Ĩsandũkũ Ya Ĩkũlyo

◼ Nĩ myolooto yĩva ya Mbivilia tũtonya kũatĩĩa ĩũlũ wa kũtũmĩa simũ ĩla twĩ maũmbanonĩ kana ũtavanyʼanĩ?

“Kwondũ wa Kĩla Kĩndũ Ve Ĩvinda.” (Mũta. 3:1): Simũ sya moko nitũtetheeasya kũneena kana kũandĩkĩa angĩ ũtũmane ĩvinda yonthe. O na ũu wĩ o vo, ve mavinda Aklĩsto matendaa kũthĩnwʼa nĩ simũ syoo. Kwa ngelekanyʼo, ĩla twathi maũmbanonĩ twĩthĩawa tũimũthaitha Yeova, tũimanyĩwʼa, na tũyĩkĩana vinya. (Kũt. 31:12; Sav. 22:22; Alo. 1:11, 12) Nĩvatonyeka tũkavosya simũ sitũ twavika maũmbanonĩ? Ethĩwa ve ũndũ wa vata ũtonya kũtuma tũeka simũ sitũ ite mbosye, twaĩlĩte kumya wasya iikathĩnyʼe ala angĩ.

‘Ĩka Maũndũ Onthe Kwondũ wa Ũvoo Mũseo.’ (1 Ako. 9:23): Ve mavinda tũtonya kũtũmĩa simũ ĩla twĩ ũtavanyʼanĩ. Kwa ngelekanyʼo, mwana-a-asa ũla ũtongoesye kĩkundi kya ũtavanyʼa no atũmĩe simũ amanye vala atavanyʼa mavikĩte nthĩnĩ wa kĩsio. Atavanyʼa no makũnĩe simũ andũ ala manendeeiwʼe kana amanyĩwʼa ma Mbivilia mbee wa kũmasyokea ethĩwa mekalaa vaasa. Ĩndĩ ethĩwa twĩ na simũ, twaĩle kwĩka ũndũ vatonyeka iikatũthĩnyʼe yĩla tũũneena na ene nyũmba. (2 Ako. 6:3) Vandũ va kwananga ĩvinda tũitũmĩa simũ ĩla tweteele atavanyʼa aangĩ, ethĩwa nĩvatonyeka tũtavye andũ ala mavĩtĩte, na tũikatiane na ala tũũtavanyʼa namo.

Sũanĩĩa Ala Angĩ. (1 Ako. 10:24; Avi. 2:4): Tũyaĩlĩte kwĩthĩwa na kĩmanyĩo kya kũseleawa kũvika ũmbanonĩ wa ũtavanyʼa twĩsilĩtye kũkũnĩa atavanyʼa simũ tũmanye vala maĩ. Ĩla twavika twĩ aselee, kĩkundi kya ũtavanyʼa kyambĩĩaa kũvangwa ĩngĩ. O na ũu wĩ o vo, ve maũndũ matonya kumĩla ũkethĩa no nginya tũselewe. Ĩndĩ ĩla tweethĩwa na kĩmanyĩo kya kũvikaa tene twonanasya nĩtũnengete ndaĩa mĩvango ya Yeova, mwana-a-asa ũla ũtongoesye kĩkundi, na atavanyʼa ala angĩ.