We Nũneenaa na Ngai?

Andũ me ndũũ nĩmaeaa ngewa mũno ũndũ vatonyeka me vamwe, kana makatũmĩa nzĩa ingĩ ta kũea ngewa Indanetinĩ menene, maitũmĩa simũ, valũa, kana e-mail. O ta ũu, nĩ kana tũmũthengeee Ngai twaĩlĩte kũea ngewa nake kĩla ĩvinda. Ĩndĩ tũtonya kwĩka ũu ata?

No tũneene na Yeova mboyanĩ. Ĩndĩ kũvoya Ngai kwĩ kĩvathũkany’o na kũea ngewa na mũndũ wa ĩika yitũ. Twaĩlĩte kũmanya kana ĩla tũũvoya twĩthĩawa tũineena na Mũmbi witũ na nĩwe Ũla wĩ Ĩũlũ wa Onthe. Ũu waĩlĩte kũtuma tũvoya twĩ na ndaĩa na kĩkĩo kĩnene. Nĩ kana mboya sitũ syĩw’ĩke nĩ Ngai, twaĩle kwĩanĩsya maũndũ mana. Maũndũ amwe mamo nĩ aa atatũ.

Ũndũ wa mbee, twaĩlĩte kũvoya Yeova Ngai e weka, ĩndĩ ti Yesũ, “mũtheu” mũna, kana mũvw’anano. (Kuma 20:4, 5) Mbivilia yaĩtye ũũ: ‘Kĩla ũndũnĩ mavata menyu nĩmatavanw’e kwa Ngai na kũvoya na kwĩsũva vamwe na kũtũnga mũvea.’ (Avilivi 4:6) Ũndũ wa kelĩ, mũndũ aĩlĩte kũvoya ĩsyĩtwanĩ ya Mwana wa Ngai, Yesũ Klĩsto. Ũ Yesũ mwene aisye atĩĩ: ‘Vai mũndũ wũkaa kwa Asa, atesĩle kwakwa.’ (Yoana 14:6) Ũndũ wa katatũ, twaĩle kũvoya kwosana na kwenda kwa Ngai. Mbivilia yaĩtye atĩĩ: ‘Ethĩwa tũkavoya ũndũ kwĩanana na kwenda kwake, nũtwĩw’aa.’a—1 Yoana 5:14.

Ndũũ ndĩsa kwĩthĩwa yĩ ndũmu ethĩwa mũndũ ũmwe nowe ũneenaa ũla ũngĩ akilĩtye. O tondũ andũ me ndũũ matanĩaa kũea ngewa, twaĩlĩte kwĩtĩkĩlya Ngai aneene naitũ na tũyĩthukĩĩsya ĩla ũkwĩka ũu. We nĩwĩsĩ Ngai aneenaa naitũ ata?

Ũmũnthĩ Yeova Ngai “aneenaa” naitũ aitũmĩa Ndeto yake, Mbivilia. (2 Timotheo 3:16, 17) Nĩkĩ tũkwasya ũu? Kwa ngelekany’o, twasye nĩwakwata valũa ũandĩkĩwe nĩ mũnyanyau. Wamina kũũsoma nũtonya kwasya kana wĩ na ũtanu nũndũ mũnyanyau nĩwakũtavya ũndũ! Ũtonya kwasya ũu o na kau ndanakũtavya ũndũ ũsu na mũnuka ĩndĩ eĩkĩte kũũandĩka. O ta ũu, ĩla ũũsoma Mbivilia wĩthĩaa no ta wanenga Yeova mwanya aneene naku. Nĩkyo kĩtumi Gina, ũla ũwetetwe kĩlungunĩ kya mbee, waĩtye ũũ: “Nyie nĩona nĩ kana none Ngai ta mũnyanyawa, naĩlĩte kũsoma ‘valũa’ ũla ũtũandĩkĩe, naw’o nĩ Mbivilia.” Aendeee kwasya: “Kũsoma Mbivilia kĩla mũthenya nĩkũtumĩte nĩmũthengeea Ngai.” We nĩwĩtĩkĩlasya Yeova aneene naku kĩla mũthenya kwa kũsoma Ndeto yake, Mbivilia, kĩla mũthenya? Kwĩka ũu kũkatuma wĩw’a wĩ vakuvĩ na Ngai.