No Ũlilikane?

Nũsomete nesa makaseti ma Mũsyaĩĩsya ala mela kuma? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Nĩkĩ Yeova weetĩkĩlasya mbaĩ ya Isilaeli ĩthi kaũnĩ?

Yeova nũtwendete. Ĩndĩ ĩla mbaĩ ila syathyũlũlũkĩte Aisilaeli syamavinyĩĩa kana syameka maũndũ mathũku, Ngai nĩweetĩkĩlasya kaũ nĩ kana asũvĩe andũ make. Ngai e weka nĩwe wawetaa ũla waĩle kũkita, na ĩla kaũ ũsu waĩle kũkitwa.—w15 1/11, ĩth. 4-5.

Nĩ maũndũ meva ma vata matonya kũtetheesya asyai mamanyĩsye syana syoo ila sya mũika imũthũkũme Yeova?

Ve vata asyai mende syana syoo na maisyonyʼa kana nĩmenyivĩtye. O na ĩngĩ nũseo makethĩwa na ũmanyi na maitata maielewe.—w15 15/11, ĩth. 9-11.

Nĩkĩ vovu tiwe wĩthĩawa aendeesye kĩanda kĩla kyaĩ na Vetelo?

Ĩandĩko ya Mathayo 16:17, 18 yĩyonanĩtye kana Vetelo nĩwe wesaa kwĩthĩwa e mũtongoi wa aatĩĩi onthe ma Yesũ. Mbivilia yonanĩtye kana Yesũ nĩwe ĩvia ya kĩkotonĩ ya kĩkundi, ĩndĩ ti atĩ Vetelo nĩwe wanengiwe ũtongoi ĩũlũ wakyo. (1 Vet. 2:4-8)—w15 1/12, ĩth. 12-14.

Twaĩle kũsũanĩa maũndũ meva tũtanamba kũneena?

Nĩ kana tũtũmĩe ũĩmĩ witũ nesa, twaĩle (1) kũmanya nĩ ĩndĩĩ twaĩle kũneena (Mũta. 3:7), (2) nĩ ndeto syĩva twaĩle kũtũmĩa (Nth. 12:18), na (3) twĩneena ata (Nth. 25:15).—w15 15/12, ĩth. 19-22.

Aklĩsto maĩle kwĩvetangana na maũndũ amwe meva ala monanasya kana mũndũ ti mũĩkĩĩku?

Aklĩsto ma wʼo mayaĩle kũkengana kana kũsukana. O na mayaĩle kũneena maũndũ mate ma wʼo me na mũvango wa kwanangĩa mũndũ ũngĩ ĩsyĩtwa, mayaĩle kwĩthĩwa me avenani kana avutani, o na mayaĩle kũya.—wp16.1, ĩth. 5.

“Athembi anene” ala mawetetwe Mbivilianĩ methĩwa maĩ aaũ?

Ndeto “athembi anene” yonanasya andũ ala maĩ na kyeo katĩ wa ala meethĩawa me athembi. Amwe moo maĩ athembi tene na maumwʼa.—wp16.1, ĩth. 10.

Twaĩle kwosa ata Mũklĩsto ũĩsaa kĩmũtũ na akanywʼa mbinyu ĩvindanĩ ya kũlilikana kĩkwʼũ kya Yesũ?

Aklĩsto maikathaa ũndũ vataĩle ala mekũya kĩmũtũ na kũnywʼa mbinyu. O na mwĩtĩkĩwʼa mauta wa wʼo ndendaa kũkathwa ũndũ vataĩle na ndendaa kũtinda aiweta kana we nĩ mwĩtĩkĩwʼa mauta. (Mt. 23:8-12)—w16.01, ĩth. 23-24.

Twĩĩmanyĩsya kyaũ twasũanĩa ũndũ Avalaamu watwʼĩkie mũnyanyae wa Ngai?

No kwĩthĩwa Avalaamu amanyie Ngai kwĩsĩla vala ve Semu. Kĩngĩ kyatethisye Avalaamu nĩ maũndũ ala weeyonee na metho make mavinda ala Ngai wamũsũvĩie e na andũ make. O naitũ no twĩke oou.—w16.02, ĩth. 9-10.

Naaũ meekĩie ilungu na mĩsoa Mbivilianĩ?

Myakanĩ ya 1200 ĩtina wa kũsyawa kwa Klĩsto Stephen Langton nĩweekĩie ilungu Mbivilianĩ. Aandĩki amwe ma Kĩyuti mambie kwĩkĩa mĩsoa Maandĩkonĩ ma Kĩevelania, na ĩndĩ Robert Estienne eekĩa mĩsoa Maandĩkonĩ ma Kĩkiliki myakanĩ ya 1501 nginya 1600.—wp16.2, ĩth. 14-15.

Ĩla Satani wamũtataa Yesũ nĩwĩthĩwa amũtwaie ĩkalũnĩ?

Tũyamba kwasya ĩĩ vyũ. Kwosana na ĩandĩko ya Mathayo 4:5 na Luka 4:9, Yesũ no ethĩwe eekie kwona woni kana akethĩwa aendie kũũngama vandũ vatũlu ĩkalũnĩ.—w16.03, ĩth. 31-32.

Ũtavanyʼa witũ ũilyĩ ĩmwe ata?

Ĩmwe yũmbanaa o kavola, na nĩyĩsanzamũkasya syĩndũ, na yĩkaitetheesya iikome. Ĩmwe nĩ ũathimo Ngai ũtũnengete. (Kũt. 33:13) Ũtavanyʼa wa athũkũmi onthe ma Yeova wĩthĩawa ũilyĩ o ta ĩmwe.—w16.04, ĩth. 4.