“Ndyĩsaa Kũmwĩthĩa Mũsyĩ!”

Waaneena ũu ĩũlũ wa mũndũ wamũtavisye ũvoo na endeewʼa? Nũtonya kwĩthĩwa ũtatĩte mavinda maingĩ kũsyokea mũndũ ũsu ĩndĩ ũilea kũmwĩthĩa nĩ kana ũngʼithye mbeũ sya Ũsumbĩ ila wavandie. (1 Ako. 3:6) Mavinda amwe, atavanyʼa ala me na ũmanyi mwingĩ wa kũtavanyʼa nĩmaandĩkĩaa mũndũ ta ũsu valũa kana makaandĩka ũtũmani mũkuvĩ na maiũtia mũomonĩ kwake. Atavanyʼa amwe nĩmamanyaa kana no wĩthĩwe ũndũ wĩ vinya kwĩthĩa mũndũ ũsu mũsyĩ ĩngĩ. Nũndũ wa ũu, nĩmamwĩtasya namba yake ya simũ kwa kũmũkũlya ĩkũlyo ta, “No ũnenge namba yaku ya simũ?” No tũtale ĩsyokeo ĩla twasyokea mũndũ ũsu kana ĩla twamumĩsya ũkũsĩ kwĩsĩla valũa, ĩla twamũtũmĩa ũtũmani indanetinĩ kana simũnĩ, ĩla twamũtiĩa ũtũmani mũandĩke mũomonĩ kwake, kana ĩla twamũkũnĩa simũ. O na ethĩwa ti laisi kũmwĩthĩa mũsyĩ, nĩ ũndũ ũtonyeka tũkamũtetheesya aendeee kwendeewʼa nĩ ũvoo mũseo.