MOSŨNGĨO MA MAKŨLYO MA MBIVILIA
No tũmanye ũw’o ĩũlũ wa Ngai?
Nĩkĩ Ngai wendaa tũmanye ũla w’o? soma Yoana 17:3
Ngai nĩwaneenaa na andũ. Atũmĩie veva wake mũtheu kwĩkĩa ilĩkonĩ sya ala maandĩkaa Mbivilia ndeto ila wendaa maandĩke. (2 Vetelo 1:20, 21) No tũmanye ũw’o ĩũlũ wa Ngai kwa kũsoma Mbivilia.—Soma Yoana 17:17; 2 Timotheo 3:16.
Ngai nũeleetye maũndũ maingĩ ĩũlũ wake kwĩsĩla Mbivilia. Nũtũmanyĩĩtye nĩkĩ watũmbie, mũvango ũla wĩ naw’o kwelekela andũ, na ũndũ wendaa twĩkale. (Meko ma Atũmwa 17:24-27) Yeova Ngai nĩwendaa tũmanye ũw’o ĩũlũ wake.—Soma 1 Timotheo 2:3, 4.
Nĩkĩ Ngai ũmathoketye ala mendete ũw’o?
Yeova nĩ Ngai wa ũw’o na nĩwatũmie Mwana wake, Yesũ, oke kũmanyĩsya andũ ũw’o. Kwoou andũ ala mendete ũw’o nĩmakwataa momanyĩsyo ma Yesũ. (Yoana 18:37) Ngai nĩwendaa andũ asu mendete ũw’o matw’ĩke athaithi make.—Soma Yoana 4:23, 24.
Satani ũla Ndevili nũsiĩĩe andũ aingĩ maikamũmanye Ngai kwa kũnyaĩĩkya momanyĩsyo ma ũvũngũ ĩũlũ wa Ngai. (2 Akolintho 4:3, 4) Andũ ala matendete ũseo nĩmendeeaw’a nĩ momanyĩsyo asu ma ũvũngũ. (Alomi 1:25) Ĩndĩ andũ milioni mbingĩ me na ngoo nzeo nĩmamanyĩte ũw’o ĩũlũ wa Ngai kwa kwĩmanyĩsya Mbivilia.—Soma Meko ma Atũmwa 17:11.