Mũthĩnzĩo Ũte Maela

KĨMWANA kĩtawa Jordan kĩkwete kamasinĩ ka kwasũvya venzoo kailyĩ ta meli. Mũndũ asyaĩtye kamasinĩ kau no asye kai na vata mũnene. Ĩndĩ Jordan akonaa ke ka vata mũno vyũ. Aĩtye ũũ: “Russell, ũla waĩ mũkũũ na waĩ mũnyanya wa mũsyĩ witũ nĩwe wanengie mũthĩnzĩo ũsu ĩla naĩ mũnini.” Ĩla Russell wakwie, Jordan nĩwamanyie ũndũ wa vata mũno. Amanyie kana asyai make na ũmae nĩmatethiwʼe mũno nĩ Russell na nĩwamakiakiasya mavindanĩ ala me na mathĩna. Jordan ongelete kwasya ũũ: “Yu nũndũ nĩnĩmanyĩte maũndũ maingĩ ĩũlũ wa Russell, ngoonaa mũthĩnzĩo ũũ mũnini wanengie wĩ wa vata vyũ kwĩ ũndũ nĩnawonaa.”

Kwosana na ngelekanyʼo ĩsu ya Jordan, mũthĩnzĩo no woneke ũte wa vata nĩ andũ angĩ. Ĩndĩ mũndũ ũla wanengwa mũthĩnzĩo ũsu no awone wĩ kĩndũ kya vata mũno vyũ, na kya thooa mũnene mũno. Mbivilia nĩeleetye ĩũlũ wa mũthĩnzĩo wa vata mũno vyũ nthĩnĩ wa ndeto ii syĩsĩkĩe mũno: “Nũndũ Ngai nĩwendete nthĩ, nĩwanenganie Mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.”—Yoana 3:16.

Ũsu nĩ mũthĩnzĩo ũtonya kũtuma ũla waũnengwa akwata thayũ ũtathela! Nĩvethĩwa ve mũthĩnzĩo ũngĩ mũnene ta ũsu? O na kau aingĩ no methĩwe matesĩ vata wa mũthĩnzĩo ũsu, Aklĩsto ma wʼo nĩmesĩ nesa kana ũsu nĩ mũthĩnzĩo wa “thooa mũnene” kana wa vata mũno. (Savuli 49:8; 1 Vetelo 1:18, 19) Ĩndĩ nĩkĩ Ngai waumisye thayũ wa Mwana wake wĩthĩwe mũthĩnzĩo kwondũ wa andũ?

Mũtũmwa Vaulo nũeleetye nĩkĩ Ngai weekie ũu ndetonĩ ii: “Nũndũ wa mũndũ ũmwe naĩ yalikile kũũ nthĩ, na kĩkwʼũ kwondũ wa naĩ; na kwa ũu kĩkwʼũ kyavikĩa andũ onthe, nĩkwĩthĩwa onthe nĩmeekie naĩ.” (Alomi 5:12) Mũndũ wa mbee, Atamu, amũvĩtĩisye Ngai o esĩ na nũndũ wa ũu atwʼĩĩwa kũkwʼa. Kwĩsĩla Atamu, ũsyao wake wʼonthe nĩwakwatiwe nĩ kĩkwʼũ.

Mbivilia yaĩtye atĩĩ: “Ĩtuvi ya naĩ nĩ kĩkwʼũ; ĩndĩ mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.” (Alomi 6:23) Nĩ kana Ngai ovosye andũ kuma ũkombonĩ wa kĩkwʼũ, atũmie Mwana wake, Yesũ Klĩsto, nĩ kana aumye thayũ wake mwĩanĩu kwondũ wa andũ. Kwĩsĩla nthembo ĩsu ya “wovosyo,” onthe ala mamũĩkĩĩaa Yesũ Klĩsto makakwata thayũ ũtathela.—Alomi 3:24.

Vaulo aineenea ĩũlũ wa moathimo maingĩ ala Ngai ũnengae athaithi make kwĩsĩla Yesũ Klĩsto, aisye atĩĩ: “Ngai natũngĩwe mũvea kwondũ wa mũthĩnzĩo wake ũtaweteka.” (2 Akolintho 9:15) Wovosyo nĩ mũthĩnzĩo mũseo mũno ũkethĩa tũitonya kũũeleekya nesa. O na kau ve o mĩthĩnzĩo ĩngĩ Ngai ũnengete andũ, nĩkĩ wovosyo nĩwʼo mũthĩnzĩo ũla wa vata vyũ? Nĩ kwa nzĩa yĩva mũthĩnzĩo ũsu wĩ kĩvathũkanyʼo vyũ na mĩthĩnzĩo ĩla ĩngĩ Ngai ũnengete andũ?a Na twaĩle kwona mũthĩnzĩo ũsu ata? Nĩtũũkũthokya ũsome mosũngĩo ma makũlyo asu kuma Mbivilianĩ ilungunĩ ilĩ ila iatĩĩe.