Yĩla Ũwaĩte Ũwau Mũthũku

“Yĩla namanyie kana naĩ na kanza ya mavũi na kanza ya ĩvu, ndyaĩ na nzika kana nĩngũkwʼa. O na kau ndyasũanĩaa ta nĩsa kũkwatwa nĩ ũwau ũsu mũthũku, nauma sivitalĩ nĩnasũanĩie ũndũ ndonya kwĩka nũmĩanĩsye nawʼo.”—Linda, ũla wĩ na myaka 71.

“Nĩthĩawa nĩwaĩte ngalĩko ĩmwe ya ũthyũ wakwa (nerve syndrome), na ũwau ũsu nũtumaa nalwʼa mũno. Mavinda amwe kyalya kyu nĩkĩtumaa nĩkwʼa ngoo. O na ve mavinda neewʼaa nĩ weka na nĩnasũanĩaa kwĩyũaa.”—Elise, ũla wĩ na myaka 49.

ETHĨWA nĩwakwatwa nĩ ũwau ũtonya kũtuma ũkwʼa kana mũndũ wendete akwatwa nĩ ũwau ũsu, ũu no ũtume wĩthĩwa na mawĩmakĩo maingĩ ngoonĩ. Na o vamwe na ũwau ũsu, ũla mũwau kana ala meũmũsũvĩa no methĩwe na kĩmako kingĩ kana kũthata mĩtũkĩ. Mũndũ ũla mũwau no akwatwe nĩ wia kana mawĩmakĩo maingĩ nũndũ wa kũtindĩaa kũthi sivitalĩ, kũema kũkwata ũiiti waĩle kana mbesa sya ũiiti, kana ũkethĩa ndawa ila ũnengetwe nĩsyambĩĩa kũmũthũa. O na no ethĩwe na mesilya maingĩ mũno na ũu ũkatuma ewʼa ta ũvikie mũthya.

Nĩ va tũtonya kũkwata ũtethyo? Andũ aingĩ nĩmamanyĩte kana kũmũvoya Ngai na kũsoma ilungu sya Mbivilia ila itonya kũmakiakisya nĩkwʼo kũtonya kũmatethya. O na ĩngĩ, yĩla andũ ma mũsyĩ na anyanya matetheesya ũla mũwau na mamwonyʼa kana nĩmamwendete, no ethĩwe na vinya wa kũmĩĩsya.

MAŨNDŨ MEEKIWE NĨ ANDŨ AMWE NĨ KANA MOMĨĨSYE

Robert, ũla wĩ na myaka 58, aĩtye: “Mũĩkĩĩe Ngai, na akaũtetheesya ũmĩĩsye ũwau waku. Mũvoyae Yeova na ũimũtavya ũndũ ũkwĩwʼa. Mũvoye aũnenge veva wake mũtheu. Mũvoye aũtetheesye wĩthĩwe na woni waĩle na wĩthĩwe ũtonya kwĩkĩa andũ ma mũsyĩ waku vinya. Na ĩngĩ mũvoye nĩ kana ũendeee kwĩthĩwa wĩ mũuu.”

Aendeee kwasya-ĩ: “Wĩthĩawa wĩ ũndũ wa vata mũno kwona andũ ma mũsyĩ maiũthĩnĩkĩa yĩla wĩ na mathĩna ma ngoonĩ. Nĩnakũnĩawa simũ kĩla mũthenya nĩ mũndũ ũmwe kana elĩ na maingũlya, ‘Ũendeee ata?’ Nĩnĩkĩawa vinya nĩ anyanya kuma kũndũ kwĩ kĩvathũkanyʼo. Ndeto syoo nitumaa nĩwʼa nesa, na ũu ũimbĩkĩa vinya wa kũendeea na mbee.”

Ethĩwa ũendete kwona mũndũ mũwau, kwasũanĩa ndeto ii sya Linda. Aĩtye atĩĩ: “Ũla mũwau ethĩawa ayenda kwĩkala o ta andũ ala angĩ na kwoou ti kĩla ĩvinda ũtonya kwĩthĩwa ayenda kũneenea ĩũlũ wa ũwau wake. Kwoou, neeneai maũndũ angĩ matakonetye ũwau wake.”

Maũndũ aa twaneenea no matũtetheesye twĩthĩwe tũte na nzika kana ve kĩtumi kĩseo kya kũendeea kwĩkala thayũ. Maũndũ asu nĩ vinya ũla Ngai ũtũnengae, ũkiakisyo wa Maandĩko, na ũtethyo kuma kwa andũ ma mũsyĩ na anyanya.

Maandĩko Matonya Kũũtetheesya

Mwĩkwatye Ngai.

“Nĩnamũmanthie Yeova, na anzũngĩa, na ambonokya kuma wʼĩanĩ wakwa wʼonthe. Mũndũ ũũ ngya akaya, na Yeova amwĩwʼa.”—Savuli 34:4, 6.

Linda aĩtye: “Ndivoyaa Ngai andetheesye nĩvoe. Ĩndĩ mavinda onthe nĩmũvoyaa nĩthĩwe na vinya na aindetheesya nũmĩĩsye ũwau wakwa.”

Soma Ndeto ya Ngai nĩ kana wĩthĩwe na vinya.

“Ũla ũtwĩe kwʼo ndakasya, Nyie nĩ mũwau.”—Isaia 33:24.

Vindĩĩsya mawatho ma Ngai ma ĩvinda yũkĩte nĩ kana wĩkwatyo waku wĩthĩwe wĩ mũlũmu.

Mantha ũtethyo kuma kwa andũ ma mũsyĩ na anyanyau.

“Mũnyanya nĩwendanaa ĩndĩ yonthe; na mwana-a-ĩthe asyaiwe kwondũ wa kũthĩnũkasya.”—Nthimo 17:17.

Ũla mũndũ mũka tũwetie mbeenĩ wĩtawa Elise aĩtye atĩĩ: “Ndũkevathane na andũ ala angĩ. Ĩtĩkĩla anyanyau maũtetheesye. Nũtonya kwĩthĩwa ve mavinda wĩwʼaa ta vate mũndũ ũkũũthĩnĩkĩa na ũteũsũanĩa kana Ngai nũkwĩthukĩĩasya, ĩndĩ nũseo ndũkevathane na andũ ala angĩ.”