Kũmakiakisya Ala Mekĩtwe Maũndũ Mathũku (Ĩsomo ya 4 Katĩ wa 4)

1-2. (a) Nĩ ngelekanyʼo yĩva ĩkwonanyʼa kana andũ masyaawa me na vata wa kũkiakiwʼa na matonya kũkiakisya angĩ? (b) Syana imwe iũmĩawʼa ata?

ANDŨ masyaawa me na vata wa kũkiakiwʼa, na mo ene nĩmatonya kũkiakisya angĩ kwa nzĩa ya ũsengyʼo. Twasye kana nĩkavalũka na kaũmĩa ĩu kaithaũka. Nĩkatonya kũsemba kũla kwĩ Mami kana Tata kaĩĩte. Asyai mako maitonya kũvosya kĩtau kyu, ĩndĩ no makakiakisye. Kwa ngelekanyʼo, no makakũlye kĩla kyeekĩka, makakavangũla methoi, na makakavuva vala kaũmĩa na maikasesenga kaeke kũĩa. O na no mavake kĩtau kyu ndawa kana makakyova. Ĩtina wa ĩvinda ĩnini, kana kau nĩkaekaa kũĩa, o na no kambĩĩe kũthaũka ĩngĩ. Na ĩndĩ kĩtau kyu nĩkĩsaa kũvoa.

² Ĩndĩ mavinda angĩ syana niũmĩaa kwa nzĩa nthũku mũno. Imwe nitũmĩawa maũndũnĩ makonetye kũmanyana kĩ-mwĩĩ. No syĩkwe ũu ĩvinda o yĩmwe, kana kwa ĩvinda ya myaka mingĩ. O na yĩthĩwe no ĩvinda yĩmwe kana nĩ mavinda maingĩ, ũndũ ũsu ũtumaa iũmĩa mũno vyũ, na ithĩnĩkaa kwa ĩvinda yĩasa mũno. Mavinda amwe mũndũ ũla wĩkĩte ũu nũkwatawa na ayosewa ĩtambya. Na mavinda angĩ no oneke ta ũkũvonoka. Ĩndĩ o na akosewa ĩtambya mĩtũkĩ, kana kala kekĩtwe ũu kaendeeaa kũthĩnĩka nginya o na katwʼĩka mũndũ mũima.

3. O tondũ vawetetwe ĩandĩkonĩ ya 2 Akolintho 1:3, 4, Yeova endaa ata, na twĩneenea makũlyo meva?

³ Ethĩwa ve Mũklĩsto watũmĩiwe maũndũnĩ makonetye kũmanyana kĩ-mwĩĩ e mũnini, na o na yu nĩwũũmĩaa na kũthĩnĩka nũndũ wa ũndũ ũsu, nĩ kyaũ kĩtonya kũmũtethya? (Soma 2 Akolintho 1:3, 4.) Vate nzika, Yeova endaa malondu make mendwe na maikiakiwʼa. Kwoou ekai tũneenee makũlyo aa atatũ: (1) Nĩkĩ ala matũmĩiwe maũndũnĩ makonetye kũmanyana kĩ-mwĩĩ me syana maĩle kũkiakiwʼa? (2) Naaũ matonya kũmakiakisya? (3) Tũtonya kũmakiakisya kwa nzĩa nzeo ata?

NĨKĨ MAĨLE KŨKIAKIWʼA?

4-5. (a) Nĩkĩ nĩ ũndũ wa vata kũmanya kana syana syĩ kĩvathũkanyʼo vyũ na andũ aima? (b) Kũtũmĩa kana maũndũnĩ makonetye kũmanyana kĩ-mwĩĩ kũtonya ata kũtuma kaemwa nĩ kũĩkĩĩa andũ angĩ?

⁴ Andũ aima ala maũmĩiwʼe me syana nĩmatonya kwĩthĩwa mayenda kũkiakiwʼa, o na kau myaka mingĩ nĩ mĩvĩtu kuma meekwa ũu. Nĩkĩ? Nĩ kana tũelewe, mbee, no nginya tũmanye kana syana syĩ kĩvathũkanyʼo vyũ na andũ aima. Ũndũ mwana ũũmĩaa eekwa naĩ, ti wʼo mũndũ mũima ũũmĩaa eekwa naĩ. Sũanĩa ngelekanyʼo imwe syĩkũĩkĩĩthya ũu.

⁵ Syana nĩsyendaa kwĩthĩwa syĩ ndũũ ngamu na ala maieaa na maisũvĩaa, na nĩsyendaa kwĩthĩwa imaĩkĩĩe. Maũndũ asu maĩkĩĩthasya syana kana nĩ nzũvĩĩku na mayĩimanyĩsya kũĩkĩĩa ala masyendete. (Sav. 22:9) Ĩndĩ ũndũ wa kũmakya nĩ kana kaingĩ syana itũmĩawa naĩ nĩ andũ ma mũsyĩ na angĩ ala me ndũũ mũno na andũ ma mũsyĩ. Yĩla kana katũmĩwa naĩ nĩ mũndũ kamũĩkĩĩe, ũu nũtumaa kambĩĩa kũemwa nĩ kũĩkĩĩa andũ angĩ, o na myaka mingĩ yavĩta.

6. Nĩkĩ kũtũmĩa kana maũndũnĩ makonetye kũmanyana kĩ-mwĩĩ nĩ ũndũ mũthũku vyũ na ũtumaa kaũmĩa mũno?

⁶ Syana iitonya kwĩsũvĩana na mũisyo, na kũitũmĩa maũndũnĩ makonetye kũmanyana kĩ-mwĩĩ nĩ ũndũ mũthũku vyũ na ũtumaa iũmĩa mũno. Kũlasimĩthya kana keke maũndũ asu nĩkũkaũmĩasya mũno vyũ nũndũ mwĩĩ wako ndwĩthĩawa ũneana ũkamanya kĩu nĩ kyaũ. O na kĩlĩko kyako kĩyĩthĩawa kĩeleetwe maũndũ ma kũmanyana kĩ-mwĩĩ nthĩnĩ wa mũtwaano, na kĩyĩthĩawa kĩyũmbanĩsye maũndũ asu. Kũtũmĩa kana maũndũnĩ asu no kũtume kethĩwa na woni ũtaĩle ĩũlũ wa kũmanyana kĩ-mwĩĩ, kũkatuma kona kate ka vata, kana kakaeka kũĩkĩĩa mũndũ o na wĩva ũkwĩka ta ũkwenda kũtuma ndũũ nako.

7. (a) Nĩkĩ ne laisi mũno mũndũ kũkenga kana na aikatũmĩa naĩ, na atonya kũkakenga ata? (b) Ũvũngũ ũsu ũtonya kwĩkana na kana ata?

⁷ Syana iyĩthĩawa na ũtonyi wa kũsũanĩa maũndũ nesa, kwĩyĩkĩa motwi, kana kwona mũisyo na kũwathũkĩa. (1 Ako. 13:11) Kwoou nĩ laisi mũno mũndũ kũikenga na kũitũmĩa naĩ. Andũ ala matũmĩaa syana maũndũnĩ makonetye kũmanyana kĩ-mwĩĩ maimanyĩasya ũvũngũ mũthũku, ta kũitavya kana nĩsyo itumie ũndũ ũsu wĩkĩka, na kana iyaĩle kũtavya mũndũ o na ũmwe kĩla kĩkĩkie. Nĩmaitavasya kana syaweta vai mũndũ wĩsyĩthukĩĩsya kana aitetheesye. O na masyonethasya mũndũ mũima eeka ũndũ ũsu na kana ethĩawa aikonethya nũkendete vyũ, nako kethĩawa kaimwonyʼa nĩkamwendete, na kwoou kĩu ti kĩndũ kĩthũku. Ũvũngũ ta ũsu wanangaa kĩlĩko kya kana, na kaminaa myaka mingĩ kayĩsa kũmanya kaĩ keekie kũkengwa. O na ĩngĩ, ũu ũtumaa keana kayĩwʼa kate maana, ke kavuku, na kayona vai mũndũ waĩle ũkenda kana kũkakiakisya.

8. Nĩkĩ tũtonya kwĩthĩwa na mũĩkĩĩo kana Yeova no akiakisye ala maũmĩĩtwʼe?

⁸ Kwoou ti ũsengyʼo kũmanya kana mũndũ watũmĩiwe maũndũnĩ makonetye kũmanyana kĩ-mwĩĩ e mũnini no aũmĩe kwa myaka mingĩ. Kĩu nĩ kĩndũ kĩthũku mũno! Ũndũ ũsu nũnyaĩĩkĩte mũno nthĩ yonthe, na kĩu kĩonanyʼa kana twĩkalĩte mĩthenyanĩ ya mũminũkĩlyo, ĩla yathaniwe kana andũ aingĩ makethĩwa “mate na wendo,” na “andũ athũku . . . makaendeea kũthũkĩĩa.” (2 Tim. 3:1-5, 13) Nzĩa ila Satani ũtũmĩaa nĩ nthũku mũno vyũ, na nĩ kĩndũ kĩũmĩasya mũno yĩla andũ meeka kĩla kĩũtanĩthya Ndevili. Ĩndĩ Yeova e vinya mwingĩ kwĩ Satani na ala mathũkũmaa Satani. Ethĩawa ene maũĩ onthe ma Satani. No twĩthĩwe na mũĩkĩĩo kana Yeova nĩwĩsĩ woo ũla twĩ nawʼo, na no atũkiakisye. Nĩ ũtanu kũthũkũma “Ngai wa ũkiakisyo wʼonthe, ũla ũtũkiakiasya matatwanĩ maitũ onthe nĩ kana tũtonye kũmakiakisya ala me matatwanĩ ma kĩla mũthemba kwĩsĩla ũkiakisyo ũla Ngai ũtũkiakiasya nawʼo.” (2 Ako. 1:3, 4) Ĩndĩ no wĩkũlye, ‘Yeova atũmĩaa aaũ kũkiakisya ala maũmĩĩtwʼe?’

NAAŨ MATONYA KŨKIAKISYA ALA MEKĨTWE MAŨNDŨ MATHŨKU?

9. Ndeto sya Mũsumbĩ Ndaviti ila syĩ nthĩnĩ wa Savuli 27:10, syonanasya Yeova atethasya ata ala mataasũvĩwa nĩ andũ ma mũsyĩ?

⁹ Ala mataasũvĩwa nĩ asyai moo ũndũ vaĩle, kana ala matũmĩiwe naĩ nĩ andũ ma mũsyĩ kana anyanya, nĩmaĩle kũkiakiwʼa mũno. Mũandĩki wa Savuli, Ndaviti, nĩweesĩ kana kĩla ĩvinda no tũmwĩkwatye Yeova vyũ atũkiakisye. (Soma Savuli 27:10.) Ndaviti aĩ na mũĩkĩĩo kana Yeova nũsũvĩaa ala mataasũvĩwa nĩ andũ moo ũndũ vaĩle. Yeova ekaa ũu ata? Atũmĩaa athũkũmi make aĩkĩĩku. Ana-a-asa na eĩtu-a-asa kĩkundinĩ nĩmatwendete o tondũ andũ ma mũsyĩ matonya kwĩthĩwa matwendete. Kwa ngelekanyʼo, ve ĩvinda Yesũ waisye kana ala mathaithaa Yeova, nĩmo maĩ ta ana-a-inyia, eĩtu-a-inyia, na aa-inyia make.—Mt. 12:48-50.

10. Mũtũmwa Vaulo eanĩasya kĩanda kyake ata e mũtumĩa?

¹⁰ Kwaeka twone ngelekanyʼo ĩmwe ĩtwonetye ũndũ ana-a-asa na eĩtu-a-asa kĩkundinĩ matonya kwĩthĩwa matwendete ta andũ ma mũsyĩ. Mũtũmwa Vaulo aĩ mũtumĩa wa kĩkundi wĩ kĩthito na mũĩkĩĩku. We mwene aĩ ngelekanyʼo nzeo mũno, na nĩwaveveewe nĩ Ngai atavye Aklĩsto ala angĩ maatĩĩe ngelekanyʼo yake o tondũ we waatĩĩaa ngelekanyʼo ya Klĩsto. (1 Ako. 11:1) Kwoona ũndũ ĩvinda yĩmwe Vaulo waeleisye ũndũ weanĩasya kĩanda kyake e mũtumĩa. Aisye atĩĩ: “Tweethĩiwe twĩ auu o tondũ mũndũ mũka ũkwongya ũthĩnĩkĩaa syana syake mwene.” (1 Ath. 2:7) O ta Vaulo, atumĩa aĩkĩĩku ũmũnthĩ no matũmĩe ndeto nzeo na syĩ mũyo yĩla meũkiakisya ala me na thĩna maitũmĩa Maandĩko.

11. Nĩ kyaũ kyonanasya kana ti atumĩa me oka matonya kũkiakisya angĩ?

¹¹ No atumĩa me oka matonya kũkiakisya ala maũmĩiwʼe? Aiee. Ithyonthe nĩtwaĩle ‘kũendeea kũkiakianyʼa.’ (1 Ath. 4:18) Eĩtu-a-asa aima kĩ-veva nĩmatonya kũkiakisya mũno eĩtu-a-asa ala me na vata wa ũkiakisyo. O na ti ũsengyʼo kwona Yeova Ngai ayasya kana yĩla ũkũkiakisya angĩ amakiakiasya tondũ mwana ũkiakiawʼa nĩ inyia. (Isa. 66:13) Mbivilianĩ ve aka mawetetwe vo makiakĩisye andũ maĩ na thĩna. (Yovu 42:11) Yeova atanaa mũno oona aka Aklĩsto ũmũnthĩ maikiakisya eĩtu-a-asa ala angĩ me na thĩna mwingĩ wa ngoo! Mavinda amwe mũtumĩa ũmwe, kana o elĩ, no aneene na ũĩ na mwĩĩtu-a-asa mũima kĩ-veva amũkũlye ethĩwa nũtonya kũtetheesya mwĩĩtu-a-asa ũngĩ ũkũthĩnĩka.b

TŨTONYA KŨMAKIAKISYA ATA?

12. Twĩthĩawa twĩ metho tũikeke ata?

¹² Nũseo tũkethĩwa twĩ metho tũikakũlĩĩlye mũno ĩũlũ wa ũndũ mũna mwana-a-asa kana mwĩĩtu-a-asa ũla tũũneena nake ũtekwenda kũtũtavya. (1 Ath. 4:11) Ĩndĩ tũtonya kũmatetheesya ata ala mekwenda kũkiakiwʼa? Ekai tũneenee maũndũ atano mawetetwe Maandĩkonĩ tũtonya kwĩka tũkamatetheesya.

13. O tondũ vonanĩtwʼe ĩandĩkonĩ ya 1 Asumbĩ 19:5-8, mũlaĩka wa Yeova atetheeisye Eliya ata? Tũtonya kũatĩĩa ngelekanyʼo ya mũlaĩka ũsu ata?

¹³ Ĩka ũndũ ũmatetheesye. Yĩla mwathani Eliya wakĩĩte ala mendaa kũmũaa, akwie ngoo nginya enda kũkwʼa. Yeova nĩwatũmie mũlaĩka wĩ vinya akatetheesye mũndũũme ũsu wakwʼĩte ngoo. Mũlaĩka ũsu nĩwamũnengie ũtethyo ũla wendaa mũno ĩvindanĩ yĩu. Amũnengie lĩu ũtanamba kũvoa na amwĩkĩa vinya aye. (Soma 1 Asumbĩ 19:5-8.) Ngewa ĩsu ĩtũtetheeasya kũmanya ũndũ wa vata, nawʼo nĩ: Kwĩka mũndũ o kaũndũ kaseo mavinda amwe no kũmũtetheesye mũno. Kwa ngelekanyʼo, no tũue lĩu tũkaĩsanĩa nake, tũkamũnenga kamũthĩnzĩo, kana tũkamũandĩkĩa o kavalũa. Kwĩka ũu no kũmũĩkĩĩthye kana nĩtũmwendete na nĩtũmũthĩnĩkĩaa. No twĩke maũndũ ta asu o na yĩla tũkwĩwʼa tũte eanĩe kũneenea maũndũ ala meũmũthĩnyʼa ngoonĩ kana meũtuma aũmĩa.

14. Ngewa ya Eliya ĩtũmanyĩasya ũndũ wĩva?

¹⁴ Tetheesya ala meũthĩnĩka mewʼe me asũvĩĩku na me eanĩe. Ve ũndũ ũngĩ tũtonya kwĩmanyĩsya twasũanĩa ngewa ya Eliya. Yeova nĩweekie kyama anenga mwathani ũsu ũtethyo ũla wendaa nĩ kana avike Kĩĩmanĩ kya Olevu, o na kau kyaĩ vaasa kuma vala waĩ. No kwĩthĩwa Eliya eewʼaa e mwĩanĩe e kũu kũasa Yeova watianĩie ũtianĩo na andũ make myaka mingĩ mĩvĩtu. Nĩvatonyeka akethĩwa eewʼaa vau ũĩ ndamba kũvikĩwa nĩ ala mendaa kũmũũmĩsya. Ũndũ ũsu wĩtũmanyĩsya kyaũ? Ethĩwa nĩtũkwenda kũkiakisya ala maũmĩĩtwʼe, nũseo tũkamba kũmatetheesya mewʼe me asũvĩĩku. Kwa ngelekanyʼo, atumĩa nĩmaĩle kũlilikana kana mwĩĩtu-a-asa ũkwĩwʼa aũmĩĩte nũtonya kwĩwʼa e mwĩanĩe mũnango na e mũsũvĩĩku aikunda kyai me kwake mũsyĩ, vandũ va kũneena nake me kasũmbanĩ ke Nyũmbanĩ ya Ũsumbĩ. Ũngĩ nake nũtonya kwĩwʼa e mwĩanĩe maineena nake Nyũmbanĩ ya Ũsumbĩ, ĩndĩ ti mũsyĩ.

15-16. Kwĩthukĩĩsya nesa kũkonetye maũndũ meva?

¹⁵ Methukĩĩsye nesa. Mbivilia ĩtũtaĩte ũũ: “Kĩla ũmwe no nginya ethĩwe e mĩtũkĩ ya kwĩthukĩĩsya, ate na mĩtũkĩ ya kũneena.” (Yak. 1:19) Ithyĩ nĩtwĩthukĩĩasya ala angĩ nesa? Nĩtũtonya kwĩthĩwa tũsũanĩaa kana kwĩthukĩĩsya angĩ nesa no kũmasyaĩĩsya tũteũweta ũndũ o na ũmwe. Ĩndĩ kwĩthukĩĩsya mũndũ nesa ti kwĩka ũu tũ. Kwa ngelekanyʼo, Eliya nĩwesie kũtavya Yeova vyũ ũndũ weewʼaa aithĩnĩka, nake Yeova nĩwamwĩthukĩĩisye nesa mũno. Yeova nĩwaeleiwe kana Eliya eewʼaa wia, na eewʼaa ta watiĩtwe e weka. O na nĩwaeleiwe kana eewʼaa wĩa ũla wʼonthe watethetye ta waĩ wa mana. Yeova nĩwamũtetheeisye o nesa aeke kwĩwʼa ũu. Yĩla weekie ũu, oonanisye kana nĩwamwĩthukĩĩsye Eliya nesa.—1 Asu. 19:9-11, 15-18.

¹⁶ Kwĩwʼĩa angĩ tei na ĩnee kwonanasya nĩtũmendete. Kwoou tũtonya kwĩka ũu ata yĩla tũmethukĩĩsye? Mavinda amwe kũneena na ũĩ tũtũmĩĩte ndeto nzeo na ite mbingĩ nĩkũtonya kwonyʼa ũla wĩkĩtwe naĩ ũndũ ithyĩ tũkwĩwʼa. No ũtũmĩe ndeto ta: “Mwa nĩ vole mũno nũndũ wa kĩu kyaũkwatie! Mwana ndaĩle kwĩkwa ũndũ ta ũsu!” O na no ũmũkũlye ĩkũlyo yĩmwe kana elĩ nĩ kana ũelewe nesa kĩla ũkũũtavya. Kwa ngelekanyʼo, no ũmwĩe, “No ũndetheesye kũelewa kĩla waweta?” kana ũkamwĩa, “Yĩla waweta ũu, naelewa . . . Nĩnakũelewa nesa?” Kwasya ũu no kũmũĩkĩĩthye kana kwa wʼo nũmwĩthukĩĩsye nesa, na nũkwenda kũelewa kĩla ũkũũtavya.—1 Ako. 13:4, 7.

17. Nĩkĩ twaĩle kwĩthĩwa na wũmĩĩsyo na tũte na “mĩtũkĩ ya kũneena”?

¹⁷ Ĩndĩ waĩle kwĩthĩwa wĩ metho ndũkethĩwe na “mĩtũkĩ ya kũneena.” Ndũkamũtilĩle aendeee kũneena ũmũnenge ũtao kana ũvĩndũe woni wake. O na nĩwaĩle kwĩthĩwa na wũmĩĩsyo. Yĩla Eliya wesie kũmũtulũĩla Yeova ngoo yake, amũtavisye ndeto ngito sya mũndũ ũkwʼĩte ngoo. Ĩndĩ o na ĩtina wa Yeova kũlũlũmĩlya mũĩkĩĩo wa Eliya, asyokie amũtavya ĩngĩ ũndũ ũkwĩwʼa atũmĩĩte ndeto o ila ila. (1 Asu. 19:9, 10, 13, 14) Twĩĩmanyĩsya kyaũ? Mavinda amwe andũ ala makwʼĩte ngoo nĩmendaa kũweta ĩngĩ na ĩngĩ ũndũ mekwĩwʼa. O ta Yeova, nĩtwaĩle kũmomĩĩsya yĩla tũmethukĩĩsye. Vandũ va kwambĩĩa kũmatavya kĩla maĩle kwĩka, twaĩle kwĩthĩwa na tei na ĩnee.—1 Vet. 3:8.

18. Kũvoya na ũla ũkũthĩnĩka kũtonya kũmũkiakisya ata?

¹⁸ Voya namo, na ũivoya na kĩthingʼĩĩsyo kuma ngoonĩ. Ala makwʼĩte ngoo mũno nĩmatonya kũemwa nĩ kũvoya. Andũ ta asu no mewʼe mate ma vata methonĩ ma Yeova ũkethĩa meĩwʼa mataĩle kũmũvoya. Ethĩwa nĩtũkwenda kũkiakisya mũndũ ta ũsu, no tũvoye nake, na tũiweta ĩsyĩtwa yake yĩla tũũvoya. O na no tũmũelesye Yeova mboyanĩ ĩsu ũndũ ithyĩ ene twonaa Mũklĩsto ũsu e wa vata, na ũndũ ana-a-asa na eĩtu-a-asa kĩkundinĩ mamwendete. Nũndũ Yeova nũmwendete mũno, no tũmũkũlye amũkiakisye na aimũtetheesya ausye. Mboya sya mũthemba ũsu no imũkiakisye mũno.—Yak. 5:16.

19. Nĩ kyaũ kĩtonya kũtũtethya twĩyũmbanyʼe nesa nĩ kana tũkiakisye angĩ?

¹⁹ Nyuva ndeto ikũtuma mewʼa kavaa na iũmakiakisya. Sũanĩa ũtanamba kũneena. Ndeto itasũanĩĩtwe nesa no iũmĩsye mũndũ. Manya kana ndeto nzeo no itume ewʼa nesa. (Nth. 12:18) Kwoou mũvoye Yeova aũtetheesye ũkwate ndeto nzeo, syĩ na ĩnee, na sya kũkiakisya. Lilikana kana vai ndeto nzeo na syĩ ũtonyi kwĩ ila sya Yeova tũkwataa Mbivilianĩ.—Aevl. 4:12.

20. Ana-a-asa na eĩtu-a-asa ala maũmĩiwʼe matonya kwĩthĩwa mesũanĩaa ata, ĩndĩ twĩenda kũmalilikanyʼa kyaũ?

²⁰ Ana-a-asa na eĩtu-a-asa ala maũmĩiwʼe nĩmatonya kwĩthĩwa meanĩte mesĩ ti ma vata, nĩ avuku, na mayona ti ta ve mũndũ ũmendete, o na no mone mate na ũseo o na ũmwe ũtuma andũ mamenda. Ũsu nĩ ũvũngũ mũthũku mũno! Kwoou tata ũtũmĩe Maandĩko ũmalilikanyʼe kana Yeova nũmendete mũno vyũ. (Sisya ĩsandũkũ “Ũkiakisyo Ũla wĩ Maandĩkonĩ.”) Lilikana ũndũ mũlaĩka weekĩie mwathani Ndanieli vinya yĩla waĩ mũtũlĩku ngoo. Yeova nĩwendaa amanye ũndũ wamwendete mũno. (Nda. 10:2, 11, 19) O ta ũu, ana-a-asa na eĩtu-a-asa ala makwʼĩte ngoo nĩ ma vata mũno kwa Yeova!

21. Nĩ kyaũ kĩkilyĩ kũmakwata ala mekaa andũ maũndũ mathũku matekwĩlila, na twaĩle kwĩthĩwa tũtwʼĩte kwĩka ata ĩvindanĩ yĩĩ?

²¹ Yĩla tũũkiakisya angĩ, twĩthĩawa tũimalilikanyʼa kana Yeova nũmendete. Na tũyaĩle kũlwa kana Yeova nĩ Ngai wendete ũsili wa katĩ. Vai ũndũ o na ũmwe mũthũku mũvithanyʼe methonĩ make. Yeova nĩwonaa kĩla kĩndũ, na akamasilĩla ala mekaa andũ maũndũ mathũku matekwĩlila. (Mot. 14:18) Ĩndĩ ĩvindanĩ yĩĩ, ekai twĩke kyonthe kĩla tũtonya tũĩkĩĩthye ala maatũmĩwa maũndũnĩ makonetye kũmanyana kĩ-mwĩĩ kana nĩtũmendete. Na eka ũu, nĩ ũndũ wa kũtanĩthya ta kĩ kũmanya kana Yeova akavosya vyũ ala maũmĩĩtwʼe nĩ Satani na nthĩ ĩno yake nthũku! O mĩtũkĩ, maũndũ asu mathũku na me woo maikalilikanwa, o na matikalika ngoonĩ ĩngĩ.—Isa. 65:17.