“Ndyaĩ Naanengwa Mũthĩnzĩo Ũseũvĩte Ũu”

Ndeto isu syaneeniwe nĩ kelĩtu ka myaka 13 ĩtina wa kũnengwa kakitĩ ta mũthĩnzĩo. Nake mũndũ mũka ũngĩ wĩkĩte maendeeo maũndũnĩ ma viasala aisye kana kombyũta ĩla wanengiwe nĩ ĩthe e sukulu yaĩ mũthĩnzĩo watumie maũndũ make maseũva. Na mũndũũme wĩla kũtwaana o mĩtũkĩ aisye kana mũthĩnzĩo ũla mũseo vyũ waanengwa waĩ kaati waseũvĩiwʼe nĩ kĩveti kyake kwondũ wa mũthenya wa kũtanĩa mwaka woo wa mbee kuma matwaana.

Kĩla mwaka, andũ aingĩ nĩmatũmĩaa ĩvinda yoo na vinya woo maimantha mũthĩnzĩo ũla “mũseo vyũ” manenge anyanyae kana andũ ma mũsyĩ ĩla me na ũndũ wa mwanya mekwĩka. Na andũ aingĩ no mende kwĩwʼa ndeto ta ila syaneenwa mwambĩĩonĩ wa kĩlungu kĩĩ. Nao nata ĩũlũ waku? No wende kũnengane kana kũnengwa mũthĩnzĩo ũkwoneka wĩ wa vata?

Ũndũ ũsu no wĩthĩwe wĩ wa kwendeesya mũno nũndũ no ũtanĩthye ũla wanengwa mũthĩnzĩo na ũla waũnengane. O na nĩkyo kĩtumi Mbivilia yaĩtye atĩĩ: “Kwĩ mũyo kũnengane kwĩ kwosa.” (Meko ma Atũmwa 20:35) Kwa wʼo, ũtanu ũla mũndũ ũkwataa nũndũ wa kũnengane no wongelekeele ethĩwa ũla wanewa nĩwoonanyʼa kana nĩwendeewʼa nĩ kĩla wanengwa.

Kwoou, ũtonya kwĩka ata nĩ kana mũthĩnzĩo waku ũkũtanĩthye na ũitanĩthya ũla wanenga? Na ethĩwa ndũtonya kũnengane mũthĩnzĩo “mũseo vyũ,” ũtonya kwĩka ata nĩ kana mũthĩnzĩo waku wendeesye ũla wanenga?