We Ngai e Kĩla Vandũ?
Ũndũ Mbivilia ĩsũngĩĩte
Ngai e na ũtonyi wa kwona kĩla kĩndũ na wa kwĩka ũndũ ũtwʼĩte vala ũkwenda. (Nthimo 15:3; Aevelania 4:13) Ĩndĩ, Mbivilia ndĩmanyĩasya kana Ngai e kĩla vandũ. Vandũ va ũu, ĩeleasya kana Ngai nĩ mũndũ na e vala wĩkalaa.
Ũndũ Ngai ũilyĩ: Ngai e mwĩĩ wa veva. (Yoana 4:24) Tũitonya kũmwona. (Yoana 1:18) Kĩla ĩvinda mawoni ĩũlũ wa Ngai ala maandĩkĩtwe Mbivilianĩ monanasya nesa kana e vala wĩkalaa. Vai vandũ wonanawʼa kana e kĩla vandũ.—Isaia 6:1, 2; Ũvuanʼyo 4:2, 3, 8.
Vala Ngai wĩkalaa: Ngai ekalaa wĩkalonĩ wa veva, na wĩkalo ũsu wĩ kĩvathũkanyʼo vyũ na wĩkalo ũla wĩkalaa syũmbe ila twonaa na metho. Wĩkalo ũsu wa Ngai “wĩ ĩtunĩ.” (1 Asumbĩ 8:30) Mbivilia nĩyonanĩtye ĩvinda yĩmwe syũmbe sya veva ‘syookie kwĩyumĩlya mbee wa Yeova,’a na ũndũ ũsu wĩonanyʼa kana Ngai e vala wĩkalaa.—Yovu 1:6.
Ethĩwa Ngai nde kĩla vandũ, we no anzũvĩe?
Ĩĩ. Ngai nũsũvĩaa kĩla ũmwe witũ vyũ. O na kau ekalaa ĩtunĩ, nĩwonaa onthe ala me ĩũlũ wa nthĩ mekwenda kwĩka maũndũ ala mamũtanĩthasya, na nũmatethasya. (1 Asumbĩ 8:39; 2 Mavinda 16:9) Ekai twone ũndũ Yeova wonanasya kana nũthĩnĩkĩaa athũkũmi make ala aĩkĩĩku:
Ĩla ũũvoya: Yeova nĩwĩwʼaa mboya yaku ndatĩkanĩ o ĩla wamũvoya.—2 Mavinda 18:31.
Ĩla ũkwʼĩte ngoo: “Yeova e vakuvĩ na ala matũlĩkĩte ngoo, na nũtangĩĩaa ala mekwĩlila vevanĩ.”—Savuli 34:18.
Ĩla ũkwenda kũtongoewʼa: Yeova ‘akũmanyĩasya na kũkwonyʼa nzĩa’ ĩla yaĩle kwĩsĩla Ndeto yake Mbivilia.—Savuli 32:8.
Mawoni mate ma wʼo ĩũlũ wa kana Ngai e kĩla vandũ
Woni ũte wa wʼo: Ngai e kĩla vandũ.
Ũwʼo: Ngai ndekalaa ĩũlũ wa nthĩ o na ndekalaa syĩndũnĩ ĩla twonaa na metho. (1 Asumbĩ 8:27) Nĩ wʼo kana ndata na syĩndũ ĩla ingĩ syoombiwe ‘nitavanasya ũtheu mũtisu wa Ngai.’ (Savuli 19:1) Ĩndĩ, Ngai ndekalaa syĩndũnĩ ila woombie o tondũ mũsoli wa mavisa ũtatonya kwĩkala mavisanĩ ala wasola. Ĩndĩ o na ũu wĩ o vo, ĩvisa yĩu no yĩtũtavye ũndũ mũna ĩũlũ wa ũla ũyĩsolete. O ta ũu, nthĩ ĩno tũilye nĩtũmanyĩasya ĩũlũ wa ‘nguma sya Ngai itonekaa.’ Ndaĩa isu nĩ ta vinya, ũĩ, na wendo.—Alomi 1:20.
Woni ũte wa wʼo: Nĩ kana Ngai ethĩwe atonya kũmanya maũndũ onthe na ayĩthĩwa mwene vinya wʼonthe, no nginya ethĩwe kĩla vandũ.
Ũwʼo: Veva mũtheu wa Ngai nĩ vinya ũla Ngai ũtũmĩaa kwĩka maũndũ. Kwĩsĩla veva wake mũtheu, Ngai no amanye ũndũ ũla ũkwenda kwĩka, na vala ũkwenda ũndũ ũsu wĩthĩwe, na eenda wĩkĩke ĩndĩĩ. Na ti lasima oke vo nĩ kana maũndũ asu mekĩke.—Savuli 139:7.
Woni ũte wa wʼo: Ĩandĩko ya Savuli 139:8 yĩmanyĩasya kana Ngai e kĩla vandũ nũndũ yasyaa atĩĩ: “Ethĩwa ngambata ĩtunĩ, wĩ vo; ethĩwa ngalanʼya ũkomo wakwa Seoli, sisya, wĩ vo.”
Ũwʼo: Ĩandĩko yĩĩ yĩikũneenea ĩũlũ wa vala Ngai wĩkalaa. Ĩndĩ yĩmanyĩasya kana vai vandũ vaasa mũno kwa Ngai ũndũ ũtatonya kũtũtethya.
a Mbivilia yonanĩtye kana ĩsyĩtwa ya Ngai nĩ Yeova.