Mũthĩnzĩo Ũla Mũseo Vyũ Nĩ Wĩva?

“Kĩla kũnengwa kũseo na kĩla kũnengwa kwĩthĩanu nĩkumaa ĩũlũ, kũtheeaa kuma kwa Ĩthe wa syeni.” (Yakovo 1:17) Ĩandĩko yĩu yĩelesya ĩũlũ wa ũlau wa Ĩthe witũ wa ĩtunĩ, Yeova Ngai. Ĩndĩ katĩ wa mĩthĩnzĩo ĩla Ngai ũnengete andũ, ve ũmwe mũnene vyũ kwĩ yonthe. Mũthĩnzĩo ũsu nĩ wĩva? Ndeto sya Yesũ ila syĩsĩkĩe mũno ĩandĩkonĩ ya Yoana 3:16, syaĩtye atĩĩ: “Ngai nĩwendete nthĩ, nĩwanenganie Mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.”

Mũthĩnzĩo ũla Ngai watũnengie ĩla waumisye Mwana wake e ũmwe nĩwʼo mũthĩnzĩo ũla mũnene vyũ, nũndũ mũthĩnzĩo ũsu no ũtume tũthawʼa kuma ũkombonĩ wa naĩ, ũkũũ, na kĩkwʼũ. (Savuli 51:5; Yoana 8:34) O na tũkatata mũno wĩana ata, tũyĩsa kwĩyumya ũkombonĩ ũsu. Ĩndĩ nũndũ Ngai nũtwendete mũno, nĩwatũnengie kĩla kyendekaa nĩ kana tũthawʼe kuma ũkombonĩ ũsu. Ĩla Yeova Ngai wanenganie Mwana wake e ũmwe, Yesũ Klĩsto, ethĩwe wovosyo, nĩwatumie andũ ala ewi methĩwa na wĩkwatyo wa kũkwata thayũ ũtathela. Ĩndĩ ĩkũlyo nĩ, Wovosyo nĩ kyaũ? Nĩkĩ wovosyo nĩ wa vata? Na tũtonya kũtetheka ata kumana nawʼo?

Wovosyo nĩ thooa ũla ũĩvawa kwondũ wa kĩndũ kyaĩte kana kwondũ wa kũthasya mũndũ kuma ũkombonĩ. Mbivilia ĩeleasya kana asyai maitũ ma mbee, Atamu na Eva, moombĩtwe mate na naĩ, na maĩ matanĩe thayũ ĩũlũ wa nthĩ tene na tene vamwe na ũsyao woo. (Mwambĩlĩlyo 1:26-28) Ĩndĩ ũndũ wa kũmakya nĩ kana, nĩmaaisye maũndũ asu onthe ĩla matwie kũlea kũmwĩwʼa Ngai, na kwoou matwʼĩka ene naĩ. Kweethĩiwe ata ĩtina wa ũu? Mbivilia yaĩtye atĩĩ: “Nũndũ wa mũndũ ũmwe naĩ yalikile kũũ nthĩ, na kĩkwʼũ kwondũ wa naĩ; na kwa ũu kĩkwʼũ kyavikĩa andũ onthe, nĩkwĩthĩwa onthe nĩmeekie naĩ.” (Alomi 5:12) Vandũ va Atamu kũtiĩa ũsyao wake thayũ ũte na naĩ, aũtiĩe naĩ na kĩkwʼũ.

Nĩ kana wovosyo umwʼe, kĩla kĩĩvawa kyaĩle kwĩthĩwa kĩanene na kĩla kyaaiwʼe. Atamu nĩwavĩtisye ĩla waleile kũmwĩwʼa Ngai na ngũlũ, na kwoou aasya thayũ wake ũte na naĩ. Mbivilia ĩmanyĩasya kana naĩ ya Atamu nĩyatumie ũsyao wake ũlika ũkombonĩ wa naĩ na kĩkwʼũ. Kwoou, yaĩ no nginya mũndũ ũngĩ wĩ na thayũ ũte na naĩ, nake nĩ Yesũ, aumye thayũ wake nĩ kana tũthawʼe kuma ũkombonĩ ũsu. (Alomi 5:19; Aeveso 1:7) Nũndũ Ngai nĩwatwendie na aumya wovosyo, andũ me na wĩkwatyo wa kwĩsa kũtanĩa kĩla kyaaiwʼe nĩ Atamu na Eva, nakyo nĩ thayũ ũtathela ĩũlũ wa nthĩ nzaũ.—Ũvuanʼyo 21:3-5.

Kwosana na kĩla wovosyo wĩanĩasya, vai nzika kana nĩwʼo mũthĩnzĩo ũla mũnene vyũ kuma kwa Ngai, nũndũ ũkatuma andũ makwata thayũ ũtathela. Nĩ kana tũmanye ũndũ mũthĩnzĩo wa wovosyo wĩthĩawa wĩ ‘mwĩthĩanu’ kana wĩ mũseo, ekai twone ũndũ ala maũndũ tũneeneie kĩlungunĩ kĩvĩtu matũmĩiwe kwa kĩwango kĩnene nthĩnĩ wa kumya nthembo ya wovosyo. Maũndũ asu me kĩlungunĩ kĩvĩtu nĩ ala monanĩtye ũndũ twaĩle kwĩka nĩ kana tũnengae andũ mĩthĩnzĩo ĩtonya kũmendeesya.

Wovosyo nĩwĩanĩasya wendi witũ. Andũ mombĩtwe me na wendi mũnene wa kũendeea kwĩkala thayũ. O na kau tũitonya kwĩanĩsya wendi ũsu, wovosyo no ũtume wendi ũsu wĩanĩa. Mbivilia yaĩtye atĩĩ: “Nũndũ ĩtuvi ya naĩ nĩ kĩkwʼũ; ĩndĩ mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.”—Alomi 6:23.

Wovosyo nĩwĩanĩasya vata witũ. Andũ mayaĩ matonya kwĩnenga wovosyo. Mbivilia yaĩtye atĩĩ: “Wovosyo wa mathayũ moo wĩ thooa mũnene, ndũĩvĩka tene na tene.” (Savuli 49:8) Kwoou, twaĩ na vata mũnene wa kũtetheewʼa nĩ Ngai nĩ kana tũthawʼe kuma ũkombonĩ wa naĩ na kĩkwʼũ. Ĩndĩ “kwondũ wa wovosyo ũla wĩ nthĩnĩ wa Klĩsto Yesũ,” Ngai nĩwanenganie kĩla kyendekaa.—Alomi 3:23, 24.

Wovosyo waumiwʼe ĩvinda yĩla yaĩle vyũ. Mbivilia yaĩtye atĩĩ: ‘Yĩla twaĩ athe, Klĩsto nĩwakwie kwondũ witũ.’ (Alomi 5:8) Nũndũ wovosyo wanenganiwe “yĩla twaĩ athe,” nĩwaĩkĩĩthisye kana Ngai nũtwendete mũno o na kau twĩ na naĩ. Na wovosyo nũtumaa twĩthĩwa na wĩkwatyo wa kwĩsa kũtanĩa maũndũ maingĩ maseo ĩvinda yũkĩte, o na kau ĩvindanĩ yĩĩ no nginya tũmĩĩsye mathĩna ala matũkwataa nũndũ wa naĩ.

Wovosyo wonanasya kana Ngai aĩ na kĩeleelo kĩseo vyũ. Mbivilia nĩyĩeleetye kĩla kyatumie Ngai aumya Mwana wake ta wovosyo. Yaĩtye atĩĩ: “Ũndũnĩ ũũ wendo wa Ngai nĩwonanĩtwʼe kwitũ, nũndũ Ngai nĩwamũtũmie Mwana wake kũũ nthĩ, ũla wasyaiwe e ũmwe, nĩ kana twĩthĩwe na thayũ kwondũ wake. Ũũ nĩwʼo wendo, ti ithyĩ twamwendie Ngai, ĩndĩ nĩwe watwendie ithyĩ.”—1 Yoana 4:9, 10.

Ũtonya kwonanyʼa ata kana nũtũngaa mũvea kwondũ wa mũthĩnzĩo ũla mũnene vyũ? Lilikana kana ndeto sya Yesũ ĩandĩkonĩ ya Yoana 3:16 syonanĩtye kana no ũla “ũmwĩtĩkĩlaa [kana, ũmũĩkĩĩaa]” ũkatangĩĩwa. Kwosana na Mbivilia, mũĩkĩĩo nĩ “kĩla kĩmanyĩthasya vyũ maũndũ ala mekwatĩtwʼe.” (Aevelania 11:1) Nĩ kana twĩthĩwe na ũĩkĩĩthyo ũsu, nĩtwaĩle kwĩthĩwa na ũmanyi wa wʼo. Kwoou, wĩkũlwʼa wĩmanyĩsye ĩũlũ wa Yeova Ngai, Mũnengani wa mũthĩnzĩo ũsu ‘mwĩthĩanu,’ na ũyĩmanyĩsya maũndũ ala waĩle kwĩka nĩ kana wĩtanĩa thayũ ũtathela ũla ũkethĩwa nũndũ wa nthembo ya wovosyo ya Yesũ.

No wĩmanyĩsye maũndũ asu onthe kwa kũsoma ũvoo wumĩte Mbivilianĩ ũla wĩ Kĩsesenĩ kya www.jw.org/kam. Ngũsĩ sya Yeova nĩmeũtanĩa kũũtetheesya wĩmanyĩsye. Twĩ na mũĩkĩĩo kana weemanyĩsya ĩũlũ wa mũthĩnzĩo ũsu mũnene na watetheka kumana nawʼo, ũkeethĩwa ũtonya kũneena ndeto ii: “Nĩmũtũngĩa Ngai mũvea nĩ ũndũ wa Yesũ Klĩsto Mwĩaĩi waitũ.”—Alomi 7:25.