Myolooto ya Mbivilia no Ĩtũtethye Ũmũnthĩ?

ANDŨ AMWE MAASYA NDĨSA KŨTŨTETHYA. Ndakĩtalĩ ũmwe oonanisye kana kũtũmĩa Mbivilia ĩtũtongoesye no ũndũ ũmwe na kũtũmĩa ĩvuku ya myaka ya 1920 kũmanyĩsya ĩsomo ya chemistry sukulu. Mũndũ ũtanengete Mbivilia ndaĩa no akũlye kana mũndũ no atũmĩe ĩvuku ya kombyũta ngũũ na ĩtatũmĩkaa yĩmwonyʼe ũndũ ũtonya kũtũmĩa kombyũta ya matukũ aa. Kwa ndeto o nguvĩ, andũ amwe monaa Mbivilia yavĩtiwe nĩ ĩvinda.

Ve vata mwaũ wa kũtũmĩa ĩvuku ya tene yĩũtongoesye ĩvindanĩ yĩĩ andũ matonya kũkwata maũvoo maingĩ nũndũ wa tekinolongyia? O na kwĩ isese mbingĩ sya Indaneti ila inengae andũ motao maingĩ na ma mĩtũkĩnĩ. Kwĩ ivĩndĩ sya televiseni ila syĩthĩawa na asomi na andũ angĩ meũnengane motao ĩũlũ wa ũndũ andũ matonya kwĩkala. O na nduka sya mavuku nithooasya mavuku ma kũnenga andũ motao, na kĩu nĩkĩtumaa ikwata mbesa mbingĩ.

Wasũanĩa ũndũ andũ matonya kũkwata ũvoo mwingĩ kĩla ndatĩka, ve vata mwaũ wa kũsoma Mbivilia, ĩvuku yaandĩkiwe myaka vakuvĩ 2,000 mĩvĩtu? Wĩona andũ ala matanengae Mbivilia ndaĩa ta methĩawa mavĩtĩtye mayasya kana kũtũmĩa ĩvuku ya tene mũno yĩtũtongoesye no ũndũ ũmwe na kũtũmĩa ĩvuku ya tene vyũ wĩmanyĩsye chemistry kana kombyũta ya ĩvinda yĩĩ? Ũwʼo nĩ kana mawoni asu ti maseo. Nĩkĩ tũkwasya ũu? Kwasũanĩa ĩkũlyo yĩĩ, O na kau maũndũ makonetye saenzi na tekinolongyia maalyũkaa mĩtũkĩ vyũ, mo maũndũ ala ma vata mũndũnĩ maaĩsa kũvĩndũka? Andũ nĩmethĩawa na wendi wa kũmanya nĩkĩ moombiwe, na nĩmendaa kwĩthĩwa na ũtanu na mũuo, kwĩkalanyʼa nesa na andũ moo ma mũsyĩ, na kwĩthĩwa na anyanya aseo.

O na ethĩwa Mbivilia nĩ ĩvuku ya tene, nĩneenete ĩũlũ wa maũndũ asu ma vata thayũnĩ wa mũndũ na maũndũ angĩ maingĩ. O na yaasya kana nĩveveewe nĩ Mũmbi witũ. Nĩyonanĩtye kana no ĩtũtongoesye maũndũnĩ onthe na kũtwonyʼa ũndũ tũtonya kwĩka o na twakwatwa nĩ thĩna ũilyĩ ata. (2 Timotheo 3:16, 17) O na eka ũu, Mbivilia nĩyonanĩtye kana ũtao wayo ndwĩsaa kũtiwa nĩ ĩvinda, na no ũtũmĩke mavinda onthe! Mbivilia yaĩtye atĩĩ: “Ndeto ya Ngai ĩ thayũ.”—Aevelania 4:12.

Yo maũndũ asu Mbivilia yasyaa nĩ ma wʼo? Mbivilia nĩyavĩtiwe nĩ ĩvinda kana nĩyo ĩvuku yĩla yĩtonya kũtethya andũ? Ĩkaseti yĩĩ ya Mũsyaĩĩsya nĩyĩũkũtetheesya ũkwate mosũngĩo ma makũlyo asu. O na nĩyĩkũatĩĩwa nĩ makaseti angĩ makethĩawa maneeneete ũndũ ũmwe umĩte Mbivilianĩ.