwe nĩmekiw’e kolokolonĩ na angĩ matwawa kambinĩ sya kũthũkũmĩthw’a wĩa mũmũ. O na ĩvindanĩ ya ũsumbĩki wa kyama kya Nazi, nthĩ ya Germany, amwe nĩmooaiwe. O na kau Ngũsĩ nĩsyathĩnĩiw’e Europe mũno, syo iyaaũlwa nĩ wĩa ũla syanengiwe wa kũtavany’a ũvoo mũseo wa Ũsumbĩ wa Yeova. Nĩsyaendeeie kũtavany’a na kĩthito syĩ kolokolonĩ, kambinĩ sya mathĩna, o na ĩla syatwaiwe nthĩ ingĩ.a O na ĩngĩ, Ngũsĩ sya Yeova iyaaĩlikya kaũnĩ ũla waĩ nthĩ ya Rwanda mwaka wa 1994. O na iyaaĩlikya kaũnĩ ũla wokitawa nĩ nthĩ ila syĩtawa Balkans na ũla watumie nthĩ ĩla yeetawa Yugoslavia ĩtilĩkangana.

4. Andũ mamanya kana Ngũsĩ sya Yeova iyĩlikasya kaũnĩ methĩawa na woni mwaũ kũsyelekela?

4 Andũ aingĩ ĩũlũ wa nthĩ nĩmaĩkĩĩte vyũ kana Ngũsĩ sya Yeova nĩsyendete Ngai na atũi nũndũ iyĩlikasya kaũnĩ. Kwa ndeto ingĩ, nĩsyo Aklĩsto ala ma w’o. Ĩndĩ ve maũndũ angĩ ũthaithinĩ witũ ala matumaa andũ mamanya kana ithyĩ, Ngũsĩ sya Yeova, nithyĩ Aklĩsto ma w’o.

WĨA ŨLA MŨNENE VYŨ WA KŨMANYĨSYA

5. Amanyĩw’a ma mbee ma Klĩsto maaĩlĩte kwĩka ũndũ wĩva wĩ kĩvathũkany’o na ũndũ mamanyĩĩte?

5 Kuma ĩla Yesũ wambĩĩie ũthũkũmi wake, nĩwakindĩlĩĩile mũno vata wa kũtavany’a ũvoo mũseo wa Ũsumbĩ wa Ngai. Anyuvie amanyĩw’a 12 mambĩĩsye wĩa ũsu wesaa kũtethw’a nthĩ yonthe, na ĩtina wa vau amanyĩsya kĩkundi kĩngĩ kya amanyĩw’a 70. (Luka 6:13; 10:1) Amamanyĩisye matavany’e ũvoo mũseo na mayamba kũtavya Ayuti. Na ĩndĩ ũndũ wa ũsengy’o nĩ kana, ĩtina wa kwĩka ũu, amanyĩw’a ma Yesũ maĩ mambĩĩe kũtavya andũ mate aĩke ma mbaĩ ingĩ ũvoo mũseo. Ũsu waĩ ũndũ wĩ kĩvathũkany’o mũno vyũ na ũndũ amanyĩw’a asu Ayuti mamanyĩĩte.—Meko 1:8.

6. Nĩ kyaũ kyatumie Vetelo amanya kana Yeova nde kyende?

6 Mũtũmwa Vetelo nĩwatũmiwe nĩ Yeova athi kwa Kolinelio, mũndũ ũtaĩ mwaĩke na ũtaĩ Mũyuti. Nĩvo ĩndĩ Vetelo wamanyie kana Ngai nde kyende. Ĩtina wa vau Kolinelio na mũsyĩ wake nĩmavatisiwe. Ũklĩsto waĩ ũnambĩĩa kũvikĩa andũ angĩ, nũndũ o namo andũ ma mbaĩ syonthe maĩ matonya kwĩw’a ũla w’o na kũwĩtĩkĩla. (Meko 10:9-48) Kuma ĩvinda yĩu ũvoo waĩ ũtavanw’e ĩũlũ wa nthĩ yonthe.

7, 8. Ũseũvyo wa Yeova wĩkĩte ata nĩ kana ũtetheesye andũ mew’e ũvoo mũseo? (Sisya visa ĩthangũnĩ ya 7.)

7 Ĩvindanĩ yĩĩ, ala matongoesye ũseũvyonĩ wa Yeova nĩmethĩĩtwe na kĩthito kya kũvanga na kũkwata mbau wĩa wa kũmanyĩsya na kũtavany’a ũvoo mũseo ĩũlũ wa nthĩ yonthe. Ũmũnthĩ Ngũsĩ ta milioni nyanya nĩsyĩkĩaa kĩthito mũno nĩ kana inyaĩĩkye ũvoo mũseo ĩũlũ wa Klĩsto kwa ithyomo mbee wa 600, na ithyomo isu no iendeee kwongeleka. Andũ aingĩ nĩmesĩ Ngũsĩ sya Yeova nũndũ wa wĩa wasyo wa kũtavany’a nyũmba na nyũmba na kũtavany’a kũla kwĩthĩawa andũ aingĩ. Mavinda amwe Ngũsĩ sya Yeova itavanasya kũndũ ta kũu kwĩthĩawa andũ aingĩ kwa kwia mavuku masyo mesanĩ, na kwa kũtũmĩa tũkalĩ twa kũsukuma twĩ na mavuku.

8 Ũseũvyo wa Yeova nũmanyĩĩtye ana-a-asa na eĩtu-a-asa mbee wa 2,900 kũalyũla Mbivilia na mavuku angĩ maeleetye Mbivilia. Mo maialyũlaa o ithyomo ila syonekaa ta syo ineenawa nĩ andũ aingĩ. Maalyũlaa mavuku o na kwa ithyomo ingĩ itesĩkĩwe mũno, ĩndĩ ineenawa nĩ andũ milioni mbingĩ. Kwa ngelekany’o, nthĩ ya Spain andũ milioni mbingĩ matũmĩaa kĩthyomo kyoo kya Catalan. Mũno mũno, andũ aingĩ nĩmambĩĩe kũtũmĩa kĩthyomo kya Catalan nthĩnĩ wa isio sya Valencia na Alicante, o na ithamanĩ sya Balearic, na nthĩ ya Andorra. Ũmũnthĩ Ngũsĩ sya Yeova nĩsyumĩthasya mavuku maeleetye Mbivilia kwa kĩthyomo kya Catalan na maũmbano ma Kĩklĩsto nĩmekawa kwa kĩthyomo kĩu kĩkiitaa ngoo syoo.

9, 10. Nĩ kyaũ kyonanasya kana ũseũvyo wa Ngai nĩwendeeaw’a nĩ kwĩanĩsya mavata ma kĩ-veva ma andũ onthe?

9 Wĩa ũsu wa kũalyũla na kũmanyĩsya andũ Mbivilia na kĩthyomo kyoo nũtethaw’a ĩũlũ wa nthĩ yonthe. Kwa ngelekany’o, o na kau nthĩ ya Mexico andũ aingĩ maneenaa kĩthyomo kya Spanish, kwĩ andũ angĩ maneenaa ithyomo ingĩ. Kĩthyomo kĩmwe nĩ kĩla kĩtawa Maya. Ana-a-asa na eĩtu-a-asa ala maalyũlaa mavuku kwa kĩthyomo kya Maya nĩmatũmiwe makekale kĩsionĩ kĩmwe vala kĩthyomo kya Maya kĩneenawa. Na nũndũ aalyũli asu maneenaa na makew’a kĩthyomo kyu kĩineenwa kĩla mũthenya, maalyũlaa mavuku nesa kwa kĩthyomo kyu ũkethĩa andũ ma kũu nĩmekũelewa kwa nzĩa yĩ laisi. Kwasũanĩa kĩthyomo kya Nepali, kĩla kĩneenawa nthĩ ya Nepal. Nthĩ ĩsu yĩ andũ mbee wa milioni 29. Nthĩ ĩsu ĩneenawa ithyomo mbee wa 120, ĩndĩ andũ mbee wa milioni ĩkumi maneenaa kĩthyomo kya Nepali, na kwĩ o angĩ makĩneenaa ta kyo kĩthyomo kyoo kya kelĩ. O namo mavuku maitũ nĩmaumaw’a kwa kĩthyomo kyu.

10 Ũseũvyo wa Yeova nĩwosaa kwa ũito wĩa wa kũtavany’a ũvoo mũseo wa Ũsumbĩ nthĩ yonthe, na nĩkyo kĩtumi ũkwete mbau ikundi sya ũalyũli ila syĩ nthĩ yonthe.Tulakiti milioni mbingĩ, mbulosua, na makaseti ninyaĩĩkĩw’e andũ nthĩ yonthe vate ndĩvi. Ngalama sya wĩa ũsu iũngamĩawa na mĩvothi ya ngenda ĩla yumaw’a nĩ Ngũsĩ sya Yeova, ila iatĩĩaa ndeto ii sya Yesũ: “Nĩmwosete mana, nenganai mana.”—Mt. 10:8.

11, 12. Wĩa wa kũtavany’a nthĩ yonthe wa Ngũsĩ sya Yeova ũtumĩte andũ methĩwa na woni mwaũ kũsyelekela?

11 Ngũsĩ sya Yeova syĩthĩawa syĩyumĩtye vyũ wĩanĩ ũsu wa kũtavany’a na kũmanyĩsya nũndũ syĩ na mũĩkĩĩo mũlũmu vyũ kana nĩsyakwatie ũw’o. Ũu ũtumaa syĩthĩwa syĩyũmbanĩtye kũeka maũndũ masyo na syĩndũ ingĩ sya vata nĩ kana itavye andũ ma mbaĩ na ithyomo syĩ kĩvathũkany’o ũvoo mũseo. Ngũsĩ mbingĩ nitw’ĩte kwĩthĩwa ite na syĩndũ mbingĩ, ikemanyĩsya kĩthyomo kĩeni, na ikamanyĩa mĩkalĩle ya kũndũ kũngĩ nĩ kana syĩanĩsye wĩa ũsu wa Kĩklĩsto wa kũtavany’a. Wĩa ũsu wa kũtavany’a na kũmanyĩsya nthĩ yonthe nũtumĩte andũ aingĩ mamanya kana Ngũsĩ sya Yeova nĩsyo aatĩĩi ma w’o ma Klĩsto Yesũ.

12 Ngũsĩ syĩkaa maũndũ asu onthe nũndũ niĩkĩĩaa vyũ kana nĩsyakwatie ũla w’o. Ĩndĩ nĩ ũndũ ũngĩ wĩva ũtumĩte andũ milioni mbingĩ maĩkĩĩa kana Ngũsĩ sya Yeova nĩsyo syĩthĩawa na ũla w’o?—Soma Alomi 14:17, 18.

KĨLA KĨTUMAA AMWE MAĨKĨĨA KANA NĨMAKWATIE ŨLA W’O

13. Ngũsĩ sya Yeova syĩkaa ata nĩ kana ũseũvyo ũendeee kwĩthĩwa wĩ mũtheu?

13 No tũtetheke mũno kumana na maelesyo ma Aklĩsto ma ĩvinda yitũ ala maĩkĩĩĩte vyũ kana nĩmakwatie ũla w’o. Mwana-a-asa ũmwe ũmũthũkũmĩte Yeova kwa ĩvinda ĩasa aisye ũũ: “Nĩvekĩawa kĩthito kingĩ nĩ kana ũseũvyo wa Yeova wĩthĩwe wĩ mũtheu kĩ-mwĩkalĩle na ndũkavukw’e, o na ethĩwa nũũ ũkũnengwa ũtao kana ũkũkanw’a.” Nĩ kyaũ kĩtetheeasya Ngũsĩ syĩthĩwe na mwĩkalĩle ũsu mũtheu? Iatĩĩaa myolooto ĩla yĩ Ndetonĩ ya Ngai na iiatĩĩa ngelekany’o ĩla syaiĩiwe nĩ Yesũ Klĩsto na amanyĩw’a make. Kwoou, ũmũnthĩ amwe ala maleaa kwĩthĩwa na mwĩkalĩle wosanĩte na myolooto ya Ngai nĩmatengetwe kuma kĩkundinĩ. Ngũsĩ mbingĩ ũmũnthĩ syĩthĩawa na mwĩkalĩle mũseo. O na andũ ala tene mate Ngũsĩ mekalaa mwĩkalĩle ũtaĩ wĩtĩkĩlĩka nĩ Ngai nĩmaalyũkile.—Soma 1 Akolintho 6:9-11.

14. Andũ aingĩ ala methĩĩtwe me atenge mekĩte ata, na ũu umĩlĩtye kyaũ?

14 Mbivilia yonanĩtye kana Aklĩsto nĩmaĩlĩte kũveta kĩkundinĩ andũ ala malea kũmwĩw’a Ngai. Ĩndĩ ũndũ wa kũtanĩthya nĩ kana andũ ngili mbingĩ nĩmethĩĩtwe mayĩlila na makasyoka kĩkundinĩ. (Soma 2 Akolintho 2:6-8.) Kwĩkala kwosana na myolooto ya Mbivilia nĩkũtumĩte kĩkundi kya Kĩklĩsto kĩthĩwa kĩ kĩtheu, na ũu ũkatuma Ngũsĩ syĩthĩwa na mũĩkĩĩo vyũ kana nĩsyo syĩtĩkĩlĩtwe nĩ Yeova. Ndĩni mbingĩ nĩsyĩtĩkĩlĩtye mwĩkalĩle mũthũku ĩndĩ Ngũsĩ sya Yeova syĩkalaa kwosana na ũndũ Ngai wendete. Ũu nũtumĩte andũ aingĩ mamanya kana nĩsyo iatĩĩaa ũla w’o.

15. Nĩ kyaũ kyaĩkĩĩthisye mwana-a-asa ũmwe kana we nĩwakwatie ũla w’o?

15 Nĩkĩ Ngũsĩ ingĩ ila syĩthĩĩtwe syĩ ndĩkĩĩku kwa ĩvinda ĩasa iĩkĩĩaa kana nĩsyakwatie ũla w’o? Mwana-a-asa ũmwe wĩ na myaka 54 aĩtye ũũ: “Kuma nĩ o wa mũika nĩthĩĩtwe nĩĩkĩĩte kana mũĩkĩĩo wakwa ũtw’ĩĩkĩtwe nĩ ituĩ kana maũndũ aa atatũ ma w’o: (1) kana kwĩ Ngai; (2) kana nĩwaveveeie Mbivilia; na (3) kana ũmũnthĩ atũmĩaa na akaathima kĩkundi kya Kĩklĩsto kya Ngũsĩ sya Yeova. Ĩvinda yonthe yĩla nĩthĩĩtwe ndyĩmanyĩsya, nĩnĩthimaa maũndũ asu, na ndyĩkũlya ethĩwa mo nĩ ma w’o. O ũndũ myaka ĩvĩtĩte, now’o nĩendeee kwona maũndũ asu me ma w’o, na ũu ũkatuma mũĩkĩĩo wakwa wĩthĩwa wĩ mũlũmu, na ngethĩwa nĩsĩ nesa vyũ kana Ngũsĩ nĩsyo syĩthĩawa na ũla w’o.”

16. Nĩ kyaũ kyendeeisye mwĩĩtu-a-asa ũmwe ĩũlũ wa ũla w’o?

16 Mwĩĩtu-a-asa ũmwe mũtwae na ũla ũthũkũmaa ovisinĩ ũla mũnene wa Ngũsĩ sya Yeova New York, aisye ũũ aiweta ĩũlũ wa ũseũvyo wa Yeova: “Now’o ũseũvyo ũla ũtavanasya ĩũlũ wa ĩsyĩtwa ya Yeova ũteũthingĩthĩka. Ũndũ ũsu nĩ wa w’o ta kĩ twalilikana kana ĩsyĩtwa ya Ngai yĩwetetwe Mbivilianĩ mavinda ta 7,000! Nĩnĩw’aa mũyo nũndũ wa ndeto sya kwaka ila syĩ ĩandĩkonĩ ya 2 Mavinda 16:9 ila syaĩtye, ‘Metho ma Yeova maendaa kũũ na kũũ nthĩ yonthe, eyonan’ye e vinya kwondũ wa ala ngoo syoo imwelekele syĩ mbĩanĩu.’” Aendeee kwasya: “Ũw’o nũmanyĩĩtye ũndũ ndonya kwĩthĩwa na ngoo mbĩanĩu nĩ kana Yeova onany’e vinya wake kũmbelekela. Nonaa ngwatanĩo yakwa vamwe na Yeova new’o ũndũ ũla wa vata vyũ. Na nĩndũngaa mũvea nũndũ wa kĩanda kya Yesũ kya kũtũnenga ũmanyi ĩũlũ wa Ngai, ũmanyi ũsu nĩw’o ũndetheeasya.”

17. Mũndũ ũmwe tene ũtaĩkĩĩaa kana kwĩ Ngai yu aĩkĩĩaa kyaũ, na nĩkĩ?

17 Mũndũ ũmwe ũla tene ũtaĩkĩĩaa kana kwĩ Ngai aĩtye ũũ: “Wũmbi nũndĩkĩĩthasya kana Ngai nĩwendaa andũ matanĩe thayũ, na kwoou ndakaeka thĩna ũendeee kwĩthĩwa kw’o tene na tene. O na ĩngĩ, o ũndũ andũ maendeee kwĩthĩwa mateũmũkĩa Ngai, now’o andũ ma Yeova maendeee kwĩthĩwa na mũĩkĩĩo mũlũmu, kĩthito kingĩ, na wendo. Veva wa Yeova now’o ũtonya kwĩanĩsya maũndũ ta asu.”—Soma 1 Vetelo 4:1-4.

18. We wĩĩw’a ata kwelekela maelesyo ma ana-a-asa asu elĩ?

18 Mũndũ ũngĩ wĩthĩĩtwe e Ngũsĩ kwa ĩvinda ĩasa o nake nĩwaeleisye kĩla kĩtumĩte ethĩwa na mũĩkĩĩo ĩũlũ wa ũw’o ũla tũtavanasya. Aisye atĩĩ: “Kwĩmanyĩsya Mbivilia kwa myaka mingĩ nĩkũtumĩte nĩmanya kana Ngũsĩ nitatĩte mũno kũatĩĩa ngelekany’o ya Aklĩsto ma ĩvinda ya atũmwa. Kũtembea nthĩ yonthe nĩkũtumĩte nĩyonea ngwatanĩo ĩla yĩthĩawa na Ngũsĩ sya Yeova nthĩ yonthe. Ũw’o ũla wĩ Mbivilianĩ nũtumĩte nĩthĩwa nĩ mwĩanĩe na nĩ mũtanu.” O na ĩvinda yĩmwe yĩla mwana-a-asa wĩ na myaka mbee wa 60 wakũlilw’e nĩkĩ wĩ na mũĩkĩĩo kana nĩwakwatie ũla w’o, aeleisye ũũ aineena ĩũlũ wa Yesũ Klĩsto: “Nĩtwĩmanyĩĩtye mũno ĩũlũ wa mwĩkalĩle wa Yesũ na ũtavany’a wake na ũu ũkatuma twendeew’a nĩ ngelekany’o yake. Nĩtwĩkĩte moalyũku mwĩkalĩlenĩ witũ nĩ kana kwĩsĩla kũla kwĩ Klĩsto Yesũ, twĩthĩwe na ngwatanĩo nzeo na Ngai. Nĩtwamanyie kana nthembo ya wovosyo ya Klĩsto nĩyo nzĩa ya kũkwata ũtangĩĩo. Na nĩtwĩsĩ kana nĩwathayũũkiw’e kuma kwa akw’ũ. Twĩ na ũkũsĩ mwĩanu kuma kwa andũ ala moonie ũndũ ũsu.”—Soma 1 Akolintho 15:3-8.

TAVYA ALA ANGĨ ŨLA W’O

19, 20. (a) Vaulo akindĩlĩĩile ĩũlũ wa kĩanda kĩva kĩkundinĩ kya Lomi? (b) Ithyĩ Ngũsĩ twĩthĩawa na kĩanda kĩva?

19 Nũndũ ithyĩ nĩtwendete atũi maitũ, tũyamba kũlea kũtavya ala angĩ ũw’o wa vata ũla twĩthĩawa naw’o. Vaulo atavisye ana-a-asa make kĩkundinĩ kya Lomi ũũ: “Ethĩwa ũkamumbũla Yesũ na kanyw’a waku kana nĩwe Mwĩaĩi, na ũkeetĩkĩla ngoonĩ yaku kana Ngai nĩwamũthayũũkisye kũmumya akw’ũnĩ, ũkatangĩĩwa: nũndũ mũndũ nĩwĩtĩkĩlaa na ngoo kũvikĩa ũlũngalu; na nĩwumbũlaa na kanyw’a kũvikĩa ũtangĩĩo.”—Alo. 10:9, 10.

20 Ithyĩ Ngũsĩ sya Yeova nĩtwĩthĩawa na mũĩkĩĩo kana twĩ na ũla w’o, na nĩtwĩsĩ kana twĩthĩawa na kĩanda kya kũtavya ala angĩ ĩũlũ wa Ũsumbĩ wa Ngai. Kwoou, ekai twĩthĩwe na kĩeleelo kya kũendeea kũmanyĩsya ala angĩ Mbivilia na kũmony’a kwĩsĩla mwĩkalĩle witũ kana nĩtũĩkĩĩaa vyũ nĩtwakwatie ũla w’o.

a Sisya ĩvuku Mashahidi wa Yehova—Wapiga-Mbiu wa Ufalme wa Mungu, ĩthangũ ya 190-198, 448-454.

    Kikamba Publications (1950-2025)
    Uma
    Lika Nthĩnĩ
    • Kikamba
    • Tũma
    • Mũvangĩle ũla ũkwenda
    • Copyright © 2025 Watch Tower Bible and Tract Society of Pennsylvania
    • Mĩao ya Kũtũmĩa
    • Ũvoo Waku wa Kĩmbithĩ
    • Mpangilio wa Faragha
    • JW.ORG
    • Lika Nthĩnĩ
    Tũma