Kĩsese Kitũ Kĩseũvĩtwʼe Kĩtũtethye na Kĩitethya Angĩ

Yesũ atwĩaĩe tũtavanyʼe ũvoo mũseo wa Ũsumbĩ “nthĩ yonthe wĩthĩwe ũkũsĩ kwa mbaĩ syonthe.” (Mt. 24:14) Nĩ kana ‘twĩanĩsye vyũ ũthũkũmi witũ,’ Kĩsese kya watchtower.org, jw-media.org, na kya jw.org nĩsyĩkĩĩtwe vamwe na kũseũvya Kĩsese kya jw.org.​—2 Tim. 4:5.

“Nthĩ Yonthe”: Kĩlungu ta kya andũ 33 kwa 100 ĩũlũ wa nthĩ yonthe nĩmatũmĩaa Indaneti. Indaneti ĩtwʼĩkĩte nzĩa ĩla ĩtũmĩawa mũno nĩ andũ aingĩ kũkwata maũvoo, mũno mũno andũ ma mũika. Kĩsese kitũ kĩnengae andũ ala meũkĩtũmĩa mosũngĩo ma wʼo ma makũlyo moo ma Mbivilia. Kĩmatetheeasya kũelewa ũseũvyo wa Yeova na kĩ na nzĩa yĩ laisi ya ­mũndũ kũkũlya amanyĩwʼe ­Mbivilia mũsyĩ vate ndĩvi. Kĩtumaa ũvoo mũseo ũvika kũndũ kũla andũ mate na myanya mingĩ ya kwĩwʼa ũvoo wa Ũsumbĩ.

“Mbaĩ Syonthe”: Nĩ kana tumye ũkũsĩ kwa “mbaĩ syonthe,” ũwʼo wa Mbivilia no nginya ũtavanwʼe kwa ithyomo syĩ kĩvathũkanyʼo. Andũ ala malika Kĩsesenĩ kya jw.org nĩũkwata maũvoo kwa ithyomo ta 400, kũvĩtũka Isese ingĩ syonthe sya Indaneti.

Kĩtũmĩe Nesa: Kĩeleelo kya Kĩsese kya jw.org ti o kumya ũkũsĩ kwa ala mate Ngũsĩ. Kĩseũvĩtwʼe o na Ngũsĩ sya Yeova ikĩtũmĩe. Ethĩwa nũtũmĩaa kana nũtonya kũkwata Indaneti, nĩtũũkwĩkĩa vinya ũkĩmanye nesa Kĩsese kya jw.org. Nzĩa ii iatĩĩe nĩ sya kwonanyʼa ũndũ kĩsese kĩĩ kĩtonya kũtũmĩwa.

[Mũsolo ĩthangũni ya 3]

(Wenda kwona maũndũ aa ũndũ mavangĩtwe, sisya ĩthangũnĩ yĩla ĩkyavĩthye)

Tata Kũkĩtũmĩa

1 Andĩka www.jw.org/sw vala vaĩle kũandĩkwa ĩsyĩtwa ya Kĩsese wavingũa Indaneti kombiũtanĩ yaku.

2 Lika kũndũ kwĩ kĩvathũkanyʼo kwa kũvinyĩĩa syongo sya ilungu, maũndũ ala ũkwenda, na kwa kũvinyĩĩa ũvoo mũna (links) nĩ kana ũvoo mwingangĩ ũvingũke.

3 Tata ũtũmĩe jw.org simũnĩ yaku ethĩwa nĩtonya kũvingũa Indaneti. Mũvangĩle wa maũvoo nũũvĩndũka nĩ kana meanĩe kĩoonĩ kya simũ yaku, ĩndĩ maũvoo nomo amwe.