Mbivilia Ĩmanyĩasya Ata?

Ndevili nũũ?

ŨTONYA KWASYA Ndevili nĩ . . .

• Kyũmbe kya veva?

• Ũthũku wĩthĩawa nthĩnĩ wa mũndũ?

• Kana nĩ kĩndũ andũ mekaa o kũsũanĩĩa?

ŨNDŨ MBIVILIA YAASYA

Ndevili nĩwaneenie na Yesũ na ‘amũtata.’ (Mathayo 4:1-4) Kwoou, Ndevili ti kĩndũ andũ mekaa o kũsũanĩa, o na ti ũthũku wĩthĩawa mũndũnĩ. Ndevili nĩ kyũmbe kĩthũku kya veva.

NĨ ŨNDŨ ŨNGĨ MWAŨ TŨKWĨMANYĨSYA KUMA MBIVILIANĨ?

• Mwambĩĩonĩ, Ndevili aĩ mũlaĩka mũseo, ĩndĩ “ndaaĩkala nthĩnĩ wa wʼo.” (Yoana 8:44) Nĩwatwʼĩkie mũkengani na eethĩwa e mũvĩnganĩsya wa Ngai.

• O ta Satani, ve alaĩka amwe meethĩiwe me avĩnganĩsya ma Ngai.—Ũvuanʼyo 12:9.

• Ndevili nĩwaĩtye mosũanĩo ma andũ aingĩ nĩ kana maikamanye kana e kwʼo.—2 Akolintho 4:4.

Ndevili no atongoesye andũ?

ANDŨ AMWE MAASYA kana mũndũ ndesa kũtongoewʼa nĩ Ndevili, namo angĩ nĩmakĩaa nũndũ monaa no mathĩnwʼe nĩ maveva mavuku. We wonaa ata?

ŨNDŨ MBIVILIA YAASYA

“Nthĩ yonthe ĩtwĩe nthĩnĩ wa ũla mũthũku.” (1 Yoana 5:19) O na kau Ndevili nũtongoeasya andũ aingĩ, ndatongoeasya kĩla mũndũ.

NĨ ŨNDŨ ŨNGĨ MWAŨ TŨKWĨMANYĨSYA KUMA MBIVILIANĨ?

• Ndevili nũtũmĩaa ũkengani nĩ kana aendeee kũtongoesya andũ.—2 Akolintho 11:14.

• O na mavinda amwe maveva mavuku nĩmatonya kũlika mũndũnĩ kana kũmũthĩnyʼa.—Mathayo 12:22.

• Ngai no aũtetheesye ‘ũkamũsiĩĩa Ndevili.’—Yakovo 4:7.