3 Mbivilia no Ĩkũtetheesye Kũmĩanĩsya na Mathĩna

ŨWAU ŨTESA KŨVOA

Rose aĩtye atĩĩ: “Nĩthĩawa na ũwau wa mũsyawa ũla ũtumaa nĩthĩwa na kyalya kingĩ mũno. Ũu ũtumaa ndatanĩa thayũ.” Na ũndũ ũla mũnene wathĩnasya Rose nĩ kana ve mavinda ũtaĩ atonya kwĩmanyĩsya Mbivilia na kwĩka maũndũ angĩ ma kĩ-veva nesa. Ĩndĩ nĩwatetheeiwʼe mũno nĩ ndeto sya Yesũ ila syĩ ĩandĩkonĩ ya Mathayo 19:26, yĩla yaasya: “Kwa Ngai maũndũ onthe nĩmatonyeka.” Rose nĩwamanyie kana ve nzĩa mbingĩ sya kwĩmanyĩsya. Nũndũ ve mavinda amwe ũtaĩ atonya kũsoma nesa nũndũ wa kyalya, nĩwambĩĩie kwĩthukĩĩsya ilungu sya Mbivilia ila ilekotiĩtwe vamwe na mavuku maeleetye Mbivilia ala malekotiĩtwe.a Aendeee kwasya atĩĩ: “Keka ndyaatũmĩa nzĩa ĩsu ya kwĩmanyĩsya, ndyĩsĩ kana nĩnĩthĩwa naaendeea kwĩthĩwa na ngwatanĩo nzeo na Ngai.”

Ĩla Rose wambĩĩa kwĩmakĩa nũndũ wa kwĩthĩwa atatonya kwĩka maũndũ ala weekaa tene, nũkwataa ũkiakisyo asoma ndeto ila syĩ ĩandĩkonĩ ya 2 Akolintho 8:12, yĩla yaĩtye ũũ: “Nũndũ kweethĩwa kwĩ ngoo ĩyũmbanĩtye, nĩkwĩtĩkĩlawa kwĩanana na kĩla mũndũ wĩ nakyo, ti kwĩanana na kĩla mũndũ ũte nakyo.” Ndeto isu imũlilikanasya kana Ngai nĩwendeeawʼa nĩ kĩla wĩanĩasya, nũndũ ekaa ũu kwĩanana na ũtonyi ũla wĩ nawʼo.

KYEVA

Delphine, ũla wawetwa ilungunĩ ila syavĩta, aĩtye atĩĩ: “Ĩtina wa kũkwʼĩĩwa nĩ mwĩĩtu wakwa e na myaka 18, neewie naũmĩa mũno weethĩa o na ndikwona ta ndonya kũendeea kwĩkala thayũ. Maũndũ makwa nĩmavĩndũkie vyũ.” Nĩwakwatie ũkiakisyo kuma ĩandĩkonĩ ya Savuli 94:19, yĩla yonanĩtye ũndũ mũandĩki wa Savuli wamũvoyie Ngai. Aisye atĩĩ: “Mosũanĩonĩ makwa maingĩ nthĩnĩ wakwa mokiakisyo maku matanʼya ngoo yakwa.” Delphine ongeleele ndeto ii: “Nĩnamũvoyie Yeova andetheesye nĩmanye maũndũ ala naĩle kwĩka nĩ kana nĩeke kwĩwʼa kyeva.”

Nĩweeyumisye atetheesye andũ angĩ. Ĩtina wa ĩvinda ĩkuvĩ, esie kwĩyĩelekanyʼa na tũlamu twa syana twa kũsola mavisa, nũndũ o na kalamu kala katũlĩka kethĩawa na vata. O na kau eewʼaa ailyĩ ta kalamu katũlĩku, nĩwamanyie kana nũtonya kũtetheesya andũ ala angĩ. Aĩtye atĩĩ: “Nesie kũmanya kana ĩla natũmĩa myolooto ya Mbivilia na nzĩa ingĩ syosyanĩte na Maandĩko nĩ kana nĩkiakisye amanyĩwʼa ma Mbivilia, Yeova eethĩawa aitũmĩa nzĩa ĩsu kũnenga ũkiakisyo.” Delphine nĩwaandĩkie andũ amwe mawetetwe Mbivilianĩ ala makwatiwe nĩ mathĩna o take. Nĩwamanyie kana “andũ asu onthe nĩmavoyaa na kĩthito.” O na ĩngĩ, nĩwamanyie kana mũndũ ndesa kũmĩĩsya atasomete Mbivilia.

Kũsoma Mbivilia nĩkwatumie Delphine amanya ũndũ ũngĩ, nawʼo nĩ kana aaĩle kũsũanĩa mũno ĩũlũ wa ĩvinda yũkĩte, ĩndĩ ti ĩũlũ wa mathĩna ala waĩ namo. Wĩkwatyo ũla ũwetetwe ĩandĩkonĩ ya Meko ma Atũmwa 24:15 nũmũnengae ũkiakisyo. Ĩandĩko yĩu yaĩtye atĩĩ: “Kũkeethĩwa ũthayũũkyo wa ala alũngalu, na ala mate alũngalu nao.” We Delphine e na nzika kana Yeova akathayũũkya mwĩĩtu wake? Eka we mwene asũngĩe. Easya ũũ: “Nĩsũanĩaa ĩũlũ wa ĩvinda yũkĩte ĩla ngona mwĩĩtu wakwa e thayũ. Nĩnĩsĩ nesa vyũ kana ve matukũ ala Yeova ũvangĩte ethayũũkya mwĩĩtu wakwa. Ngũnaa visa nĩilyĩ na mwĩĩtu wakwa vandũ mũũndanĩ nĩmwene nesa o tondũ namwonie mũthenya ũla namũsyaie.”