KYONGO KYA ĨTHANGŨ YA MBEE | MAŨNDŨ MATŨVUANĨASYA ŨNDŨ ĨTUNĨ KŨILYĨ
Makũlyo Ĩũlũ wa Wĩkalo wa Ĩtunĩ
We waaĩsa kũsũanĩa ĩũlũ wa wĩkalo wa ĩtunĩ na ala mekalaa vo? Ethĩwa nĩweekie ũu, ndwĩ weka. Kwa ĩvinda ya myaka ngili mbingĩ, andũ methĩĩtwe maisũanĩa ĩũlũ wa ũndũ ũsu. Andũ amwe maĩkĩĩaa kana wĩkalo wa syũmbe sya veva nĩ vandũ vekalaa aaũmae maitũ na kana nĩtwaĩle kũmanenga ndaĩa. Namo angĩ masũanĩaa ĩũlũ wa vandũ vanake na ve na mũuo mwingĩ vetawa ĩtunĩ, vausĩe alaĩka na andũ ala makusaa me aseo. O na ve andũ angĩ monaa wĩkalo ũsu ta mũsyĩ wa ngai milioni mbingĩ ite sya wʼo.
Andũ aingĩ maasyaa kana tũyĩsa kũmanya ĩũlũ wa wĩkalo wa ĩtunĩ nũndũ vai mũndũ waaũka kũũ nthĩ kuma ĩtunĩ na akaelesya ũndũ kũilyĩ. Ĩndĩ mosũanĩo asu moo ti ma wʼo. Yesũ Klĩsto ekalaa ĩtunĩ, wĩkalonĩ wa veva, atanamba kũka kũũ nthĩ. Atavisye atongoi ma ndĩni sya ĩvinda ya atũmwa ateũmavithanyʼa atĩĩ: “Ndyaatheea kuma ĩtunĩ nĩke kwenda kwakwa, ĩndĩ no kwenda kwa ũla wandũmie.” Kwoou Yesũ atavasya amanyĩwʼa make ĩũlũ wa ũndũ weesĩ nesa ĩla wameie atĩĩ: “Nthĩnĩ wa nyũmba ya Asa kwĩ mawĩkalo maingĩ.”—Yoana 6:38; 14:2.
Ĩthe wa Yesũ nĩ Ngai, na etawa Yeova, na “nyũmba” kana wĩkalo wa Yeova wĩ ĩtunĩ. (Savuli 83:18) Kwoou vai mũndũ ũtonya kũelesya ĩũlũ wa wĩkalo wa ĩtunĩ nesa ta ũndũ Yeova Ngai na Yesũ Klĩsto matonya kũelesya. Nĩmaeleetye ũvoo mwingĩ ĩũlũ wa wĩkalo wa ĩtunĩ kwĩsĩla mawoni ala moonasya athũkũmi moo aĩkĩĩku.
Kĩlungu kĩla kĩatĩĩe kĩneenea ilungu imwe sya Mbivilia ieleetye mawoni mana moonekie nĩ andũ. Ĩla ũkwĩthĩwa ũyĩmanyĩsya ĩũlũ wa mawoni asu, lilikana kana wĩkalo wa ĩtunĩ ti kĩndũ kĩtonya kwoneka nĩ mũndũ kana kĩndũ kĩtonya kũkwatwa na moko. Kwoou vandũ va kũelesya ĩũlũ wa wĩkalo wa ĩtunĩ kwa nzĩa ĩtatonya kũeleeka nĩ andũ, Ngai atũmĩie nzĩa nzeo ya mawoni nĩ kana atũtetheesye kũelewa nesa ũndũ wĩkalo wa ĩtunĩ ũilyĩ. Mawoni asu me Mbivilianĩ nĩmeũkũtetheesya kũmanya naaũ mekalaa nthĩnĩ wa “mawĩkalo maingĩ” ma Ngai.