Yĩla Ngai wasumbĩkĩte kĩla kĩndũ, syũmbe syake syonthe syeethĩawa na ngwatanĩo na mũuo
Nĩkĩ twĩ na Vata wa Ũsumbĩ wa Ngai?
Yĩla asyai maitũ ma mbee moombiwe, Yeova, ũla nĩwe Mũmbi, nĩwe waĩ Mũsumbĩki e weka. Asumbĩkĩte andũ kwa nzĩa ya wendo. Nĩwaseũvĩsye andũ mũsyĩ mũseo nĩ kana mekalae vo, na amanenga lĩu mwingĩ. Mũsyĩ ũsu wamaseũvĩsye nĩ mũũnda wa Eteni. O na ĩngĩ, nĩwanengie andũ wĩa mũseo wa kũtethya. (Mwambĩlĩlyo 1:28, 29; 2:8, 15). Ta kethĩwa asyai asu maitũ ma mbee nĩmeetĩkĩlile kũsumbĩkwa nĩ Ngai, ũmũnthĩ andũ methĩwa mekalaa na mũuo.
Andũ ma mbee nĩmaleile kũsumbĩkwa nĩ Ngai
Mbivilia yonanĩtye kana mũlaĩka ũte mwĩwi, ũla wesie kwĩtwa Satani kana Ndevili, nĩwavĩngie nzĩa ya Ngai ya kũsumbĩka. Nĩwoonanisye kana andũ no mekale nesa mate kũsumbĩkwa nĩ Ngai. Ũndũ wa kũsengyʼa nĩ kana, asyai maitũ ma mbee Atamu na Eva, nĩmaatĩĩie ũvũngũ wa Satani na onthe malea kũsumbĩkwa nĩ Ngai.—Mwambĩlĩlyo 3:1-6; Ũvuanyʼo 12:9.
Nũndũ wa kũmũlea Ngai ta Mũsumbĩ woo, Atamu na Eva nĩmaanangie ngwatanĩo yoo nzeo nake. Ũu nĩwatumie masya mũsyĩ woo mũseo ũla maseũvĩwʼe nĩ Ngai. O na nĩmaaisye wĩkwatyo wa kwĩkala tene na tene mate na thĩna o na ũmwe wa mwĩĩ. (Mwambĩlĩlyo 3:17-19) Ũtwi woo nĩwatumie o na syana ila mesie kũsyaa ilika thĩnanĩ. Mbivilia yaĩtye kana nũndũ Atamu nĩwavĩtisye, “naĩ yalikile ĩũlũ wa nthĩ na kĩkwʼũ kwĩsĩla naĩ.” (Alomi 5:12) Naĩ nĩyatumie andũ malika thĩnanĩ ũngĩ mũnene. Mbivilia ĩineenea thĩna ũsu yaĩtye, ‘mũndũ nũmũsumbĩkaa mũndũ kwa kũmũũmĩsya.’ (Mũtavanʼya 8:9) Kwa ndeto ingĩ, no twasye kana mũndũ asumbĩka ũngĩ mathĩna mailea kwĩthĩwa.
ŨNDŨ ŨSUMBĨKI WA MŨNDŨ WAMBĨĨIE
Nimiloti nĩwamũvĩngie Yeova
Mũndũ wa mbee ũla ũwetetwe Mbivilianĩ ta waĩ mũtongoi nĩ Nimiloti. Na nĩwavĩngaa ũsumbĩki wa Yeova. Kuma ĩvinda yĩu, andũ aingĩ ala methĩĩtwe matongoesye andũ matũmĩaa ũkũmũ woo naĩ. Myaka 3,000 mĩvĩtu, Mũsumbĩ Solomoni aisye: “Na, sisya, methoi ma ala mathĩnawʼa, na matyaĩ na mũkiakisya; na ngalĩ ĩla ya athĩnanʼya moo kwaĩ vinya; ĩndĩ matyaĩ na mũkiakisya.”—Mũtavanʼya 4:1.
Maũndũ mayaalyũka kũvikĩĩa o na ũmũnthĩ. Mwakanĩ wa 2009, ĩvuku yĩmwe ya Ngwatanĩo ya Nthĩ (UN) yaisye atĩĩ: “Andũ aingĩ nĩmaendeee kũmanya kana mathĩna maingĩ ala me ĩũlũ wa nthĩ, maumanĩte na ũsumbĩki mũthũku.”
ĨVINDA YA NGAI YA KŨVETANGA MOSUMBĨ MA ANDŨ
Andũ me na vata wa kũtongoewʼa nĩ asumbĩki aseo na silikalĩ nzeo. Na ũu nowʼo Mũmbi waitũ ũtwathĩte kwĩka.
O na asumbĩ ala aseo vyũ ma andũ nĩmaemetwe nĩ kũmina mathĩna manene ala matũkwataa
Ngai nĩwũngamĩtye Ũsumbĩ, kana silikalĩ, ũla ũkasumbĩka vandũ va mosumbĩ ma andũ, na “ũkekalaa tene na tene.” (Ndanieli 2:44) Ũsumbĩ ũsu nĩwʼo andũ milioni mbingĩ methĩĩtwe maivoya. (Mathayo 6:9, 10) Ĩndĩ Ngai mwene ti we ũkethĩwa Mũsumbĩ wa Ũsumbĩ ũsu. Nũnyuvĩte ũngĩ eĩthĩwa Mũsumbĩ wa Ũsumbĩ ũsu. Ũla ũnyuvĩtwe nĩwekalile vaa ĩũlũ wa nthĩ e mũndũ ĩvinda yĩmwe. Nĩ Mũsumbĩ wĩva ũsu Ngai ũnyuvĩte?