Nũũ Ũtonya Kwendeewʼa Nĩ Ũvoo Ũũ?
1. Ĩla tũũsoma makaseti maitũ, twaĩle kũsũanĩa kyaũ, na nĩkĩ?
1 Ĩkaseti ya Mũsyaĩĩsya na ya Amkeni! maandĩkawa kwondũ wa andũ onthe ĩũlũ wa nthĩ. Kwoou, makaseti aa maneeneaa maũndũ me kĩvathũkanyʼo. Ĩla tũũsoma makaseti maitũ, twaĩle kũsũanĩa nũũ ũtonya kwendeewʼa nĩ ũvoo mũna, na tũyĩka mĩvango tũmũtwaĩe.
2. Nĩ maũndũ maũ maneeneawa makasetinĩ maitũ matonya kwendeesya andũ me kĩvathũkanyʼo?
2 Ĩkaseti ya mwei ũũ ya Mũsyaĩĩsya nĩyĩthĩwa yĩ na ũvoo mũna ũnaneeneaa vamwe na mũndũ mũthũkũmaa ĩmwe? Nĩyĩthĩwa na ũvoo ũũneenea mwĩkalĩle wa mũsyĩ, ũla ũtonya kũtethya mũndũ mũtaenyʼe? Ve mũndũ wĩsĩ wĩthĩwa aithi nthĩ ĩneenewe ĩkasetinĩ ya Amkeni!? Yĩmwe ya makaseti nĩyĩthĩwa yĩineenea maũndũ matonya kwendeesya andũ ma viasala imwe, kana movisi ma kanzũ ala me kĩsionĩ kyenyu? Kwa ngelekanyʼo, ĩkaseti yĩũneenea mathĩna ala makwataa andũ akũũ no yendeesye andũ ala mathũkũmaa kũla kũsũvĩĩawa andũ akũũ. Mĩvĩa ĩla yĩĩkĩĩthasya maũndũ ma mĩao nĩtonya kwendeewʼa nĩ ĩkaseti yĩũneenea ũngʼendilĩ.
3. Weta ngelekanyʼo ĩkwonanyʼa nĩkĩ nĩ ũseo kũnengane makaseti me na ũvoo mũna kwa andũ ala ũmakonetye.
3 Ũseo wa Kwĩka Ũu: Ĩtina wa kũkwata ĩkaseti ya Amkeni! ya Mwei wa 10, 2011, yĩla yaneeneaa “Kuwalea Watoto Wenye Kutegemeka,” mwana-a-asa ũmwe wa Avĩlĩka ya Ĩtheo e na mũka nĩmakũnĩie sukulu 25 simũ kĩsionĩ kyoo. Katĩ wa sukulu isu, sukulu 22 nĩsyeetĩkĩlile ĩkaseti yĩu na syanenga syana. Mwana-a-asa ũngĩ na kĩveti kyake ma nthĩ o ĩsu meekie oou. Alimũ ma sukulu ĩmwe nĩmavangie kũtũmĩaa ĩkaseti yĩu kũmanyĩsya syana. Ĩla mũsyaĩĩsya wa mũthyũlũlũko waeleiwʼe maũndũ asu, nĩwasyĩkĩie vinya ikundi sya mũthyũlũlũko wake itavanyʼe masukulunĩ. Ikundi mbingĩ nĩsyakũlilye ovisi wa ũvonge syongelwe ĩkaseti yĩu, na ũu watuma ĩtumbĩthwʼa ĩngĩ!
4. Nĩkĩ twaĩlĩte kũnengane makaseti maingĩ ũndũ vatonyeka?
4 Makaseti maitũ nĩmaeleasya kĩtumi kya maũndũ ala mekwĩkĩka ũmũnthĩ, woni wa Mbivilia ĩũlũ wamo, na ĩtambya yĩla Ũsumbĩ wa Ngai ũkosa. Nĩmo makaseti moka ĩũlũ wa nthĩ ‘matavanasya ũtangĩĩo.’ (Isa. 52:7) Kwoou, twĩenda kũnengane makaseti maingĩ ũndũ vatonyeka. Nzĩa nzeo ya kwĩka ũu nĩ kwĩkũlya, ‘Nũũ ũtonya kwendeewʼa nĩ ũvoo ũũ?’