Ndũkesiĩĩe—Ũndũ Ũtonya Kwĩka Ethĩwa Nũkwatene
1. Nĩkĩ amwe makĩaa kũkũlya mũndũ kana no ende kwĩmanyĩsya Mbivilia?
1 Amwe nĩmakĩaa kũkũlya mũndũ kana no ende kwĩmanyĩsya Mbivilia nũndũ methĩawa makwatene. Kũmanyĩsya mũndũ Mbivilia nĩkũkuaa ĩvinda. Ĩvinda nĩyendekaa kwondũ wa kwĩyũmbanyʼa, kũmũmanyĩsya, na kũmũtetheesya mũmanyĩwʼa asinde maũndũ ala matonya kũmũsiĩĩa ndakeke maendeeo. Mũtũmwa Vaulo aisye kana we nĩwanenganie thayũ wake nĩ kana atetheesye ala maĩ Thesalonika mamũmanye Yeova. (1 Ath. 2:7, 8) Tũtonya kũkwata ĩvinda ata kũmanyĩsya mũndũ Mbivilia o na ethĩwa nĩtũkwatene?
2. Kũmwenda Yeova kũtumaa tũtũmĩa ĩvinda yitũ ata?
2 Kũmũthũkũma Yeova Nĩkũkuaa Ĩvinda: Nĩ wʼo kana kũmũthũkũma Yeova nĩkũkuaa ĩvinda. Kwa ngelekanyʼo, nũtũmĩaa ĩvinda kwondũ wa kũthi maũmbanonĩ, kũtavanyʼa, kũsoma Mbivilia, na kũvoya. Mũndũ ũtwaanĩte na wĩthĩawa akwatene nũtanĩaa kũmantha ĩvinda atũmĩe vamwe na ũla matwaanĩte. Nata ithyĩ, tũyaĩle mũno ‘kũtangĩĩa’ ĩvinda na tũyĩĩtũmĩa kũmũthaitha Yeova nũndũ nĩtũmwendete? (Aev. 5:15-17; 1 Yoa. 5:3) Kwosana na Yesũ, wĩa wa kũtwʼĩkĩthya amanyĩwʼa nĩ kĩlungu kya vata kya ũthaithi witũ. (Mt. 28:19, 20) Kũsũanĩĩa ĩũlũ wa ũu kũkatũtetheesya kwĩtĩkĩla kĩanda kya kũmanyĩsya andũ Mbivilia.
3. Tũtonya ata kũthĩnĩkĩa mũmanyĩwʼa wa Mbivilia o na ĩla mĩvango yitũ ya ũtavanyʼa yaanangĩka?
3 Nata ethĩwa mĩvango yitũ ĩkaanangwa nĩ maũndũ ta wĩa wa kũandĩkwa, ũwau wa ĩvinda ĩasa, kana mawĩa ma kĩtheokulasi? Atavanyʼa amwe ala mavinda kwa mavinda methĩawa matatonya kũkwatĩkana mamanyĩasya andũ Mbivilia kwĩsĩla simũ. Ala nũndũ wa mathĩna ma ũwau wa ĩvinda ĩasa matatonya kumaala nĩmavangaa mũmanyĩwʼa oke kwoo mũsyĩ memanyĩĩsye vo. Angĩ nĩmavangaa na mũtavanyʼa ũtonya kwĩkwatwʼa eemanyĩsye vamwe na mũmanyĩwʼa woo ĩla mateũkwatĩkana.
4. Nĩ moathimo maũ maumanaa na wĩa wa kũmanyĩsya andũ Mbivilia?
4 Vaulo nĩwatanĩie mũno kũtũmĩa ĩvinda na vinya wake kũtetheesya angĩ mamanye ũla wʼo. (Meko 20:35) Ĩla wasũanĩĩie ĩũlũ wa andũ ala watetheeisye Thesalonika, Vaulo nĩwamũtũngĩie Yeova mũvea. (1 Ath. 1:2) Kũlea kwĩtĩkĩlya kũkwatana kũtũsiĩĩe kũmanyĩsya andũ Mbivilia nĩkũtonya kwongela ũtanu witũ na tũiendeea kwĩwʼa twĩ eanĩe ũtavanyʼanĩ.