“Nĩkĩ Ngai Weetĩkĩlilye Ũndũ Ũsu Wĩthĩwe?”
“NĨTINDĨAA KWĨKŨLYA-Ĩ: NĨKĨ NGAI WEETĨKĨLILYE ŨNDŨ ŨSU WĨTHĨWE?”—Ndeto isu syaneeniwe nĩ Pope Benedict XVI yĩla watembeete kambinĩ ya mathĩna ya tene ĩla yĩ Auschwitz, Poland.
YĨLA KWEETHĨWA MĨISYO NO WĨTHĨWE WĨKŨLASYA-Ĩ, ‘NĨKĨ NGAI WĨTĨKĨLILYE MĨISYO ĨSU YĨTHĨWE?’ KANA NO WĨTHĨWE WAAKWATWA NĨ MATHĨNA NA ŨYĨKŨLYA-Ĩ, WE NGAI NŨTHĨNĨKAA ĨŨLŨ WAKWA?
Nĩvatonyeka ũkethĩwa wĩwʼaa ta Sheila ũla wĩkalaa Amelika. Nũndũ aeewe mũsyĩ wendete maũndũ ma ndĩni mũno, aĩtye atĩĩ: “Kuma nĩ mũnini, nĩnendete Ngai nũndũ nĩwe watũmbie, ĩndĩ ndyeewʼaa nĩ vakuvĩ nake. Noonaa nũmbene, ĩndĩ e vaasa mũno. Nĩneesĩ kana Ngai ndamenete, ĩndĩ o na vamwe na ũu ndyoonaa ta ũnthĩnĩkĩaa.” Nĩkĩ Sheila waĩ na nzika kana Ngai nũmwendete? Aĩtye atĩĩ: “Mũsyĩ witũ wakwatawa nĩ mĩisyo yĩatĩanĩe, na kwoou tũyoonaa Ngai ta watũtetheeasya.”
O ta Sheila, no wĩthĩwe ũte na nzika kana Ngai Mwene Vinya Wʼonthe e kwʼo. Ĩndĩ o na ũu wĩ o vo, no wĩthĩwe wĩkũlasya kana nũkũthĩnĩkĩaa. O na kau Yovu aĩ mũlũngalu na aĩ na mũĩkĩĩo nthĩnĩ wa ũtonyi na ũĩ wa Mũmbi, aĩ na nzika o ta isu. (Yovu 2:3; 9:4) Ĩtina wa Yovu kũkwata nĩ mĩisyo mingĩ yĩatĩanĩe, amũkũlilye Ngai atĩĩ: “Nĩkĩ ũvithaa ũthyũ waku, na kũndwʼa ta mũmaitha waku?”—Yovu 13:24.
Yo Mbivilia yaasya ata? Nĩtwaĩle kũmũtũla Ngai mũtĩ ĩla twakwatwa nĩ mĩisyo? Yo ve maũndũ maĩkĩĩthasya kana Ngai nũthĩnĩkĩaa andũ onthe, na kana nũthĩnĩkĩaa kĩla mũndũ e weka? Yo ve mũndũ ũtonya kũmanya ethĩwa Ngai nũtwĩsĩ, nũtũeleawa, nũtwĩwʼĩaa tei, kana nũtũtetheeasya yĩla twakwatwa nĩ mathĩna?
Nthĩnĩ wa ilungu ila iatĩĩe, nĩtũkwona ũndũ wũmbi ũtũmanyĩasya kana Ngai nũtũthĩnĩkĩaa. (Alomi 1:20) Na ĩndĩ, nĩtũkwona ũndũ Mbivilia yonanasya kana Ngai nũtũthĩnĩkĩaa. O ũndũ ũendeee ‘kũmũmanya’ Ngai kwĩsĩla wũmbi na Ndeto yake, nowʼo ũkũĩkĩĩa vyũ kana ‘nũkũsũvĩaa.’—1 Yoana 2:3; 1 Vetelo 5:7.