No Tũĩkĩĩe Kĩla Mbivilia Ĩwetete Ĩũlũ wa Ũla Ũseo na Ũla Ũthũku

Tũyĩsa kũĩkĩĩa vyũ kana motwi maitũ ĩũlũ wa mwĩkalĩle makeethĩawa me maseo, ethĩwa tũkamekaa tũsũanĩĩte ũndũ ithyĩ ene tũkwĩwʼa kana ũndũ ala angĩ mekwĩwʼa. Mbivilia nĩvuanĩtye nĩkĩ, ĩndĩ ti ũu wʼoka. Nĩyĩthĩawa na myolooto mĩseo ya mwĩkalĩle ĩtonya kũtũtethya na ĩkatuma twĩkala twĩ atanu.

NĨTWENDAA KŨTONGOEWʼA NĨ NGAI

Mbivilianĩ, Yeovaa Ngai nũeleetye kana endaa andũ mamwĩkwatye amatongoesye, ĩndĩ ti metongoesye mo ene. (Yelemia 10:23) Nĩkyo kĩtumi ũtũnengete myolooto ya mwĩkalĩle ĩla yĩ Mbivilianĩ. Nũtwendete na ndendaa twĩke motwi matonya kũtũũmĩsya na matonya kũtuma twĩsa kwĩlila. (Kũtũngĩlĩlwa Kwa Mĩao 5:29; 1 Yoana 4:8) O na ĩngĩ, e Mũmbi witũ, nĩ mũĩ vyũ na e ũmanyi mwingĩ ũtumaa atũnenga ũtao ũla mũseo vyũ ĩũlũ wa mwĩkalĩle. (Savuli 100:3; 104:24) Ĩndĩ ndesa kũtũthingʼĩĩsya tũatĩĩe myolooto yake.

Yeova nĩwanengie Atamu na Eva kyonthe kĩla maĩ na vata nakyo nĩ kana methĩwe na ũtanu wa wʼo. (Mwambĩlĩlyo 1:28, 29; 2:8, 15) O na nĩwamanengie mĩao yaĩ laisi ĩla wendaa maatĩĩe. O na ũu wĩ o vo, nĩwaekie menyuvĩe mo ene ethĩwa nĩmeũmĩatĩĩa kana maimĩatĩĩa. (Mwambĩlĩlyo 2:9, 16, 17) Ũndũ wa kũmakya nĩ kana, Atamu na Eva nĩmanyuvie kũatĩĩa myolooto yoo ene vandũ va kũatĩĩa ya Ngai. (Mwambĩlĩlyo 3:6) Kwaendie ata? Kwʼo kwĩtwʼĩĩa ũla ũseo na ũla ũthũku nĩkũtumĩte andũ mekala me atanu? Aiee. Kwa myaka mingĩ, nĩtwĩyoneete kana kũema kũatĩĩa myolooto ya Ngai kũetae mũuo na ũtanu o wa kavinda.—Mũtavanʼya 8:9.

Mbivilia nĩtũnengae myolooto ĩtũtetheeasya twĩke motwi maseo, o na twĩthĩwe tumĩte va. (2 Timotheo 3:16, 17; sisya ĩsandũkũ “Ĩvuku Kwondũ wa Andũ Onthe.”) Kwoona ũndũ Mbivilia yĩkaa ũu.

Ĩmanyĩsye mũnango wone nĩkĩ Mbivilia yaĩlĩte vyũ kwĩtwa “ndeto ya Ngai.”—1 Athesalonika 2:13. Ĩloele vitio Mũandĩkĩthya wa Mbivilia Nũũ? nthĩnĩ wa jw.org/kam.

NĨKĨ AMWE MONAA MBIVILIA TA ĨTAMATETHYA?

Andũ amwe monaa Mbivilia ĩtatonya kũnengane myolooto mĩseo ya mwĩkalĩle. Kwoona maũndũ amwe andũ matonya kũweta.

Mũndũ no asye: “Mbivilia nĩyĩvĩngaa.”

Ũwʼo: Mbeenĩ, mũndũ no one mĩsoa ĩmwe ya Mbivilia ta ĩtakwatĩanĩe, ĩndĩ eemanyĩsya nĩ ĩndĩĩ na nĩkĩ mĩsoa ĩsu yaandĩkiwe no one nesa kana nĩkwatĩanĩe.

Nĩ kana wone ngelekanyʼo imwe, soma kĩlungu “Yo Mbivilia Nĩyĩvĩngaa?” nthĩnĩ wa jw.org/kam.

Mũndũ no asye: “Andũ amwe maasya kana nĩmatĩĩaa kĩla kĩ Mbivilianĩ nĩmekaa maũndũ mathũku, kwoou ndĩsa kũnenga andũ ũtao mũseo ĩũlũ wa mwĩkalĩle.”

Ũwʼo: Mbivilia ti yo yaĩle kũtũlwa mũtĩ nũndũ wa mwĩkalĩle mũthũku wa ala mataatĩĩaa momanyĩsyo mayo. Yathanie kana andũ aingĩ, o vamwe na atongoi ma ndĩni ala maasya kana nĩmamĩatĩĩaa, makeeka maũndũ me kĩvathũkanyʼo na ũndũ yaĩtye. O na yaĩtye kana nũndũ wa kĩu, momanyĩsyo mayo ‘makaneenewa naĩ.ʼ—2 Vetelo 2:1, 2.

Nĩ kana wone ngelekanyʼo ĩmwe yonanĩtye ũndũ atongoi aingĩ ma ndĩni mataatĩĩaa momanyĩsyo ma Mbivilia, soma kĩlungu “Je Dini Ni Biashara?” nthĩnĩ wa jw.org/sw.

Mũndũ no asye: “Andũ ala maasya nĩmaatĩĩaa kĩla kĩ Mbivilianĩ mainengae andũ ala matailye tamo ndaĩa.”

Ũwʼo: Mbivilia yĩkĩĩte vinya andũ manengae ala angĩ ndaĩa. Ndĩtĩkĩlĩtye mũndũ . . .

kwona e wa vata kwĩ ala angĩ.—Avilivi 2:3.
kũlea kũnenga ndaĩa ala me na mawoni na mũĩkĩĩo wĩ kĩvathũkanyʼo na wake.—1 Vetelo 2:17.
kũthingʼĩĩsya angĩ metĩkĩlane na mawoni make.—Mathayo 10:14.

Mbivilia yonanĩtye kana mavinda onthe Ngai ekaa andũ ũseo ateũmavathũla na endaa o naitũ twĩke oou.—Alomi 9:14.

Nĩ kana ũkwate ũvoo mwingangĩ, soma kĩlungu “Kũmĩĩasya Ala Angĩ—Ũndũ Mbivilia Ĩtonya Kũtetheesya” nthĩnĩ wa jw.org/kam.

MBIVILIA NĨTŨTAVĨTYE KĨLA NGAI WENDAA TWĨKE

Mbivilia nĩyĩeleetye nesa ũndũ ngwatanĩo ya Ngai na andũ yailye kuma mwambĩĩonĩ. Kĩla kĩ vo nĩkĩtũtetheeasya kũmanya kĩla Ngai wonaa kĩ kĩseo na kĩla wonaa kĩ kĩthũku, o na nĩkĩtũtetheeasya kũmanya kĩla kĩtethya na kĩla kĩtatethya. (Savuli 19:7, 11) Myolooto ĩla twĩmanyĩasya ndĩvĩtawa nĩ ĩvinda na nĩtũtetheeasya kwĩka motwi maseo makonetye thayũ witũ wa kĩla mũthenya.

Kwa ngelekanyʼo, kwoona ũtao ũũ wĩ nthĩnĩ wa Nthimo 13:20: “Endaa na andũ oĩ, ũkeethĩwa mũĩ; ĩndĩ ũla ũtindanasya na ndia akathĩna.” Mwolooto ũsu nĩwaĩlĩte vyũ ĩvindanĩ yĩĩ o ũndũ waaĩlĩte ĩvinda ya tene. Mbivilia yusĩe myolooto ĩngĩ mingĩ ĩtonya kũtũtethya.—Sisya ĩsandũkũ “Ũtao wa Mbivilia Ndũvĩtawa Nĩ Ĩvinda.”

Ĩndĩ no wĩkũlye-ĩ, ‘Ndonya kwĩyĩĩkĩĩthya ata kana ũtao ũla wĩ Mbivilianĩ no ũndethye ũmũnthĩ?ʼ Kĩlungu kĩla kĩatĩĩe nĩkĩũneenea ngelekanyʼo imwe sya ĩvindanĩ yĩĩ.

a Yeova nĩyo ĩsyĩtwa ya Ngai.—Savuli 83:18.

ŨTAO WA MBIVILIA NDŨVĨTAWA NĨ ĨVINDA

O na kau Mbivilia yaminie kũandĩkwa vakuvĩ myaka ta 2,000 mĩvĩtu, nĩtũtethasya o na ũmũnthĩ. Andũ nĩmethĩĩtwe mayenda kwĩkala me atanu na me eanĩe. (Mũtavanʼya 1:9) Ũĩ wa Mbivilia ũla ũtavĩtawa nĩ ĩvinda no ũtũtetheesye kwĩanĩsya kĩu.

Ũĩkĩĩku

“Twĩenda kwĩthĩwa twĩ aĩkĩĩku maũndũnĩ onthe.”—Aevelania 13:18.
“Ũla ũyaa ndakoye ĩngĩ; ĩndĩ natethye wĩa na kĩthito.”—Aeveso 4:28.

Kwĩkalanyʼa na Ala Angĩ

“Ekai kĩla ũmwe ndakamanthe kwĩyĩuna mwene, ĩndĩ amanthe kũuna ũla ũngĩ.” —1 Akolintho 10:24.
“Endeeai kũmĩanĩsya na kũekeanĩa na ngenda.”—Akolosai 3:13.

Kwĩka Motwi

“Ũla ũte ũmanyi nĩwĩtĩkĩlaa kĩla ndeto.” —Nthimo 14:15.
“Mũndũ wĩ kĩlĩko nĩwonaa ũthũku, na kwĩvitha; ĩndĩ ala mate ũmanyi nĩmaendeeaa, na kũthĩna.”—Nthimo 22:3.