Nũendeee Kwĩyũmbanyʼa Kwondũ wa Kũlilikana Kĩkwʼũ kya Yesũ?
Kwĩ Nisani 13, mwaka wa 33, Yesũ nĩweesĩ kana atialĩtye o ũtukũ ũmwe vamwe na anyanyae make atanamba kũawa. Aĩ atanĩe Vasaka yake ya mũthya vamwe namo na ayambĩĩsya mboka yĩtawa Kyaũya kya Wĩoo kya Mwĩaĩi. Mboka ta ĩsu nĩyaaĩle kwĩyũmbanĩwʼa nesa. Kwoou, nĩwatũmie Vetelo na Yoana nĩ kana makaseũvye mboka ya vasaka. (Luka 22:7-13) Kuma ĩvindanĩ yĩu, Aklĩsto ala methĩawa na mea ma kũlilikana kĩkwʼũ kya Yesũ nĩmonaa wĩ ũndũ wa vata kwĩyũmbanyʼa nesa. (Luka 22:19) Nĩ maũndũ meva ma vata twaĩle kwĩka nĩ kana twĩyũmbanĩsye kũlilikana kĩkwʼũ kya Yesũ Matukũ 3, Mwei wa 4?
Ũndũ Atavanyʼa Maĩle Kwĩyũmbanyʼa:
Ĩka mĩvango mĩseo nĩ kana ũthokye andũ na kĩthito kwondũ wa kũlilikana kĩkwʼũ kya Yesũ.
Andĩka andũ ala wĩmanyĩasya Mbivilia namo, andũ ma mũsyĩ, ala ũsomaa namo, ala ũthũkũmaa namo, na andũ angĩ ala wĩsene namo nĩ kana wĩmathokya.
Soma na ũisũanĩa kwa ũliku ilungu sya Mbivilia sya ĩvinda ya kũlilikana kĩkwʼũ kya Yesũ.
Ũka kũlilikana kĩkwʼũ kya Yesũ wĩyũmbanĩtye kũthokya aeni.