Tũmĩa Kĩsese Kitũ Ũtavanyanĩ Waku

Ĩkĩa Andũ Vinya Matũmĩe jw.org: Amwe ala makĩaa kũneena naitũ kana kũsoma makaseti nĩmendeeawʼa kũmanya mũno ĩũlũ wa Ngũsĩ sya Yeova kwa kũsoma ĩũlũ woo Kĩsesenĩ kya jw.org yĩla me mĩsyĩ kwoo. Kwoou tavya andũ aingĩ ĩũlũ wa Kĩsese kĩĩ kĩla ĩvinda woona vaĩle.

Sũngĩa Makũlyo: Mavinda amwe mwene nyũmba, mũndũ ũkwendeewʼa, kana o mũndũ mwĩsene no akũlye ĩkũlyo ĩũlũ wa Ngũsĩ sya Yeova kana mũĩkĩĩo witũ. Mwonyʼe ũsũngĩo vu kwa vu ũitũmĩa simũ kana kombiũta. Nĩ ũseo mavinda maingĩ kũsoma maandĩko ala monanĩtwʼe ĩmwe kwa ĩmwe kuma Mbivilianĩ. Ethĩwa ndũtonya kũkwata Indaneti kwa mĩtũkĩ, mũelesye mũndũ ũsu ũndũ ũtonya kũtũmĩa Kĩsese kya jw.org kũkwata ũsũngĩo wa ĩkũlyo yake.​—Thi kwa “Mafundisho ya Biblia/Majibu ya Maswali ya Biblia” kana “Kutuhusu/Maswali Yanayoulizwa Mara Nyingi.”

Tũma Ũvoo kana Ĩvuku kwa Mũndũ Ũmwĩsĩ: Ndaonilooti na ũitũma ũvoo kana ĩvuku yĩ mũthemba wa PDF kana EPUB kwĩsĩla Indaneti (e-mail). Kana ũndaonilooti ĩvuku ya kwĩthukĩĩsya wĩkĩe nthĩnĩ wa CD. Kĩla ĩvinda watũmĩa mũndũ ũte mũvatise ĩvuku, mbulosua, kana ĩkaseti yĩ yĩima, no ũyĩtale livotinĩ ya ũtavanyʼa. Ũvoo kana ĩvuku iyaĩle kũtũmĩwa mũndũ ũtamwĩsĩ kana kũtũma syĩ mbingĩ. O na iyaĩle kwĩkĩwa Kĩsesenĩ kĩngĩ kya Indaneti.​—Thi kwa “Machapisho.”

Onanyʼa Maũvoo ma Mĩtũkĩ Ĩũlũ wa Ngũsĩ sya Yeova: Maũvoo ma mĩtũkĩ makatetheesya amanyĩwʼa ma Mbivilia na ala angĩ ũũmatavya maelewe na mone vata wa wĩa witũ wa nthĩ yonthe na wa ngwatanĩo yitũ ya Kĩklĩsto. (Sav. 133:1)​—Thi kwa “Habari.”

[Mũsolo ĩthangunĩ ya 5]

(Wenda kwona maũndũ aa ũndũ mavangĩtwe, sisya ĩthangũnĩ yĩla ĩkyavĩthye)

Tata Kũkĩtũmĩa

1 Wĩ kwa “Machapisho,” nyuva ĩvuku yĩmwe yĩla ũkwenda kũndaonilooti, na ũivinyĩĩa mũthemba ũla ũkwenda, wa kũsoma kana wa kwĩthukĩĩsya.

2 Vinyĩĩa vala vaandĩkĩtwe MP3 nĩ kana wone ilungu syonthe ila syĩ ĩvukunĩ. Vinyĩĩa kyongo kya kĩlungu nĩ kana ũndaonilooti kana vinyĩĩa ▸ wĩthukĩĩsye Indanetinĩ.

3 Nyuva kĩthyomo kĩngĩ kuma kwa ithyomo ila syĩ vo ethĩwa wĩenda kũndaonilooti ĩvuku kwa kĩthyomo kĩu.