Yĩla Ngai Ũkũsilĩla Andũ, We Nũmanengae Ũkanyʼo kwĩ Tene?

KWASŨANĨA ũmwe wa andũ ala masomeete maũndũ ma nzeve aitata kũsisya ũndũ nzeve ĩkwĩthĩwa ĩilye. Asisya ayona ve kĩuutani kĩnene kĩtonya kwĩsĩla vandũ vana vatwĩe andũ aingĩ. Na nũndũ nũkũthĩnĩkĩa mũno kwona andũ me asũvĩĩku, aitata ũndũ ũtonya amakanyʼe kwĩ tene.

O ta ũu, ũmũnthĩ Yeova nũendeee kũkanyʼa andũ ĩũlũ wa kĩuutani kĩthũku mũno kwĩ kĩla matonya kwĩwʼa livotinĩ sya nzeve. Aendeee kwĩka ũu ata? Na tũtonya kũmanya ata kana nũnengete andũ ĩvinda yĩanĩtye ya kwosa ĩtambya? Nĩ kana tũkwate mosũngĩo, ekai twambe kũneenea mavinda Ngai waumisye ũkanyʼo kwĩ tene.

MAVINDA NGAI WAUMISYE ŨKANYʼO KWĨ TENE

Ĩvindanĩ ya tene, ve mavinda Yeova wakanisye andũ ĩũlũ wa iuutani sya ngelekanyʼo, kana ũsilĩlo ũla wesaa kũetea andũ ala meũlea kũatĩĩa mĩao yake. (Nth. 10:25; Yel. 30:23) Mavindanĩ asu nĩwakanasya andũ kwĩ tene, na aimatavya ĩtambya yĩla maĩle kwosa nĩ kana monanyʼe nĩmeũmwĩwʼa. (2 Asu. 17:12-15; Nee. 9:29, 30) Na nĩ kana ekĩe andũ vinya meke moalyũku, mavinda maingĩ atũmĩaa athũkũmi make aĩkĩĩku ala me kũũ nthĩ kũtangaasa ũsilĩlo wake, na kũtetheesya andũ mamanye nĩkĩ maĩle kwosa ĩtambya na mĩtũkĩ.—Amo. 3:7.

Ũmwe woo aĩ Noa. Kwa ĩvinda ya myaka mingĩ, nĩweekĩie kĩthito ateũkĩa akanyʼe andũ ala maĩ na mwĩkalĩle mũthũku na maĩ angʼendu ĩũlũ wa mbua nene ĩla yesaa kua ĩũlũ wa nthĩ. (Mwa 6:9-13, 17) O na nĩwamatavisye kĩla maĩle kwĩka nĩ kana mavonoke. Aĩ na kĩthito kingĩ nginya eetwa “mũtavanyʼa wa ũlũngalu.”—2 Vet. 2:5.

O na kũtwʼĩka Noa aĩ na kĩthito, andũ ma ĩvinda yĩu mayaaĩthukĩĩsya ũkanyʼo ũla watũmĩtwe nĩ Ngai amanenge. Moonanisye kana mayaĩ na mũĩkĩĩo o na vanini. Na nũndũ wa ũu, nĩmakwie yĩla mbua ya kĩwʼũ kingĩ “yookie na yamamina onthe.” (Mt. 24:39; Aevl. 11:7) Mũthya woo wavika, mayaĩ mesa kwasya kana Ngai ndaamakanyʼa.

Mavinda angĩ, Yeova nĩwaumasya ũkanyʼo vatialĩte kavinda kakuvĩ ũsilĩlo wake wambĩĩe. O na vailye ũu, nĩwaĩkĩĩthasya kana ala maĩ makwate ũsilĩlo me na ĩvinda yĩanĩtye ya kũvĩndũka. Kwa ngelekanyʼo, nĩwanenganae ũkanyʼo kwĩ tene atanamba kũete ala Mothĩnyʼo Ĩkũmi makwatie nthĩ ya Misili. Ta kwa ngelekanyʼo, Yeova nĩwatũmie Mose na Aluni makakanyʼe Valao na athũkũmi make ĩũlũ wa ũthĩnyʼo wa mũonza wa mbua ya mavia, ũla waĩ ũete wanangĩko mũnene. Nũndũ ũthĩnyʼo ũsu waĩ wũke mũthenya ũla waatĩĩe, we Ngai nĩwanenganie ĩvinda yĩanĩtye ya kũmantha wĩvitho nĩ kenda maikakwatwe nĩ mbua ĩsu? Mbivilia yaĩtye: “Ũla wakĩie ndeto ya Yeova athũkũminĩ ma Valao atuma athũkũmi make na indo syake ikũka ilike nyũmbanĩ: nake ũla ũtaaona ndeto ya Yeova ta kĩndũ atia athũkũmi make na indo syake kĩsesinĩ.” (Kuma 9:18-21) Kwa wʼo, Yeova nĩwanenganie ũkanyʼo ve ĩvinda yĩanĩtye, nũndũ ala moosie ĩtambya na mĩtũkĩ mayaakwata ũthĩnyʼo ta ala angĩ.

O ta ũu, Valao na athũkũmi make nĩmakaniwʼe ũthĩnyʼo wa ĩkũmi ũte mũviku. O na vailye ũu, nĩmeekie ũndũ wa ũtumanu kwa kũlea ũkanyʼo ũsu. (Kuma 4:22, 23) Nũndũ wa ũu, makithathi moo nĩmakwie. Ũsu nĩ ũndũ wa kũmakya ta kĩ! (Kuma 11:4-10; 12:29) Ve ũndũ maĩ matonya kwĩka ũthĩnyʼo ũsu ũte mũviku? Ĩĩ! Twĩsĩ ũu ata? Mose atekwananga ĩvinda nĩwakanisye Aisilaeli ĩũlũ wa ũthĩnyʼo wa ĩkũmi ũla wookĩte, na amatavya ũndũ maaĩle kwĩka nĩ kana matangĩĩe mĩsyĩ yoo. (Kuma 12:21-28) Mũthya, andũ milioni itatũ, ala maĩ Aisilaeli vamwe na “nguthu ya elikya” ya andũ mataĩ Aisilaeli na angĩ maĩ Amisili, nĩmamwĩthukĩĩisye Yeova na mauma Misili.—Kuma 12:38.

O tondũ ngelekanyʼo isu syoonanyʼa, kĩla ĩvinda Yeova nĩwanengae andũ ĩvinda yĩanĩtye ya kũatĩĩa ũkanyʼo wake. (Kũt. 32:4) Nĩkĩ Ngai weekaa ũu? Mũtũmwa Vetelo aeleisye kana Yeova ndendaa mũndũ “o na ũmwe . . . anangwe, ĩndĩ endaa onthe mavikĩe kwĩlila.” (2 Vet. 3:9) Vate nzika, Ngai nĩwathĩnĩkĩaa andũ. Endaa andũ melile na mayĩka moalyũku ũsilĩlo ũte mũviku.—Isa. 48:17, 18; Alo. 2:4.

ŨNDŨ ANDŨ MATONYA KWĨTĨKĨLA ŨKANYʼO WA NGAI ŨMŨNTHĨ

O na ũmũnthĩ, no nginya andũ onthe metĩkĩle ũkanyʼo wa vata ũla ũendeee kumwʼa ĩũlũ wa nthĩ. Yĩla Yesũ waĩ ĩũlũ wa nthĩ, nĩwanenganie ũkanyʼo asya kana nthĩ ĩno nthũku ĩkaanangwa ĩvinda ya ũla “thĩna mũnene.” (Mt. 24:21) O na nĩwathanie nesa maũndũ ala aatĩĩi make mesaa kwona ĩvinda yĩu yathengeea. Kwoou Yesũ nĩwaeleisye maũndũ manene ala tũendeee kwona mayĩkĩka ũmũnthĩ.—Mt. 24:3-12; Luka 21:10-13.

Nũndũ tũtwĩe ĩvindanĩ yĩla wathani ũsu ũendeee kwĩanĩa, Yeova aendeee kũthangaasya andũ onthe ũmũnthĩ matwʼe kũmũthũkũma na kũmwĩwʼa. Endaa andũ ala mamwĩwʼaa matanĩe kwĩkala thayũ ivindanĩ yĩĩ na maikwata moathimo ĩvinda yũkĩte, yĩla ũkatwʼĩkĩthya maũndũ meũ ĩtunĩ na nthĩ. (2 Vet. 3:13) Nĩ kana atetheesye andũ maĩkĩĩe mawatho asu, nũnenganĩte ũvoo ũtonya kũmatangĩĩa. Ũsu nĩ ‘ũvoo mũseo wa Ũsumbĩ,’ ũla Yesũ waisye “ũkatavanwʼa nthĩ yonthe wĩthĩwe ũkũsĩ kwa mbaĩ syonthe.” (Mt. 24:14) Ngai nĩwũmbanĩtye athaithi make ma wʼo nĩ kana manengane “ũkũsĩ” ũsu, kana matavanyʼe ũvoo wake, nthĩnĩ wa nthĩ ta 240. Yeova endaa andũ aingĩ ũndũ vatonyeka methukĩĩsye ũkanyʼo ũsu, na maivonoka kĩuutani kĩla kyũkĩte kya ũsilĩlo wake mũlũngalu.—Nzev. 1:14, 15; 2:2, 3.

Kwoou o na tũi na vata wa kwĩkũlya ethĩwa Yeova nũnengae andũ mwanya ũtoetye wa kũatĩĩa ũkanyʼo wake, kana ndamanengae. Na kĩtumi nũndũ twĩ na ũĩkĩĩthyo mwingĩ ũkwonanyʼa kana kĩla ĩvinda akanasya andũ kwĩ tene. Ĩndĩ yu no twĩkũlye-ĩ, ‘Mo andũ nĩmekwĩthukĩĩsya ũkanyʼo wa Ngai ĩvinda yĩtanathela?’ Ekai ithyĩ tũendeee kũtetheesya andũ aingĩ ũndũ vatonyeka mavonoke mũminũkĩlyo wa nthĩ ĩno nthũku.