mosũngĩo ma makũlyo ma mbivilia
Yesũ akeeka ata ĩvinda yũkĩte?
Mwakanĩ wa 33 nĩw’o Yesũ wakwie, athayũũkw’a, na athi ĩtunĩ. Ĩtina wa ĩvinda ĩasa, nĩwanengiwe ũkũmũ wa kũsumbĩka. (Ndanieli 7:13, 14) Nũndũ Yesũ nĩ Mũsumbĩ, ĩvindanĩ yũkĩte akaete mũuo ĩũlũ wa nthĩ na aiveta ũkya.—Soma Savuli 72:7, 8, 13.
Nũndũ Yesũ nĩwe Mũsumbĩ, akaveta maũndũ onthe mate malũngalu
Nĩkwĩthĩwa nĩwe ũkethĩwa asumbĩkĩte andũ, akeeka maũndũ maingĩ maseo. Akatũmĩa vinya ũla Asa ũmũnengete kũvetea andũ naĩ vyũ. Andũ makatanĩa kwĩkala kũũ ĩũlũ wa nthĩ mateũkũa kana kũkw’a.—Soma Yoana 5:26-29; 1 Akolintho 15:25, 26.
Yesũ aendee kwĩka ata ũmũnthĩ?
Ũmũnthĩ Yesũ aendee kũtongoesya aatĩĩi make ala ma w’o wĩanĩ wa kũtavany’a ĩũlũ wa nthĩ yonthe. Aatĩĩi asu make nĩmathokeaa andũ nĩ kana mamatavye kĩla Mbivilia ĩmanyĩasya ĩũlũ wa Ũsumbĩ wa Ngai. Yesũ nĩwathanie kana akeethĩawa vamwe na amanyĩw’a make ĩla meũtethya wĩa ũsu nginya ĩla Ũsumbĩ wa Ngai ũkaveta vyũ mosumbĩ ma andũ.—Soma Mathayo 24:14; 28:19, 20.
Yesũ atũmĩaa kĩkundi kĩla kya w’o kya Kĩklĩsto nĩ kana atetheesye andũ mekale nesa. Na eendeea kũmatetheesya nginya ĩla mevonoka nthĩ ĩno ĩyanangwa, na mailika nthĩ nzaũ ĩla twathĩtwe nĩ Ngai.—Soma 2 Vetelo 3:7, 13; Ũvuan’yo 7:17..