Nĩ Kyaũ Tũtonya Kũmũnenga Yeova?

ĨVINDA yĩmwe Yesũ aisye atĩĩ: “Kwĩ mũyo kũnengane kwĩ kwosa.” (Meko 20:35) Kũmanya ũndũ ũsu wa vata no kũtũtetheesye twĩthĩwe na ngwatanĩo nzeo vamwe na Yeova. Nĩkĩ? Yeova nũtũnengete mĩthĩnzĩo mingĩ ĩla ĩtumaa tũtana, ĩndĩ no tũkwate ũtanu mwingangĩ yĩla twamũnenga Yeova mũthĩnzĩo. Kwoou no twĩkũlye-ĩ, ‘Nĩ mũthĩnzĩo wĩva tũtonya kũmũnenga Yeova?’ Ĩandĩko ya Nthimo 3:9 yaasya: “Mũtaĩe Yeova na syĩndũ syaku.” ‘Syĩndũ sitũ’ ila ĩwetetwe mũsoanĩ ũsu syonanasya ĩvinda yitũ, inengo sitũ, vinya witũ, na syĩndũ sitũ sya kĩ-mwĩĩ. Yĩla twatũmĩa syĩndũ isu kũkwata mbau ũthaithi wa wʼo, twĩthĩawa tũimũnenga Yeova mũthĩnzĩo, na kwĩka ũu nĩkũtumaa tũtana mũno.

Yĩla tũkwenda kumya syĩndũ sitũ sya kĩ-mwĩĩ, nĩ kyaũ kĩtonya kũtũtetheesya twone vata wa kũmũnenga Yeova mũthĩnzĩo? Mũtũmwa Vaulo eeie Akolintho kana nĩmaĩlĩte kwĩthĩawa ‘makĩia kĩndũ ũtee’ nĩ kana mamumĩsye Yeova mũvothi. (1 Ako. 16:2, NWT) Nĩ va ũtonya kũkwata ũvoo mwingangĩ ĩũlũ wa nzĩa ila ĩtũmĩawa kũmya mĩvothi kĩsionĩ kyenyu? Sisya ĩsandũkũ yĩĩ yĩ vaa ĩtheo.

Ti nthĩ syonthe mũndũ ũtonya kumya mũvothi aitũmĩa Indaneti. O na vailye ũu, wavingũa vala vaumĩawʼa mĩvothi Indanetinĩ nũkwĩthĩa vonanĩtwʼe nzĩa ingĩ ila ũtonya kũtũmĩa kumya mũvothi. O na ve kĩlungu kĩ na makũlyo makonetye kumya mĩvothi ala makothaa kũkũlwʼa nthĩ imwe vamwe na mosũngĩo mamo.