Ndũkesiĩĩe—Kũsinda Mesilya ma Kwĩwʼa Ũtatonya
1. Nĩkĩ amwe maemawa nĩ kũkũlya mũndũ kana no ende kwĩmanyĩsya Mbivilia?
1 Nũemawa nĩ kũkũlya mũndũ kana no ende kwĩmanyĩsya Mbivilia nũndũ wa kwĩwʼa ta ũtatonya kũmanyĩsya nesa? Mavinda amwe athũkũmi aĩkĩĩku ma ĩvinda ĩvĩtu, ta Mose na Yelemia meewʼaa matatonya kwĩanĩsya mawĩa ala manengetwe. (Kuma 3:10, 11; 4:10; Yel. 1:4-6) Kwoou, kwĩwʼa ũu nĩ ũndũ ũkwataa andũ. Kwĩwʼa ũu kũtonya kũsindwa ata?
2. Nĩkĩ tũtaĩlĩte kwĩanĩwa nĩ kũtavanyʼa o nyũmba na nyũmba na kũekea angĩ wĩa wa kũmanyĩsya andũ Mbivilia?
2 Twaĩle kũlilikana kana Yeova ndatũnengae o na ĩndĩĩ wĩa tũtatonya kwĩanĩsya. (Sav. 103:14) Kwoou, wĩa ũla tũnengetwe wa ‘kũtwʼĩkĩthya amanyĩwʼa,’ ‘tũkĩmamanyĩsya,’ nĩ ũndũ tũtonya kwĩanĩsya. (Mt. 28:19, 20) Yeova ndanengete kĩanda kĩĩ o amwe maitũ ala me na ũmanyi mwingĩ kana kĩnengo. (1 Ako. 1:26, 27) Kwoou, tũyaĩlĩte kwĩanĩwa nĩ kũtavanyʼa o nyũmba na nyũmba na tũyĩekea angĩ wĩa wa kũmanyĩsya andũ Mbivilia.
3. Yeova atũtonyethetye ata kwĩanĩsya wĩa wa kũmanyĩsya andũ Mbivilia?
3 Yeova Nĩwe Ũtũtonyethasya: Nĩ Yeova ũtũnengae ũtonyi wa kũtwʼĩkĩthya amanyĩwʼa. (2 Ako. 3:5) Kwĩsĩla ũseũvyo wake nũtũmanyĩĩtye ũwʼo wa Mbivilia ũla o na andũ ala asomu mũno ma nthĩ ĩno matawĩsĩ. (1 Ako. 2:7, 8) Nĩwĩkĩĩte Mbivilianĩ ũvoo mwingĩ ĩũlũ wa nzĩa sya kũmanyĩsya sya ũla Mwalimũ Mũnene, Yesũ, nĩ kana tũiatĩĩe, na nũtũmanyĩasya kĩla ĩvinda ũndũ tũtonya kũmanyĩsya andũ kwĩsĩla kĩkundi. Ĩngĩ, Yeova nũtũnengete mavuku ma kũtũmĩa kwĩmanyĩsya Mbivilia na andũ. Nũtũnengete mavuku ta Mbivilia Ĩmanyĩasya, ĩvuku yĩla ĩmanyĩasya ũwʼo kwa nzĩa yĩ laisi kũeleeka. No wĩthĩwe kũmanyĩsya mũndũ Mbivilia ũte ũndũ wĩ vinya mũno ũndũ tũkwĩsilya.
4. Nĩkĩ tũtonya kwĩthĩwa na wĩkwatyo kana Yeova akatũtetheesya?
4 Kwĩsĩla ũtethyo wa Yeova, Mose na Yelemia nĩmeanĩisye mawĩa ala manengetwe. (Kuma 4:11, 12; Yel. 1:7, 8) O naitũ no tũmũkũlye Yeova atũtetheesye, nũndũ ĩla tũũmanyĩsya mũndũ Mbivilia, twĩthĩawa tũimũmanyĩsya ũwʼo ĩũlũ wake, ũla nĩ ũndũ wendeeasya methonĩ make. (1 Yoa. 3:22) Kwoou, twʼa wĩthĩwe na kĩanda wĩanĩ wa kũmanyĩsya andũ Mbivilia, kĩlungu kya ũtavanyʼa kĩla kĩtanĩthasya mũno na kĩ moathimo.