Tavanyʼa Ũvoo Mũseo wa Mumo wa Ngai

1, 2. Mũtũmwa Vaulo oonanisye ata kana nĩwatũngaa mũvea nũndũ wa mumo wa Ngai?

MŨTŨMWA Vaulo aisye ũũ kuma ngoonĩ: “Mũmo wake [Ngai] nanengiwe ndwaĩ wa mana.” (Soma 1 Akolintho 15:9, 10.) Nũndũ Vaulo nĩwathĩnĩtye Aklĩsto tene, nĩweesĩ nesa kana nde ũndũ wathũkũmĩĩte tei wa Ngai, o na tei ũsu wa Ngai ndwamwaĩle.

² Vaulo akilyĩ kũkwʼa aandĩkĩie Timotheo ũũ: “Nĩmũtũngĩa mũvea ũla wandonyethisye, nake nĩ Klĩsto Yesũ Mwĩaĩi waitũ, nũndũ nĩwandalile kwĩthĩwa na kĩthito akĩndwʼa wa kũmũthũkũma.” (1 Tim. 1:12-14) Anengetwe ũthũkũmi wĩva? Vaulo nĩwawetie ũthũkũmi ũsu nĩ wĩva. Atavisye atumĩa ma kĩkundi kya Eveso ndeto ii: ‘Ndiũtala thayũ wakwa ta kĩndũ kwakwa, nĩ kana nĩtonye kwĩanĩsya mũendo wakwa, na ũthũkũmi ũla noosie kwa Mwĩaĩi Yesũ, kũkũsĩĩa ũla ũvoo mũseo wa mumo wa Ngai.’—Meko 20:24.

3. Nĩ ũthũkũmi wĩva wa mwanya wanengetwe Vaulo? (Sisya visa ĩthangũnĩ ya 26.)

³ Nĩ “ũvoo mũseo” wĩva Vaulo watavanasya ũla woonanasya mumo wa Yeova? Eeie Aklĩsto ma Eveso atĩĩ: “Nĩmwĩwʼĩte ũvoo wa walanʼyo wa mumo wa Ngai ũla nanengiwe kwondũ wenyu.” (Aev. 3:1, 2) Vaulo anengetwe kĩanda kya kũtavya andũ ala mataĩ Ayuti ũvoo mũseo nĩ kana o namo meĩthĩwa na Klĩsto Ũsumbĩnĩ wa Masia. (Soma Aeveso 3:5-8.) Nũndũ wa kĩthito kĩla Vaulo waĩ nakyo ũthũkũminĩ wake, we nĩwatiĩe Aklĩsto ma ũmũnthĩ ngelekanyʼo nzeo na oonanyʼa kana mumo ũla woonetwʼe nĩ Ngai “ndwaĩ wa mana.”

MUMO WA NGAI NŨKŨTHANGAASYA?

4, 5. Nĩkĩ tũtonya kwasya kana ‘ũvoo mũseo wa Ũsumbĩ’ nowʼo ũvoo mũseo wa “mumo wa Ngai”?

⁴ Ĩvindanĩ yĩĩ ya mũminũkĩlyo andũ ma Yeova nĩmanengetwe wĩa wa kũtavanyʼa “ũvoo ũũ mũseo wa ũsumbĩ . . . nthĩ yonthe wĩthĩwe ũkũsĩ kwa mbaĩ syonthe.” (Mt. 24:14) Ũvoo ũla tũtavanasya o nawʼo nĩ “ũvoo mũseo wa mumo wa Ngai” nũndũ moathimo onthe ala tweteele kwĩsa kũkwata tũsumbĩkĩtwe nĩ Ũsumbĩ wa Ngai, tũkamakwata no ũndũ wa mumo wa Yeova kwĩsĩla vala ve Klĩsto. (Aev. 1:3) We nũtavanasya na kĩthito ta Vaulo nĩ kana wonanyʼe nũũtũnga mũvea nũndũ wa mumo wa Yeova?—Soma Alomi 1:14-16.

⁵ Ĩsomo ĩvĩtu nĩyĩtũtetheesye kũmanya ũndũ ithyĩ ta twĩ eki ma naĩ tũtethekaa kwa nzĩa syĩ kĩvathũkanyʼo nũndũ wa mumo wa Yeova. Nũndũ wa kĩtumi kyu, twĩ na kĩanda kya kwĩkĩa kĩthito ũndũ tũtonya nĩ kana tũtavye andũ ala angĩ ĩũlũ wa wendo wa Yeova na kũmonyʼa ũndũ matonya kũtetheka nĩwʼo. Nĩ maũndũ amwe meva makonetye mumo wa Ngai ala twaĩle kũtetheesya angĩ matũngae mũvea kwondũ wamo?

TAVANYʼA ŨVOO MŨSEO ĨŨLŨ WA NTHEMBO YA WOVOSYO

6, 7. Nĩkĩ tũtonya kwasya kana ĩla tũũtavya angĩ ĩũlũ wa wovosyo twĩthĩawa tũitavanyʼa ũla ũvoo mũseo wa mumo wa Ngai?

⁶ Andũ aingĩ ala mekalĩte nthĩ ĩno mekaa ũndũ mekwenda na kwoou mayonaa kwĩka naĩ ta ũndũ, na nũndũ wa ũu mayĩsĩ vata wa wovosyo. Ĩndĩ kwĩ angĩ aingĩ mesĩte kũmanya kana kwĩka o ũndũ mo mekwenda kũyĩsa kũmaetee ũtanu wa wʼo. Mesa kũneena na Ngũsĩ sya Yeova nowʼo mamanyaa naĩ nĩ kyaũ, ĩtumĩte tũkwatwa nĩ mathĩna meva, na tũtonya kwĩka ata tume ũkombonĩ wa naĩ. Ala me na ngoo nthalĩku nĩmewʼaa mũyo ĩla mamanya kana nũndũ Yeova nũtwendete mũno na e mumo mwingĩ, nĩwatũmie Mwana wake kũũ nthĩ atwovosye kuma ũkombonĩ wa naĩ na kĩkwʼũ.—1 Yoa. 4:9, 10.

⁷ Vaulo aandĩkie ũũ aiweta Mwana mwendwa wa Yeova: “Nthĩnĩ wake [Yesũ] twĩ na wovosyo witũ kwondũ wa nthakame yake, ũekeo wa mavĩtyo maitũ, kwĩanana na ũthwii wa mumo wake [Yeova].” (Aev. 1:7) Nthembo ya Klĩsto ya wovosyo nĩwʼo ũĩkĩĩthyo ũla mũnene vyũ wa kana Ngai nũtwendete, na nĩ wonanyʼo mũseo wa ũndũ wĩ mumo wingĩvĩte. Nĩ ũndũ wa kũkiakisya kũmanya kana tweethĩwa na mũĩkĩĩo nthĩnĩ wa nthakame ya Yesũ ĩla yetĩkiwʼe, naĩ sitũ ikaekewa na wasya witũ wa ngoo ũkathewʼa! (Aevl. 9:14) We ndũkwona ũsu nĩ ũvoo mũseo twaĩle kũũtavya angĩ?

TETHEESYA ANDŨ METHĨWE NA NGWATANĨO NZEO NA NGAI

8. Nĩkĩ andũ maĩle kwĩwʼanĩthwʼa na Ngai?

⁸ Twĩ na kĩanda kya kũtetheesya andũ ala angĩ mamanye kana no methĩwe na ngwatanĩo nzeo na Mũmbi woo. Andũ matanamba kwĩthĩwa na mũĩkĩĩo nthĩnĩ wa nthembo ya Yesũ, Ngai amosaa ta amaitha make. Mũtũmwa Yoana aandĩkie atĩĩ: “Ũla wĩtĩkĩlaa [kana, ũmũĩkĩĩaa] ũ Mwana e na thayũ ũtathela; ĩndĩ ũla ũtamwĩtĩkĩlaa Mwana ndakona thayũ, ĩndĩ ũthatu wa Ngai wĩkalaa ĩũlũ wake.” (Yoa. 3:36) Ĩndĩ ũndũ wa kwendeesya nĩ kana nthembo ya Klĩsto nĩtumaa twĩwʼanĩthwʼa na Ngai. Vaulo aisye atĩĩ: “Inywʼĩ, mwekalĩte ĩvinda ya tene mũte na wĩwʼano na mwĩ amaitha ilĩkonĩ syenyu na mĩkĩlenĩ yenyu mĩthũku, ĩndĩ yu nũmwĩwʼĩthanĩtye na mwĩĩ wake [Yesũ] wa nyama kwondũ wa kũkwʼa.”—Ako. 1:21, 22.

9, 10. (a) Klĩsto anengie ana-a-asa make etĩkĩwʼa mauta kĩanda kĩva? (b) Ala “malondu angĩ” matetheeasya ana-a-asa moo etĩkĩwʼa mauta ata?

⁹ Klĩsto nũnengete ana-a-asa make etĩkĩwʼa mauta ala me vaa ĩũlũ wa nthĩ kĩla Vaulo wĩtĩte “ũthũkũmi wa wĩwʼanĩthyo.” Vaulo nĩwaeleisye kyu nĩ kyaũ ĩla waandĩkĩe Aklĩsto etĩkĩwʼa mauta ma ĩvinda ya atũmwa ndeto ii: “Ĩndĩ maũndũ onthe nĩ ma Ngai, ũla watwĩwʼanĩthye nake mwene kwondũ wa Klisto, na watũnengie ũthũkũmi wa wĩwʼanĩthyo; nawʼo nĩ ũũ, Ngai aĩ nthĩnĩ wa Klĩsto, aimĩwʼanĩthya nthĩ nake Klĩsto, aimĩwʼanĩthya nthĩ nake mwene, ateũmatalĩla andũ mavĩtyo moo, na nũtwĩkĩĩte nthĩnĩ waitũ ĩla ndeto ya kwĩwʼanĩthya. Na ĩndĩno twĩ atũmwa kwondũ wa Klĩsto, o ta Ngai ũnũkwĩsũvanĩla kwitũ: Nĩtũũmwĩsũva kwondũ wa Klisto, mwĩwʼanĩthwʼe na Ngai.”—2 Ako. 5:18-20.

¹⁰ Ala “malondu angĩ” monaa ne kĩanda kya mwanya kũtetheesya ana-a-asa moo etĩkĩwʼa mauta wĩanĩ wa kũtavanyʼa. (Yoa. 10:16) Na nũndũ no twasye nĩmathũkũmaa ta atũmwa kwondũ wa Klĩsto, nĩmo matethasya wĩa ũla mwingĩ nthĩnĩ wa kũmanyĩsya andũ ũwʼo na kũmatetheesya methĩwe na ngwatanĩo nzeo na Yeova. Kĩu nĩ kĩlungu kya vata wĩanĩ wa kumya ũkũsĩ ĩũlũ wa ũvoo mũseo wa mumo wa Ngai.

TAVANYʼA ŨVOO MŨSEO WA KANA NGAI NĨWĨTHUKĨĨASYA MBOYA

11, 12. Nĩkĩ tũtonya kwasya nĩ ũvoo mũseo kũmanyĩsya andũ kana no mamũvoye Yeova?

¹¹ Andũ aingĩ mavoyaa nũndũ mavoya nĩmewʼaa mausya, ĩndĩ maiĩkĩĩaa kana Ngai nĩwĩwʼaa mboya syoo. Nĩmaĩlĩte kũmanya kana Yeova nĩwe “ũla wĩwʼaa mboya.” Mũandĩki wa Savuli, Ndaviti, aandĩkie: “We ũla wĩwʼaa mboya, mĩĩ yonthe ĩkooka kwaku. Mothũku nĩmangĩlasya vinya: ũkaekea mavĩtyo maitũ.”—Sav. 65:2, 3.

¹² Yesũ atavisye amanyĩwʼa make ũũ: “Ethĩwa mũkavoya ũndũ o na wĩva syĩtwanĩ yakwa, ngawĩka.” (Yoa. 14:14) Vate nzika, “ũndũ o na wĩva” ũla ũwetetwe vau nĩ ũndũ wʼonthe ũla wosanĩte na kwenda kwa Yeova. Yoana aeleetye ũũ: “Ũũ nĩwʼo ũnyiau ũla twĩ nawʼo vala ũĩ, ethĩwa tũkavoya ũndũ kwĩanana na kwenda kwake, nũtwĩwʼaa.” (1 Yoa. 5:14) Nĩ ũndũ mũseo mũno kũmanyĩsya andũ kana mboya ti kĩndũ kya kũtuma kĩlĩko kĩusya, ĩndĩ nĩ nzĩa ya mwanya ya kũthengeea Yeova ‘kĩvĩlanĩ kyake kya ũsumbĩ kya mumo’! (Aevl. 4:16) Twamamanyĩsya kũvoya ũndũ vaĩle, kũvoya ũla waĩlĩte, na kũvoya kĩla kyaĩlĩte, tũkeethĩawa tũimatetheesya mamũthengeee Yeova na maikwata ũkiakisyo ĩvindanĩ ya thĩna.—Sav. 4:1; 145:18.

MUMO WA NGAI ĨVINDANĨ YA NTHĨ NZAŨ

13, 14. (a) Etĩkĩwʼa mauta makakwata ndaĩa yĩva ya mwanya ĩvinda yũkĩte? (b) Etĩkĩwʼa mauta makathũkũma andũ wĩa wĩva wa ũsengyʼo?

¹³ Mumo wa Yeova wĩendeea kwĩthĩwa kwʼo o na ĩtina wa nthĩ ĩno nthũku kwanangwa. Vaulo nĩwawetie ndaĩa ya mwanya ĩla Ngai ũnengete ala 144,000 manyuvĩtwe makasumbĩke na Klĩsto ĩtunĩ Ũsumbĩnĩ wake. Aandĩkie ũũ: “Ngai, nĩkwĩthĩwa aĩ na tei mwingĩ, nũndũ wa wendo wake mũnene ũla watwendie nawʼo, o na yĩla twaĩ akwʼũ kwondũ wa mavĩtyo maitũ, atũnengie thayũ vamwe na Klĩsto (nĩmũtangĩĩĩtwe nĩ mumo), naitũ nthĩnĩ wa Klĩsto Yesũ nĩwatũthayũũkisye vamwe nake, na kũtwĩkalya nthĩ vamwe nake ĩtunĩ: nĩ kana mavinda ala mokĩte atonye kwonanʼya ũthwii mwingĩ wa mumo wake kwondũ wa ũseo wake kwitũ nthĩnĩ wa Klĩsto Yesũ.”—Aev. 2:4-7.

¹⁴ Ti laisi kũsũanĩa maũndũ ma ũsengyʼo ala Yeova wiĩe Aklĩsto etĩkĩwʼa mauta ĩla makethĩwa masumbĩkĩte na Klĩsto ĩtunĩ. (Luka 22:28-30; Avi. 3:20, 21; 1 Yoa. 3:2) Aklĩsto asu nĩmo mũno mũno makonwʼa nĩ Yeova “ũthwii mwingĩ wa mumo wake.” Nĩmo makethĩwa “Yelusaleme mweũ,” mũtwawa wa Klĩsto. (Ũvu. 3:12; 17:14; 21:2, 9, 10) Makatetheanĩsya na Yesũ wĩanĩ wa “kũvosya mbaĩ” ĩla makethĩwa mayoneleelya ala ewi kĩla kĩtonya kũmathũmũsya mũio wa naĩ na kĩkwʼũ nĩ kana mekale mate na naĩ.—Soma Ũvuanʼyo 22:1, 2, 17.

15, 16. Ĩvindanĩ yũkĩte Yeova akoonyʼa ata “malondu angĩ” mumo wake?

¹⁵ Ĩandĩko ya Aeveso 2:7 yaĩtye kana Ngai nũkonanyʼa mumo wake “mavinda ala mokĩte,” kana kwa ndeto ingĩ, nthĩ nzaũ. Vate nzika, nthĩ nzaũ kũkeethĩwa “ũthwii mwingĩ wa mumo” wa Yeova. (Luka 18:29, 30) Ũndũ ũmwe mũnene Yeova ũkeka vaa ĩũlũ wa nthĩ onanyʼe kana e ũseo mwingĩ nĩ kũthayũũkya andũ kuma “Seoli.” (Yovu 14:13-15; Yoa. 5:28, 29) Andũ aĩkĩĩku ma tene ala makwie Klĩsto ataumĩtye nthembo yake, vamwe na “malondu angĩ” ala makwʼa me aĩkĩĩku ĩvindanĩ yĩĩ ya mũminũkĩlyo, makathayũũkwʼa maendeee kũmũthaitha Yeova.

¹⁶ O na andũ milioni mbingĩ ala makwie matamwĩsĩ Ngai makathayũũkwʼa. Makanengwa mwanya wa kwĩnyivĩsya ũsumbĩki mũnene wa Yeova. Yoana aandĩkie ũũ: “Na noona akwʼũ, anene na anini, maũngeme mbee wa kĩvĩla kyu kyeũ; na mavuku mavuanwʼa: na ĩvuku yĩngĩ yavuanwʼa, nayo nĩ ĩvuku ya thayũ: na ala akwʼũ masilĩlwa na maũndũ ala maandĩkĩtwe mavukunĩ asu, kwĩanana na meko moo. Na ũkanga waumya akwʼũ ala maĩ nthĩnĩ wawʼo; na kĩkwʼũ na [Mbũa] syaumya akwʼũ ala maĩ nthĩnĩ wasyo: na masilĩlwe kĩla mũndũ kwĩanana na meko make.” (Ũvu. 20:12, 13) Vate nzika, ala makathayũũkwʼa makeethĩwa mayendeka mamanye ũndũ maĩle kũatĩĩa myolooto ya Ngai ĩla yĩ Mbivilianĩ. O na eka ũu, makeethĩwa no nginya maatĩĩe motao meũ ala me ala “mavukunĩ.” Mavuku asu makethĩwa maeleetye ũndũ Yeova ũkwenda andũ mekale me nthĩnĩ wa nthĩ nzaũ. Kũvuanwʼa kwa maũndũ ala me mavukunĩ asu kũkeethĩwa kwĩ wonanyʼo ũngĩ wa mumo wa Yeova.

ENDEEA KŨTAVANYʼA ŨVOO MŨSEO

17. Nĩ kyaũ twaĩle kwĩkalaa tũlilikene ĩla tũũtavanyʼa?

¹⁷ O ũndũ mũminũkĩlyo ũthengeee, nowʼo twĩ na vata mũnene wa kũtavanyʼa ũvoo mũseo wa Ũsumbĩ! (Mko. 13:10) Vate nzika, ũvoo mũseo wonanasya kana Yeova e mumo. Twaĩle kũlilikanaa kyu ĩla tũũtavanyʼa. Kĩeleelo kitũ ĩla tũũtavanyʼa nĩ kũmũtaĩa Yeova. No twĩke ũu kwa kũtavya andũ kana mawatho ala twathĩtwe ĩla twĩlika nthĩ nzaũ nĩ wonanyʼo wa ũseo wa Yeova.

18, 19. Tũkumasya mumo ũla Yeova wĩ nawʼo ata?

¹⁸ Ĩla tũũtavya angĩ ũvoo no tũmaelesye kana ungu wa Ũsumbĩ wa Klĩsto, andũ makakwata moathimo onthe ala maetawe nĩ nthembo ya wovosyo na kana makavetewa naĩ kavola kwa kavola. Mbivilia yaĩtye atĩĩ: “Syũmbe nasyo ikathawʼa kuma ũkombonĩ wa wanangĩko, kũlika ũthasyonĩ wa ũtaĩo wa syana sya Ngai.” (Alo. 8:21) Keka ti ũseo wa Yeova ũndũ ũsu ndũtonyeka.

¹⁹ Twĩ na kĩanda kya mwanya kya kũtavya andũ onthe ala matonya kwĩthukĩĩsya watho ũũ mũseo ki wĩ ĩandĩkonĩ ya Ũvuanʼyo 21:4, 5: “[Ngai] akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee nĩ mavĩtu.” Na Yeova, ũla wĩkalĩte kĩvĩlanĩ kya ũsumbĩ, aĩtye, “Sisya, nĩngũtwʼa maũndũ onthe meũ.” Ongelete kwasya, “Andĩka: nĩkwĩthĩwa ndeto ii nĩ sya kĩthito na nĩ sya wʼo.” Ĩla twatavya angĩ ũvoo mũseo na kĩthito, twĩthĩawa tũikumya mumo ũla Yeova wĩ nawʼo!