Tanĩa Kwĩyũmbanyʼa Kwondũ wa Kũlilikana Kĩkwʼũ kya Yesũ
1. Ĩvinda ya kũlilikana kĩkwʼũ kya Yesũ ĩtũnengae mwanya mũseo wa kwĩka ata?
1 Tũkalilikana kĩkwʼũ kya Yesũ Wakelĩ, Matukũ 26, Mwei wa 3. Tũkeethĩwa na mwanya mũseo mũno wa kũlilikana kwa ũtanu kĩla Ngai weekie nĩ kana atwovosye. (Isa. 61:10) Ĩndĩ o na mũthenya ũsu ũtavikĩte, kwĩthĩwa twĩ na ũtanu kũkatũtetheesya kwĩyũmbanyʼa nesa. Tũtonya kũtanĩa kwĩyũmbanyʼa ata?
2. Nĩ kyaũ kĩtũsukumaa kwĩyũmbanĩsya kũlilikana kĩkwʼũ kya Yesũ?
2 Kwĩyũmbanĩsya: Kũlilikana Kyaũya kya Wĩoo kya Mwĩaĩi nĩ ũndũ wa vata ĩndĩ ũtendaa maũndũ maingĩ. O na ũu, maũndũ maĩle kũvangwa nesa nĩ kana maũndũ onthe ala ma vata meanĩwʼe. (Nth. 21:5) Saa na vandũ va kũmbanĩwa syaĩle kũvangwa. Mũkate na mbinyu syĩthĩwe vo. Vandũ va kũmbanĩwa vaĩle kũthewʼa na kũvangwa nesa. Ũla ũnĩkumya ũvoo aĩle kwĩyũmbanyʼa nesa, na ala mekũnengane mũkate na mbinyu vamwe na athokanyʼa maĩle kũelewʼa tene ũndũ makeka. Maingĩ ma maũndũ asu nĩmaminĩte kwĩkwa. Nũndũ wa kwenda kũtũnga mũvea witũ kwondũ wa nthembo ya wovosyo, nĩtwĩyũmbanĩasya nesa kwondũ wa kũlilikana kĩkwʼũ kya Yesũ.—1 Vet. 1:8, 9.
3. Tũtonya kũmbanyʼa ngoo sitũ ata kwondũ wa Kyaũya kya Wĩoo kya Mwĩaĩi?
3 Kwĩyũmbanyʼa Ngoonĩ: Nĩ kana tũelewe nesa vata wa kũlilikana kĩkwʼũ kya Yesũ, nĩtwaĩle kũmbanyʼa ngoo sitũ. (Esa. 7:10) Nĩ kana twĩke ũu, nĩtwaĩle kũtũmĩa ĩvinda kũsũanĩĩa ilungu sya Mbivilia ila syaĩle kũsomwa ĩvindanĩ yĩĩ. Na ĩngĩ, nĩtwaĩle kũsũanĩĩa maũndũ ala mamũkwatie Yesũ mũthyanĩ wa mĩthenya yake kũũ nthĩ. Kũvindĩĩsya ũndũ Yesũ weeyumisye kũvikĩĩa kũkwʼa kũkatũsukuma tũatĩĩe ngelekanyʼo yake.—Aka. 2:20.
4. Nĩ ũathimo wĩva umanaa na wovosyo ũkũtanĩthasya mũno?
4 Kĩkwʼũ kya Yesũ nĩkĩĩkĩĩthasya kana Yeova nĩwe waĩle kũsumbĩka. Nĩkĩetae ũthasyo kuma naĩnĩ na kĩkwʼũnĩ. (1 Yoa. 2:2) kĩtumaa twĩthĩwa na ngwatanĩo nzeo vamwe na Ngai na kĩitũvingũĩa nzĩa ya kũkwata thayũ wa tene na tene. (Ako. 1:21, 22) Ĩngĩ, nĩkĩtũtetheeasya kũlũlũmĩĩlya ũtwi wa kwĩkala kwosana na kwĩyumya kwitũ, na wa kwĩkala twĩ aatĩĩi alũmu ma Yesũ. (Mt. 16:24) Eka ũtanu waku ũendeee kwongeleka ĩvindanĩ yĩĩ ya kwĩyũmbanĩsya, na ya kũmbana ũmbano wa kũlilikana kĩkwʼũ kya Yesũ.