KYONGO KYA ĨTHANGŨ YA MBEE | WE NĨWĨW’AA WĨ MŨNYANYAE WA NGAI?
We Nĩwĩw’aa wĩ Mũnyanyae wa Ngai?
“Kwĩthĩwa na ngwatanĩo ndũmu vamwe na Ngai kũtumaa wĩw’a wĩ mũsũvĩe, wĩ mwĩanĩe, na ũte na mawĩmakĩo. Wĩw’aa Ngai ta ũkũsyaĩĩsye nĩ kana akũtetheesye.”—CHRISTOPHER, MŨNDŨŨME WA MŨIKA KUMA NTHĨ YA GHANA.
“Ngai nũkwonaa mathĩnanĩ maku onthe na nũkwendete mũno na nũkũthĩnĩkĩaa mbee wa ũndũ ũtonya kũsũanĩa.”—HANNAH, KELĨTU KE NA MYAKA 13 KUMA ALASKA, AMELIKA.
“Kũmanya kana wĩ na ngwatanĩo ndũmu na Ngai nĩ ũndũ wa vata mũno na kũtumaa wĩw’a wausya ngoonĩ!”—GINA, MŨNDŨ MŨKA WĨ NA MYAKA 40 NA KĨNDŨ KUMA JAMAICA.
Christopher, Hannah, na Gina timo oka me na woni ũsu. Andũ aingĩ mũno ĩũlũ wa nthĩ nĩmaĩkĩĩaa vyũ kana Ngai nũmonaa me anyanyae. Nao nata we? We nĩwĩw’aa wĩ mũnyanyae wa Ngai? Kana no wende kũmũthengeea mũnango? Nũtonya kwĩthĩwa wĩkũlasya atĩĩ: ‘Yo nĩvatonyeka mũndũ akethĩwa na ũnyanya na Ngai Mwene Vinya W’onthe? Na ethĩwa nĩvatonyeka, aĩle kwĩka ata?’
KŨMŨTHENGEEA NGAI NĨ ŨNDŨ ŨTONYEKA
Mbivilia yonanĩtye kana nĩ ũndũ ũtonyeka kwĩthĩwa na ũnyanya mũseo vamwe na Ngai. O na nĩyonanĩtye kana Ngai eetie Avalaamu “mũnyanyawa.” (Isaia 41:8) Nayo ĩandĩko ya Yakovo 4:8 yĩtwĩĩte ũũ: “Mũthengeei Ngai, nake akamũthengeea inyw’ĩ.” Kwoou nĩ ũndũ ũtonyeka kwĩthĩwa na ngwatanĩo ndũmu vamwe na Ngai. Ĩndĩ ũtonya ‘kũmũthengeea’ Ngai ata na ũkethĩwa mũnyanyae, nake ndonekaa?
Nĩ kana ũkwate ũsũngĩo wa ĩkũlyo yĩu kwasũanĩa ũndũ andũ matumaa ndũũ. Mambaa kũmanyana o masyĩtwa. Na ĩndĩ o ũndũ maendeee kũea ngewa, na kĩla ũmwe aitavya ũla ũngĩ ũndũ wĩw’aa na ũndũ ũkwĩsilya, now’o ndũũ yoo ĩkamĩĩaa. Na ĩla kĩla ũmwe weeka ũla ũngĩ ũndũ mũseo, ũnyanya woo nũendeeaa kũlũlũmĩĩla. Ũu now’o mũndũ ũtumaa ndũũ na Ngai. Ekai twone ũndũ ũu wĩkĩkaa.