Kũthi Maũmbanonĩ Kwonanasya Kyaũ Ĩũlũ Witũ?

1-2. (a) Yeova onaa kyaũ yĩla wasisya andũ milioni mbingĩ mombanĩte kwondũ wa Kyaũya kya Wĩoo kya Mwĩaĩi? (Sisya visa ĩthangũnĩ ya mbee vyũ.) (b) Twĩneenea kyaũ ĩsomonĩ yĩĩ?

KWAVINDĨĨSYA visa ũla Yeova wonaa yĩla andũ milioni mbingĩ ĩũlũ wa nthĩ moombana kwondũ wa Kyaũya kya Wĩoo kya Mwĩaĩi. O na kũtwʼĩka andũ mombanaa me kĩkundi, Yeova nĩwonaa kĩla ũmwe woo. Kwa ngelekanyʼo, nĩwĩsĩ ala mokaa ũmbanonĩ ũsu kĩla mwaka. Amwe moo nĩmatonya kwĩthĩwa manyamaawʼa mũno. Angĩ nĩmatonya kwĩthĩwa matokaa mũno maũmbanonĩ ma kĩla kyumwa, ĩndĩ mayĩwʼa matesa kũtĩa ũmbano wa kũlilikana kĩkwʼũ kya Yesũ. O na Yeova no wĩthĩawa ene ala mooka ya mbee ũmbanonĩ ũsu, o na ethĩwa mooka o mone kĩla kĩendeeaa.

² Vate nzika, Yeova nĩwĩwʼaa mũyo mũno oona andũ aingĩ me ũmbanonĩ wa kũlilikana kĩkwʼũ kya Yesũ. (Luka 22:19) Ĩndĩ ũu ti kwasya kana kĩla Yeova wĩthĩawa asyaĩtye no ũtalo wa ala me vo. Kĩla ũsiasya mũno nĩ kĩla kĩtumĩte mũndũ oka. Ĩsomonĩ yĩĩ nĩtũũneenea ĩkũlyo yĩĩ ya vata: Yo nĩkĩ tũendaa ũmbanonĩ wa kĩla mwaka wa kũlilikana kĩkwʼũ kya Yesũ, vamwe na maũmbanonĩ ala angĩ ma kĩla kyumwa Yeova wĩthĩawa avangĩĩe ala mamwendete?

WĨNYIVYO NŨTUMAA TWENDA KŨTHI MAŨMBANONĨ

3-4. (a) Tũendaa maũmbanonĩ nĩkĩ? (b) Kũthi maũmbanonĩ kwonanasya kyaũ ĩũlũ witũ? (c) Wasũanĩa kĩla kĩwetetwe nthĩnĩ wa 1 Akolintho 11:23-26, wĩona nĩkĩ tũtaĩle kũtĩĩa ũmbano wa kũlilikana kĩkwʼũ kya Yesũ?

³ Kĩtumi kĩla kĩnene kĩtumaa tũthi maũmbano nĩ kũthaitha. O na ĩngĩ nĩtũendaa maũmbano tũkamanyĩwʼe nĩ Yeova. Andũ ala me mĩngʼathĩlĩlyo mewʼaa mate kwenda kũmanyĩwʼa nĩ mũndũ. (3 Yoa. 9) Ithyĩ tũyĩilye tamo. Twĩwʼaa twĩ na mea ma kũmanyĩwʼa nĩ Yeova na ala ũtũmĩaa ũseũvyonĩ wake.—Isa. 48:17, 18; Yoa. 6:45.

⁴ Yĩla twathi maũmbanonĩ, twĩthĩawa tũyonanyʼa nĩtwĩnyivĩtye, nĩtũkwenda kũmanyĩwʼa, na nĩtũthalĩkĩtye ngoo twose ũmanyi. Tũendaa ũmbanonĩ wa kũlilikana kĩkwʼũ kya Yesũ nũndũ nĩtwĩsĩ kana nĩ wa vata mũno. O na ĩngĩ twĩkaa ũu nũndũ nĩtũkwenda kũatĩĩa kĩĩ Yesũ watwĩaĩe: “Ĩkaai ũu kwondũ wa kũndilikana.” (Soma 1 Akolintho 11:23-26.) Ũmbano ũsu nũlũlũmĩlasya wĩkwatyo witũ na ũitũlilikanyʼa ũndũ Yeova ũtwendete. Ĩndĩ Yeova nĩwĩsĩ kana nĩtwĩthĩawa na vata wa kwĩkĩwa vinya na kũlũlũmĩlwʼa mavinda maingĩ, na ti o ĩmwe kwa mwaka. Nĩkyo kĩtumi ũtũvangĩĩaa maũmbano ma kĩla kyumwa na akatũthuthya tũendae tũteũtĩĩa. Na nũndũ twĩ na wĩnyivyo, nĩtwĩkaa ũu. O na nĩtũtũmĩaa masaa meana ũna kĩla kyumwa kwĩyũmbanyʼa na kũthi maũmbanonĩ asu.

5. Nĩkĩ andũ ala menyivĩtye metĩkĩlaa kũka kũmanyĩwʼa nĩ Yeova?

⁵ Kĩla mwaka, andũ aingĩ menyivĩtye nĩmetĩkĩlaa kũka mamanyĩwʼe nĩ Yeova. (Isa. 50:4) Mavinda maingĩ mambaa kũka ũmbanonĩ wa kũlilikana kĩkwʼũ kya Yesũ, na kuma vau mayambĩĩa kũka maũmbanonĩ ala angĩ. (Nzek. 8:20-23) Nĩtũtanĩaa mũno kũmanyĩwʼa na kũtongoewʼa twĩ vamwe nĩ Yeova, ‘mũtethya waitũ na mũvonokya waitũ.’ (Sav. 40:17) We nũkwona ta ve kĩndũ kĩngĩ kya vata na kĩtũtanĩthya ta kũmanyĩwʼa nĩ Yeova na Yesũ, Mwana wake mwendwa?—Mt. 17:5; 18:20; 28:20.

6. Wĩnyivyo watethisye mũndũ ũmwe ata ooka ũmbanonĩ wa kũlilikana kĩkwʼũ kya Yesũ?

⁶ Kĩla mwaka nĩtũtataa tũthokye andũ aingĩ ũndũ vatonyeka moke ũmbanonĩ wa kũlilikana kĩkwʼũ kya Yesũ. Na andũ aingĩ menyivĩtye nĩmeetĩkĩlaa kũka na maitetheka mũno. Ekai twose ngelekanyʼo ĩmwe. Myaka yĩ navu ĩtina, ve mũndũ ũmwe wanengiwe kavalũa ka kũmũthokya ũmbano wa kũlilikana kĩkwʼũ kya Yesũ, ĩndĩ eea mwana-a-asa ũla wamũnengie kana ndevota kũka. Ĩndĩ mwana-a-asa asengʼie mũno mũthenya ũsu wavika yĩla woonie mũndũ ũsu atonyeleela Nyũmbanĩ ya Ũsumbĩ. Mũndũ ũsu endeeiwʼe mũno nĩ ũndũ wathokiwʼe nginya ambĩĩa kũkaa maũmbano kĩla kyumwa. O na mwaka ũmwe ũla waatĩĩe akosie maũmbano o katatũ. Kyo nĩ kyaũ kyatumie ambĩĩa kũka maũmbano onthe? Ũuu nĩwʼo watumie avĩndũa kĩlĩko. Mwana-a-asa ũla wamũthokisye esie kwasya, “Mwana ũsu e wĩnyivyo mwingĩ mũno.” Vate nzika, Yeova nĩwe wakusisye mũndũ ũsu oke kũmũthaitha, na yu tũũneena nĩ mwana-a-asa mũvatise.—Sav. 138:6; Yoa. 6:44.

7. Maũndũ ala twĩmanyĩasya maũmbanonĩ maitũ na ala tũsomaa Mbivilianĩ matonya kũtũtetheesya ata twĩthĩwe na wĩnyivyo?

⁷ Maũndũ ala twĩmanyĩasya maũmbanonĩ maitũ na ala tũsomaa Mbivilianĩ no matũtetheesye twĩthĩwe na wĩnyivyo. Maũndũ ala maneeneawa ũmbanonĩ syumwanĩ ila ithengeee ũmbano wa kũlilikana kĩkwʼũ kya Yesũ, methĩawa makonetye mũno mũno ngelekanyʼo yake. Nĩmaneeneaa ũndũ woonanisye wĩnyivyo wĩana kwa kũnengane thayũ wake wĩthĩwe nthembo ya wovosyo. Na ũmbano ũsu ũtielye o mĩthenya mĩnini nĩtwĩkĩawa vinya tũsome ilungu sya Mbivilia, ila ineeneete maũndũ ala meekĩkie ĩvindanĩ ya kĩkwʼũ kya Yesũ na ũthayũũkyo wake. Maũndũ ala twĩmanyĩasya maũmbanonĩ ĩvindanĩ yĩu na ala tũsomaa ilungunĩ isu, nĩmatũthangaasya tũtũngae mũvea nũndũ wa nthembo ĩsu. O na nĩmatumaa twĩwʼa tũyenda kũatĩĩa ngelekanyʼo yake ya wĩnyivyo, na twenda kwĩka kwenda kwa Yeova o na yĩla maũndũ metu.—Luka 22:41, 42.

ŨKŨMBAŨ NŨTUMAA TWENDA KŨTHI MAŨMBANONĨ

8. Yesũ oonanisye ũkũmbaũ ata?

⁸ Nguma ĩngĩ Yesũ weesĩkĩe nayo tũtataa twĩthĩwe nayo nĩ ũkũmbaũ. Kwasũanĩa ũndũ woonanisye ũkũmbaũ wĩana mĩthenya mĩvũthũ atanamba kũkwʼa. Kavindanĩ kau Yesũ nĩweesĩ nesa vyũ kana amaitha make makilyĩ manambĩĩa kũmwĩkĩĩthya nthoni, mamũvũe, na maimũaa. (Mt. 20:17-19) Ĩndĩ nĩwatwʼĩte vyũ kana ndesyoka ĩtina. Yĩla saa wavikie, eeie atũmwa make, ala maĩ vamwe nake mũũndanĩ wa Ngesemanii, atĩĩ: “Ũkĩlai tũthi. Sisyai! Mũvũnyanĩi wakwa nũthengeee.” (Mt. 26:36, 46) Ĩtina wa vau, andũ ala mookĩte kũmũkwata nĩmavikie me na mĩio ya kaũ. Amona nĩwaũngamie mbee woo, amatavya nĩwe ũũ, na eea asikalĩ maekane na atũmwa make mathi. (Yoa. 18:3-8) Yesũ aĩ ngũmbaũ vate ngũĩ! Ũmũnthĩ Aklĩsto etĩkĩwʼa mauta vamwe na malondu angĩ nĩmatataa kwĩthĩwa na ũkũmbaũ o ta Yesũ. Ata?

9. (a) Nĩ mavinda ta meva tũtonya kwĩthĩwa na vata wa ũkũmbaũ nĩ kana tũthi maũmbano tũteũtĩĩa? (b) Ngelekanyʼo yitũ ĩtonya kũtetheesya ata ana-a-asa ala movetwe nũndũ wa mũĩkĩĩo woo?

⁹ Ve maũndũ matonya kũtũkwata ũkethĩa no nginya twĩthĩwe na ũkũmbaũ nĩ kana tũthi maũmbanonĩ tũteũtĩĩa. Ve ana-a-asa na eĩtu-a-asa amwe maitũ matataa maikatĩĩe maũmbano o na kau me na kyeva kingĩ, nĩmatũlĩkĩte ngoo, kana nĩ awau. Ve angĩ namo mekaa ũu o na kau nĩmeũvĩngwa mũno nĩ andũ ma mũsyĩ kana silikalĩ sya kwoo. O na ĩngĩ, kwasũanĩa ũndũ ngelekanyʼo yitũ ĩtetheeasya ana-a-asa ala movetwe nũndũ wa mũĩkĩĩo woo. (Aevl. 13:3) Meewʼa ũndũ tũendeee kũmũthũkũma Yeova twĩ o na maũndũ meũtata mũĩkĩĩo witũ, mewʼaa meekĩwa vinya maendeee kũlũmya mũĩkĩĩo woo, maendeee kwĩthĩwa na ũkũmbaũ, na maiendeea kũlũmanyʼa na Yeova. Mũtũmwa Vaulo nũmwe watethekie kwa nzĩa ĩsu. Yĩla woovetwe Lomi, eewʼaa mũyo mũno eewʼa ũndũ ana-a-asa make maendeee kũmũthũkũma Ngai me aĩkĩĩku. (Avi. 1:3-5, 12-14) Kavinda kakuvĩ atanamba kũthawʼa kana amina kũthawʼa oou, nĩwaandĩkĩie Aklĩsto Aevelania valũa. Valũanĩ ũsu nĩweekĩie Aklĩsto asu vinya maendeee “kwĩthĩwa na wendo wa ana-a-asa,” mate kũeka kũmbana vamwe.—Aevl. 10:24, 25; 13:1.

10-11. (a) Naaũ twaĩle kũthokya ũmbanonĩ wa kũlilikana kĩkwʼũ kya Yesũ? (b) Kwosana na Aeveso 1:7, twĩkaa ũu nĩkĩ?

¹⁰ Twonanasya twĩ na ũkũmbaũ yĩla twathokya andũ ma mũsyĩ, ala tũthũkũmaa ĩmwe, na atũi maitũ moke kũlilikana kĩkwʼũ kya Yesũ. Ĩndĩ tũmathokasya nĩkĩ? Tũtũngaa mũvea mũno nũndũ wa kĩla Yeova na Yesũ matwĩkĩte nginya ũkethĩa twĩĩwʼa tũtaema kũthokya angĩ moke ũmbanonĩ wa kũlilikana kĩkwʼũ kya Yesũ. Twendaa o namo memanyĩsye ũndũ matonya kũtetheka nĩ ‘ũseo mwingĩ’ wa Yeova, ũla watwonisye yĩla watũnengie nthembo ya wovosyo.—Soma Aeveso 1:7; Ũvu. 22:17.

¹¹ Ve nguma ĩngĩ ya vata twĩthĩawa tũyonanyʼa yĩla tweethĩwa na ũkũmbaũ wa kũendeea kũmbana vamwe. O na Yeova vamwe na Mwana wake nĩmonanĩtye nesa vyũ nguma ĩsu maũndũnĩ me kĩvathũkanyʼo.

WENDO NŨTUMAA TWĨWʼA TŨTAĨLE KŨTĨA MAŨMBANO

12. (a) Maũmbano matũtetheeasya ata tũkenda Yeova na Yesũ mũnango? (b) Ĩandĩko ya 2 Akolintho 5:14, 15 yĩtwĩkĩaa vinya twĩke ata nĩ kana twĩyĩelekanyʼe na Yesũ?

¹² Twĩwʼaa tũtaĩle kũtĩa maũmbano nũndũ nĩtũmwendete Yeova na Yesũ. Na twathi maũmbanonĩ, nĩtwĩmanyĩasya maũndũ matumaa tũmwenda Yeova na Mwana wake mũnango. Twĩ maũmbanonĩ nĩtũlilikanawʼa kĩla matwĩkĩte. (Alo. 5:8) Na mũno mũno ũmbano wa kũlilikana kĩkwʼũ kya Yesũ nũtũlilikanasya ũndũ matwendete mũno wĩana, o na ũndũ mendete ala mataeleawa vata wa nthembo ya wovosyo. Nũndũ nĩtũtũngaa mũvea, nĩtũtataa kũatĩĩa ngelekanyʼo ya Yesũ kĩla mũthenya. (Soma 2 Akolintho 5:14, 15.) O vamwe na ũu, kĩu nĩkĩtumaa ngoo sitũ syenda kũmũtaĩa Yeova nũndũ wa nthembo ĩsu. Ũndũ ũmwe tũtonya kwĩka tũkamũtaĩa, nĩ kumya maelesyo kuma ngoonĩ yĩla twĩ maũmbanonĩ.

13. Tũtonya kwonanyʼa ata ũndũ tũmwendete Yeova na Mwana wake mũno wĩana? Elesya.

¹³ Yĩla tweyĩima maũndũ mana nĩ kana twendeesye Yeova na Mwana wake, twĩthĩawa tũimonyʼa ũndũ tũmendete mũno wĩana. Mavinda maingĩ wĩthĩaa no nginya twĩvate maũndũ mana nĩ kana tũthi maũmbanonĩ. Kwa ngelekanyʼo, ikundi mbingĩ syĩkaa ũmbano ũmwe mũthenya wa wĩa, katĩ katĩ wa kyumwa, na nĩvatonyeka ũkethĩa twĩthĩawa tũnoete. Nawʼo ũmbano ũla ũngĩ wĩkawa wikendi, ĩvinda yĩla andũ aingĩ mathyũmũĩte. We Yeova nĩwonaa kĩthito kĩu twĩkĩaa, o na kau twĩthĩawa twĩ anou? Vate nzika, nũkyonaa! O ũndũ tweekĩa kĩthito kĩana, nowʼo tũmũtanĩthasya Yeova.—Mko. 12:41-44.

14. Yesũ oonanisye ata kana we nĩwendete ala angĩ vyũ na ngoo yonthe?

¹⁴ Yesũ aĩ mũndũ wendete ala angĩ vyũ na ngoo yonthe na nĩwatũtiĩe ngelekanyʼo nzeo. Ndaaĩwʼa wĩ ũndũ wĩ vinya kũkwʼa kwondũ wa amanyĩwʼa make, na kũthĩnĩkĩaa mavata moo mbee wa ala make. Kwa ngelekanyʼo, ndaalea kũũngana na aatĩĩi make aĩ nũndũ eĩwʼa anoete kana eĩwʼa e na ũndũ ũũmũthĩnyʼa. (Luka 22:39-46) O na ĩngĩ, Yesũ asiasya mũno ũndũ ũtonya kũuna ala angĩ, ĩndĩ ti ũndũ mo matonya kũmũuna. (Mt. 20:28) Ethĩwa nĩtũmwendete Yeova na ana-a-asa maitũ vyũ, tũkeekaa kyonthe kĩla tũtonya tũthi ũmbanonĩ wa Kyaũya kya Wĩoo kya Mwĩaĩi na maũmbano ala angĩ ma kĩkundi.

15. Naaũ twaĩle kũthĩnĩkĩa mũno?

¹⁵ Ithyĩ twĩ kĩkundinĩ kya Aklĩsto ala ma wʼo, na nĩtũtũmĩaa ĩvinda yingĩ ũndũ vatonyeka tũithokya angĩ moke mamũthaithe Yeova vamwe naitũ. Ĩndĩ o na ũu wĩ o vo, nĩtũtetheeasya mũno mũno Aklĩsto ala mavoie nũndũ o namo nĩ “ana-a-asa maitũ nthĩnĩ wa mũĩkĩĩo.” (Aka. 6:10) Yĩla twamekĩa vinya moke ũmbanonĩ, na mũno mũno ũla wa kũlilikana kĩkwʼũ kya Yesũ, twĩthĩawa tũyonanyʼa kwa wʼo nĩtũmendete. Nũndũ Yeova nĩ Ĩthe witũ na Mũĩthi witũ ũtwendete, ewʼaa mũyo mũno e na Yesũ yĩla mũndũ wavoie wamũsyokea, na nowʼo twĩwʼaa twoona ũu.—Mt. 18:14.

16. (a) Tũtonya kwĩkĩana vinya ata, na maũmbano maitũ matũtetheeasya ata? (b) Nĩkĩ yĩĩ nĩ ĩvinda ĩseo ya kũlilikana ndeto sya Yesũ ila syĩ nthĩnĩ wa Yoana 3:16?

¹⁶ Nthĩnĩ wa syumwa ila itiele tũtanombana kwondũ wa kũlilikana kĩkwʼũ kya Yesũ Wakatano, Matukũ 19, Mwei wa 4, 2019, mwa tata ũndũ ũtonya ũthokye aingĩ ũndũ vatonyeka meĩthĩwa vamwe naitũ. (Sisya ĩsandũkũ “We Nũũmathokya?”) Na nthĩnĩ wa mwaka ũũ tũkwete, ekai tũkae maũmbano onthe tũteũtĩĩa, na tũitũmĩa nesa mwanya ũsu Yeova ũtũnengete twĩkĩane vinya. O ũndũ tũthengeee mũminũkĩlyo wa nthĩ ĩno, nowʼo maũmbano mekũendeea kwĩthĩwa me ma vata nĩ kana matũtetheesye tũendeee kwĩthĩwa na wĩnyivyo, ũkũmbaũ, na wendo. (1 Ath. 5:8-11) Kwoou ekai tũtwʼe vyũ na ngoo yonthe kwonyʼa Yeova na Mwana wake kana nĩtũũmatũngĩa mũvea mũno nũndũ wa wendo ũla matwonisye!—Soma Yoana 3:16.