MOSŨNGĨO MA MAKŨLYO MA MBIVILIA
Nĩkĩ Mbivilianĩ ve wathani?
Nĩkĩ Mbivilia ĩeleetye maũndũ ala mekĩkaa ũmũnthĩ?—Luka 21:10, 11.
Mbivilianĩ ve mawathani maingĩ maeleetw’e nesa. Vai mũndũ ũtonya kwathana nesa maũndũ ma ĩvinda yũkĩte. Kwoou, maũndũ ala Mbivilia yathanie na maendeee kwĩanĩa nĩmatũĩkĩĩthasya vyũ kana Mbivilia nĩ Ndeto ya Ngai.—Soma Yosua 23:14; 2 Vetelo 1:20, 21.
Mawathani ma Mbivilia ala meanĩe nĩmatumaa twĩthĩwa na mũĩkĩĩo mũlũmu kwa Ngai. (Aevelania 11:1) O na nĩmatũĩkĩĩthasya vyũ kana mawatho ala Ngai ũtwathĩte ma ĩvinda yũkĩte makeanĩa. Kwoou wathani ũla wĩ Mbivilianĩ nũtũnengae wĩkwatyo mũlũmu.—Soma Savuli 37:29; Alomi 15:4.
Wathani ũla wĩ Mbivilianĩ ũtũtethasya ata?
Mawathani amwe nĩmakanasya athũkũmi ma Ngai nĩ kana mose ĩtambya. Kwa ngelekany’o, ĩla Aklĩsto ma ĩvinda ya atũmwa moonie mawathani mana maianĩa, nĩmoosie ĩtambya na mauma Yelusaleme. Ĩtina ĩla Yelusaleme yaanangiwe nũndũ andũ aingĩ nĩmamũleete Yesũ, Aklĩsto asu nĩmatangĩĩiwe nũndũ maĩ maumie Yelusaleme mathi vandũ ve ũsũvĩo.—Soma Luka 21:20-22.
Ũmũnthĩ wathani ũla wĩanĩĩte nĩwonanasya kana o mĩtũkĩ Ũsumbĩ wa Ngai nũũmina mosumbĩ na silikalĩ syonthe sya andũ. (Ndanieli 2:44; Luka 21:31) Kwoou nĩ ũndũ wa vata kĩla ũmwe amanthe na mĩtũkĩ ũndũ vatonyeka kwĩtĩkĩlĩka nĩ Yesũ Klĩsto, ũla nĩwe Mũsumbĩ ũla ũsakũĩtwe nĩ Ngai.—Soma Luka 21:34-36.