No Ũlilikane?

Nũsomete nesa makaseti ma Mũsyaĩĩsya ala mela kuma? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Ĩla ana-a-asa ta asyaĩĩsya ma mũthyũlũlũko na atumĩa ma kĩkundi meeaĩwa maũndũ mana nĩ ũseũvyo wa Ngai maĩle kwĩka ata?

Maĩle kwĩthĩwa me ewi. Nũseo makekũlya-ĩ, ‘Nyie nĩnĩthangaasya Aklĩsto ala angĩ maendeee kwĩkala malũmanĩtye na Yeova? Nyie nĩnĩtĩkĩlaa na mĩtũkĩ mwolooto na ũtethyo ũla ngũnengwa?’—w16.11, ĩth. 11.

Aklĩsto ma wʼo matavĩtwe nĩ Mbaviloni ĩndĩĩ?

Mataviwe kavinda kakuvĩ ĩtina wa kĩkwʼũ kya atũmwa. Kuma ĩvinda yĩu andũ nĩmambĩĩe kũnengwa ivĩla katĩ wa ana-a-asa. Ĩkanisa na Silikalĩ nĩsyatumie ndũũ na syakwata mbau Aklĩsto ala makaĩĩte mũĩkĩĩo, na vai mũndũ weethukĩĩasya ũvoo ũla Aklĩsto ala maelekanĩtwʼe na nganũ methĩwa maĩ nawʼo. Myaka mĩongo ĩana ũna tũtavikĩte mwaka wa 1914, etĩkĩwʼa mauta nĩmambĩĩe kũkombowa kuma Mbaviloni Ĩla Nene.—w16.11, ĩth. 23-25.

Nĩkĩ wĩa wa Lefèvre d’Étaples waĩ wa vata mũno?

Myakanĩ ya 1520 aalyũlile Mbivilia kwa kĩthyomo kya French nĩ kana atetheesye andũ ma kĩlasi kya nthĩ maelewe Ndeto ya Ngai. Nzĩa yake ya kũelesya Maandĩko nĩyatetheeisye Martin Luther, William Tyndale, na John Calvin.—wp16.6, ĩth. 10-12.

Kĩvathũkanyʼo kya “kũlilikana kwa mwĩĩ” na “kũlilikana kwa Veva” nĩ kĩva? (Alo. 8:6)

Ũla ũlilikanaa maũndũ ma mwĩĩ endaa mũno kwĩanĩsya mawendi ma mwĩĩ wake wĩ na naĩ. Atindĩaa kũmaneenea, na nũmakumasya. Ũla ũlilikanaa maũndũ ma veva ekaa maũndũ mosanĩte na kwenda kwa Ngai na mosũanĩo make. Aekaa kĩlĩko kyake kĩtongoewʼe na kĩisumbĩkwa nĩ veva mũtheu. Ũathimo wa kwĩka ũu nĩ thayũ wa tene na tene na mũuo. Ũla ũlilikanaa maũndũ ma mwĩĩ akethaa kĩkwʼũ.—w16.12, ĩth. 15-17.

Nzĩa imwe sya kũolanga mawĩmakĩo nĩ syĩva?

Vangĩĩa maũndũ ala ma vata mbee, vangĩĩa kĩla ũtonya kwĩanĩsya, kĩla mũthenya vangĩĩa ĩvinda ya kũthyũmũa, tanĩa wũmbi wa Ngai, ĩkalaa wĩ mũtanu, ĩkaa masoesi ũte kũtĩĩa, na komaa ũkeanyʼa too.—w16.12, ĩth. 22-23.

“Enoku nĩwambatiwʼe ndakone kĩkwʼũ.” (Aevl. 11:5) Ata?

Nĩvatonyeka Ngai akethĩwa eekie kyama Enoko akwʼa o kavola ateũmanya.—wp17.1, ĩth. 12-13.

Nĩkĩ wĩnyivyo nĩ wa vata o na ũmũnthĩ?

Mũndũ wĩ wĩnyivyo nĩwĩthĩawa eyĩsĩ nesa, na nũmanyaa maũndũ ala ũtatonya vamwe na maũndũ ala ũtathĩwe kwĩka. Nĩtwaĩle kũnenga ndaĩa ala angĩ na kũmakua nesa na tũyaĩle kwona ta twĩ ma vata mũno.—w17.01, ĩth. 18.

Twĩsĩ ata kana nzama ĩla yaĩ ĩvinda ya atũmwa nĩyatongoewʼe nĩ Ngai o tondũ ũtongoesye ala me nthĩnĩ wa Nzama Ĩla Ĩtongoesye ũmũnthĩ?

Ala maĩ nzamanĩ ĩsu nĩmatetheeiwʼe nĩ veva mũtheu kũelewa ũwʼo wa Maandĩko. O na ĩngĩ nĩmatetheeiwʼe mũno nĩ alaĩka kũũngamĩa wĩa wa kũtavanyʼa, na nĩmaekaa Ndeto ya Ngai ĩmatongoesye. Ũu nowʼo vailyĩ o na ũmũnthĩ.—w17.02, ĩth. 26-28.

Nĩ kyaũ kĩtumaa tũtala wovosyo ta mũthĩnzĩo wa vata?

Nũndũ wa maũndũ aa ana: Ũla waũnenganie, nĩkĩ waũnenganie, nĩ kyaũ weeyĩimie nĩ kana aũnengane, na vata ũla weanĩisye. Nĩtwaĩle kũvindĩĩsya ũndũ maũndũ asu onthe matetheeisye ũndũnĩ ũsu.—wp17.2, ĩth. 4-6.

Mũklĩsto nĩwaĩle kũsenzya ũtwi amina kũwĩka?

Nĩtwaĩle kwĩanĩsya kĩla twatwʼa. Ĩndĩ ve mavinda tũtonya kwĩthĩa nũseo tũkasũanĩa ĩngĩ ũtwi mũna twĩkĩte. Ĩla Ngai woonie andũ ma Nineva nĩmeelila na methyũũa, nĩwavĩndũie ũtwi wake. No twĩke ũu ĩla maũndũ maitũ mavĩndũka, kana twakwata ũvoo tũteĩ nawʼo.—w17.03, ĩth. 16-17.

Nĩkĩ kũneenea angĩ naĩ nĩ kũthũku mũno?

Nĩkũtonya kwimbya maũndũ. Wĩthĩwe wĩ mũvĩtĩsye kana ndwĩ mũvĩtĩsye, kũneenea angĩ naĩ kũyĩsa kwaĩlya maũndũ.—w17.04, ĩth. 21.