1 Mbivilia no Ĩkũtetheesye Wĩvathane na Mathĩna

ŨTHENGI

Ũla mũndũ mũka wawetwa kĩlungunĩ kĩvĩtu wĩtawa Delphine, amanyie kana mawĩmakĩo ala waĩ namo nĩmesaa kũtuma atwʼĩka mũthengi. Mbivilia ndĩvatĩte andũ mainywʼa ũkĩ kwa kĩthimo, ĩndĩ yaĩtye atĩĩ: “Ndũkethĩwe katĩ wa anywi ma mbinyu.” (Nthimo 23:20) Ũthengi nũtumĩte andũ aingĩ makwatwa nĩ mowau mathũku, mĩsyĩ yanangĩka, na kĩla mwaka andũ milioni mbingĩ makwʼa tene. Mũndũ no evathane na mathĩna asu aatĩĩa ũtao mũseo kuma Mbivilianĩ.

Ũu nĩwʼo Delphine weekie. Aĩtye atĩĩ: “Nĩnamanyie kana ũkĩ ndwaĩ ũtonya kũmina mawĩmakĩo makwa. Natũmĩie ũĩ ũla wĩ ĩandĩkonĩ ya Avilivi 4:6, 7, yĩla yaĩtye atĩĩ: ‘Mũikemakĩe kwa ũndũ o na wĩva; ĩndĩ mavata menyu nĩmatavanwʼe kwa Ngai.’ Kĩla wĩoo neewʼa nĩitavĩwe nĩ mosũanĩo na mawĩmakĩo, nĩnamũvoyaa Yeova na kĩthingʼĩĩsyo. Nĩnamũtavasya ũndũ ngwĩwʼa nĩthatĩte, nĩũmĩĩte ngoo, na nde na wĩkwatyo, na ĩndĩ ndimwĩsũva andetheesye nĩeke kwĩwʼa ũu. Nesa kũamũka, nĩnatataa ũndũ ndonya nĩĩkĩĩthye kana ndi na mosũanĩo mataĩle. Kũmũvoya Yeova nĩ kana nĩeke kwĩmakĩa nĩkwandetheeisye nĩsũanĩae ĩũlũ wa kĩla nĩ nakyo vandũ va syĩndũ ila nde nasyo. Nĩnatwie kana ndikanywʼa ũkĩ ĩngĩ. Nũndũ noonaa mũuo ũla nakwatĩte wĩ wa vata mũno, ndyaĩ nĩtĩkĩla kwĩka ũndũ ũtonya kũtuma ndethĩwa nawʼo.”

MWĨKALĨLE MŨTHŨKU

Mwĩkalĩle mũthũku nĩ ũndũ ũmwe katĩ wa maũndũ ala matumaa andũ maũmĩa mũno ngoonĩ. Ĩndĩ myolooto ya Mbivilia no ĩtũtetheesye twĩvathane na mathĩna asu kwa kũtũelesya maũndũ ala matumaa andũ malika mathĩnanĩ. Maũndũ asu nĩ ta kũthaũkĩa ala angĩ na kwĩloela visa sya ũlaalai. Mwanake wĩtawa Samuel aĩtye atĩĩ: “Nĩ ũndũ waĩ laisi kũthaũkĩa ala angĩ. Mavinda amwe ndyeethĩawa ndyendeewʼa nĩ mũndũ mũka, ĩndĩ naĩ ndonya kwona ayendeewʼa ninyie, na ũu ũituma nambĩĩa kũmũthaũkĩa.” Samuel esie kũmanya kana andũ masyaa nũthaũkĩaa ala angĩ, o na ĩla ũtavangĩte kwĩka ũu, na ũndũ ũsu watumie avanga kwĩkaa ũu kya ngũlũ. Ĩndĩ Samuel nĩwathĩnĩkaa nũndũ wa kĩmanyĩo kĩu. Aĩtye atĩĩ: “Kĩmanyĩo kĩu nĩ kĩthũku nũndũ kĩtumaa mũndũ esũanĩa we mwene.”

Samuel nĩwasomie kĩlungu kyaĩ na ũvoo wakonetye andũ ma mũika Kĩsesenĩ kya jw.org. Ĩtina wa kũsoma ũvoo ũsu, nĩwasũanĩie ĩandĩko ya Nthimo 20:11, yĩla yaĩtye atĩĩ: “O na kana nĩkemanyĩthanasya kwondũ wa meko mako, ethĩwa wĩa wako nĩ mũtheu na ethĩwa nĩ mũlũngalu.” Ĩandĩko yĩu yamũtetheeisye ata? Samuel nĩwamanyie kana kũthaũkĩa andũ angĩ kwonanasya kana mũndũ ti mũtheu na ti mũlũngalu. Aĩtye atĩĩ: “Nĩnamanyie kana mũndũ ũla ũthaũkĩaa andũ angĩ ethĩawa ayĩmanyĩsya ndaĩa itonya kwĩsa kũũmĩsya mũndũ ũla ũkatwaa. Nĩnambĩĩie kũsũanĩa ũndũ mwĩkalĩle wakwa ũtonya kwĩsa kũũmĩsya kĩveti kĩla ngatwaa kyoona ndithaũkĩa mũndũ mũka ũngĩ. Kĩu nĩkyatumie nĩmanya kana kĩmanyĩo kĩu nĩ kĩthũku. O na ethĩwa ti ũndũ wĩ vinya kũthaũkĩa ala angĩ, ti ũseo kwĩka ũu.” Samuel nĩwaekanie na mwĩkalĩle ũsu ũtaĩle. Kũeka kũthaũkĩa eĩtu nĩkũmũtetheesye evathane na mwĩkalĩle mũthũku.

Nake mũndũũme wĩtawa Antonio aĩ mũisyonĩ mũnenange wa kwĩthĩwa na mwĩkalĩle mũthũku nũndũ ndaĩ ekala ateloelete visa sya ũlaalai. O na kau nĩwendete kĩveti kyake, ve mavinda waemawa nĩ kwĩsiĩĩa ndakeloele visa sya ũlaalai. Aĩtye kana kũsũanĩa ĩũlũ wa ndeto ila syĩ ĩandĩkonĩ ya 1 Vetelo 5:8 nĩkũmũtetheesye. Ĩandĩko yĩu yaĩtye atĩĩ: “Ĩthĩwai na kĩlĩko, syaĩĩsyai: mũvinganĩsya wenyu ndevili angangaa kũũ na kũũ ta mũnyambũ ũkũluma, aimantha mũndũ aye.” Nake Antonio aĩtye atĩĩ: “Visa sya ũlaalai syĩ kĩla vandũ, na no ikue ĩvinda yĩasa iyĩsa kuma kĩlĩkonĩ. Ĩandĩko yĩu nĩyandetheeisye kũmanya vala motato asu maumaa. Kĩla ĩvinda neethĩwa na wendi mũthũku, nĩnalilikanaa mĩtũkĩ kana visa isu sya ũlaalai syĩthĩawa syumanĩte na Ndevili. Yu nĩnĩsĩ kana no Yeova e weka ũtonya kũndetheesya nĩendeee ‘kwĩthĩwa na kĩlĩko na kũsyaĩĩsya’ nĩ kana nĩvete vyũ mosũanĩo asu kĩlĩkonĩ na ngoonĩ yakwa, na ndisũvĩa mũtwaano wakwa.” Nũndũ Antonio nĩwakwatie ũtethyo ũla wendaa, nĩwesie kũsinda vyũ kĩmanyĩo kĩu kĩthũku. Kũsinda kĩmanyĩo kĩu nĩkwamũtetheeisye evathane na mathĩna manenange.

Kwa wʼo, Mbivilia nĩnenganĩte ũtao ũtonya kũtũtetheesya twĩvathane na mathĩna manene. Ĩndĩ tũtonya kwĩka ata ethĩwa ve maũndũ methĩĩtwe maitũthĩnyʼa kwa ĩvinda yĩasa? Ekai twone ũndũ Ndeto ya Ngai ĩtonya kũtũtetheesya kũmina mathĩna asu.