Mosũngĩo Ma Makũlyo Ma Mbivilia

Syana itonya kwĩmanyĩsya ata kũmwenda Ngai?

Syana syaku nitonya kwĩmanyĩsya kũmwenda Ngai syamanya kana e kw’o na nũsyendete. Nĩ kana imwende Ngai, no nginya imũmanye. (1 Yoana 4:8) Kwa ngelekany’o, nĩsyaĩle kũmanya maũndũ ta: Nĩkĩ Ngai woombie andũ? Nĩkĩ Ngai ũekete mathĩna methĩwe kw’o? Ngai e na mũvango mwaũ kwondũ wa andũ ĩvindanĩ yũkĩte?—Soma Avilivi 1:9.

Nĩ kana ũtetheesye syana syaku imwende Ngai no nginya we mwene wĩthĩwe ũmwendete. Ĩla syoona kana nũmwendete Ngai, o na syo ikamwenda.—Soma Kũtũngĩlĩlwa Kwa Mĩao 6:5-7; Nthimo 22:6.

Ũtonya kũvikĩa syana syaku ngoo ata ĩla ũkũimanyĩsya?

Ndeto ya Ngai yĩ ũtonyi. (Aevelania 4:12) Kwoou tetheesya syana syaku imanye momanyĩsyo ma mũsingi. Nĩ kana avikĩe ngoo sya andũ, Yesũ nĩwamakũlasya makũlyo, akamethukĩĩsya, na aimaelesya Maandĩko. Nĩ kana ũvikĩe syana syaku ngoo, atĩĩa ngelekany’o ya Yesũ ya kũmanyĩsya.—Soma Luka 24:15-19, 27, 32.

O na ĩngĩ maũndũ ala maandĩkĩtwe Mbivilianĩ mekwonany’a ũndũ Ngai weekaa andũ maũndũnĩ me kĩvathũkany’o no matetheesye syana imũmanye na iimwenda. Mavuku ala matonya ũkũtetheesya kwĩanĩsya ũndũ ũsu nĩmakwatĩkanaa Kĩsesenĩ kyawww.jw.org.—Soma 2 Timotheo 3:16.