No Ũlilikane?

Nũsomete nesa makaseti ma Mũsyaĩĩsya ala mela kuma? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Nĩ maũndũ meva ana matonya kũtũtetheesya tũkaina nesanga?

Ũngamaa nesa, na ũikwataa ĩvuku yaku ya mbathi ũkĩlĩtye. Kusasya nzeve mbingĩ. Na waathamya vyũ wĩthĩawa ũtonya kũkĩlya wasya.—w17.11, ĩth. 5.

Twaĩle kwĩmanyĩsya kyaũ twasũanĩa vala ndũa sya kwĩvitha syaĩ na lelũ ila syaendete ndũanĩ isu?

Vaĩ ndũa thanthatũ syanyuvĩtwe, na lelũ ila syaendete ndũanĩ isu iyaekawa ikathũka. Nũndũ wa ũu, mũndũ aĩ atonya kũvika vo mĩtũkĩ na ateũthĩna.—w17.11, ĩth. 14.

Nĩkĩ mũthĩnzĩo ũla Ngai watũnengie ĩla waumisye Yesũ ethĩwe wovosyo nĩwʼo mũthĩnzĩo ũla mũnene vyũ?

Wovosyo nĩwĩanĩasya wendi witũ wa kũendeea kwĩkala thayũ, na vata witũ wa kũthawʼa kuma ũkombonĩ wa naĩ na kĩkwʼũ. Nũndũ Ngai nĩwendete mũno nzyawa sya Atamu, atũnengie Yesũ yĩla twaĩ athe.—wp17.6, ĩth. 6-7.

Nĩkĩ tũtonya kwasya kana Savuli 118:22 ĩwetete ũthayũũkyo wa Yesũ?

Andũ nĩmaleile kana Yesũ nĩwe Masia na mamũaa. Aĩ no nginya athayũũkwʼe nĩ kana atwʼĩke ĩvia “ĩnene ya kĩkotonĩ.”—w17.12, ĩth. 9-10.

Yaĩ lasima mũndũ ethĩwe na ũtiĩwa wa ũkithathi nĩ kana atwʼĩke ũmae wa Masia?

Aa-ũmae amwe ma Yesũ maĩ makithathi, ĩndĩ ti onthe. Mwana wa Yese ũla weetawa Ndaviti ndaĩ mũsyawa wa mbee, ĩndĩ Masia esie kuma nzyawanĩ syake.—w17.12, ĩth. 14-15.

Nĩ myolooto ta yĩva yĩ Mbivilianĩ ĩkonetye maũndũ ma ũiiti?

Mĩao ya Mose nĩyawetete kana andũ nĩmaaĩle kũvathwa makwatwa nĩ mowau mana. Andũ nĩmaaĩle kũthamba makwata kimba. Mĩao ĩsu yaĩtye kana kyoo kya mũndũ kyaaĩle kũvwʼĩkwa vyũ mũthanganĩ. Nao kana kaaĩle kwaĩkwa kavikya mĩthenya nyanya, nũndũ ĩvindanĩ yĩu nĩwʼo nthakame yako yĩthĩawa ĩtonya kũeka kũua.—wp18.1, ĩth. 7.

Nĩkĩ ti ũthũku mũndũ kwĩthĩwa eyendete kwa nzĩa ĩla yaĩlĩte?

Ti ũthũku nũndũ Mbivilia ĩtwĩĩte twende atũi maitũ o tondũ twĩyendete. (Mko. 12:31) Aũme namo nĩmaĩle “kũsyenda iveti syoo o ũndũ mendete mĩĩ yoo ene.” (Aev. 5:28) Ĩndĩ mũndũ no eyende mũno nginya akambĩĩa kwĩsũanĩĩa mũno ũndũ vataĩle.—w18.01, ĩth. 23.

Nĩ matambya meva tũtonya kwosa nĩ kana tũendeee kwĩana kĩ-veva?

Nĩtwaĩle kwĩmanyĩsya Ndeto ya Ngai, tũkavindĩĩsya kĩla tũũsoma, na tũiatĩĩa kĩla tweemanyĩsya. O na ĩngĩ nĩtwaĩle kwĩtĩkĩla veva mũtheu ũtũtongoesye na tũyĩtĩkĩla ala angĩ matũtetheesye na tũitũnga mũvea.—w18.02, ĩth. 26.

Nĩkĩ tũtaĩle kwĩkwatya kũsoma ndata na ũwe itũtetheesye kũmanya maũndũ ma ĩvinda yũkĩte?

Ve itumi syĩ kĩvathũkanyʼo, ĩndĩ kĩla kĩnene nĩ kana Mbivilia nĩleanĩte na maũndũ asu elĩ.—wp18.2, ĩth. 4-5.

Twaĩle kwĩka ata twathokwʼa nĩ mũndũ kwake?

Twathokwʼa na tweetĩkĩla, nĩtwaĩle kũtata twĩanĩsye kĩla twaweta. (Sav. 15:4) Tũyaĩle kũtĩsya kyathĩ kĩu oou vate kĩtumi kĩseo. Nĩvatonyeka ũla ũtũthoketye akethĩwa ekĩie kĩthito kingĩ kũtũuĩa.—w18.03, ĩth. 18.

Ngelekanyʼo ya Timotheo ĩtonya kũtetheesya ata aũme ala me na ianda?

Timotheo nĩwathĩnĩkĩaa angĩ kuma ngoonĩ na eekaa maũndũ ma kĩ-veva mbee. Aĩ na kĩthito ũthũkũminĩ wa Ngai na nĩwatũmĩaa kĩla weemanyĩasya. Nĩweemanyĩasya na eekwatasya veva wa Yeova. Atumĩa vamwe na ala angĩ no mose ngelekanyʼo yake.—w18.04, ĩth. 13-14.