MOSŨNGĨO MA MAKŨLYO MA MBIVILIA
Nĩvatonyeka ũkya ũkesa kũthela ĩũlũ wa nthĩ?
Ngai akamina ũkya ata ĩũlũ wa nthĩ?—Mathayo 6:9, 10.
Ũkya nũtumaa andũ milioni mbingĩ makw’a kĩla mwaka nũndũ wa kũkosa lĩu na kũkwatwa nĩ mowau. Andũ aingĩ ĩũlũ wa nthĩ nĩ ngya vyũ, o na kau kũndũ kũmwe ĩũlũ wa nthĩ andũ methĩawa me athwii. Mbivilia yonanĩtye kana ũkya wĩthĩĩtwe vo kwa ĩvinda ĩasa.—Soma Yoana 12:8.
Nĩ kana ũkya ũthele, vaĩle kwĩthĩwa na silikalĩ ĩsumbĩkĩte nthĩ yonthe. Silikalĩ ta ĩsu yaĩle kwĩthĩwa na ũtonyi wa kũaany’a malĩ ya nthĩ nesa na kũmina makaũ, nũndũ nĩmo mũno mũno matumaa kwĩthĩwa na ũkya. Ngai nũtwathĩte silikalĩ ta ĩsu.—Soma Ndanieli 2:44.
Nũũ ũtonya kũmina ũkya?
Ngai nũnyuvĩte Mwana wake, Yesũ, nĩ kana asumbĩke andũ onthe. (Savuli 2:4-8) Yesũ akoovosya ngya na aimina andũ ala mathĩnasya ala angĩ, o vamwe na kaũ.—Soma Savuli 72:8, 12-14.
Nũndũ Yesũ nĩwe “Mũnene wa Mũuo” ũla wathanĩtwe, akaete mũuo nthĩ yonthe na aisũvĩa andũ. Na ĩndĩ kĩla mũndũ ĩũlũ wa nthĩ akeethĩwa na mũsyĩ wake, akatanĩa wĩa wake, na ayĩthĩwa na lĩu wĩanĩte.—Soma Isaia 9:6, 7; 65:21-23.