Tũmĩa Kĩsese Kitũ Kũmanyĩsya Syana Syaku
1. Kĩeleelo kya kĩlungu kĩla kĩ na kyongo “Watoto,” nthĩnĩ wa Kĩsese kitũ nĩ kyaũ?
1 Kĩsese kitũ kya jw.org kĩseũvĩtwʼe kwondũ wa andũ onthe. Kĩlungu kĩla kĩ na kyongo “Watoto” (thi kwa Mafundisho ya Biblia > Watoto) nthĩnĩ wa kĩsese kĩĩ nĩ kya kũtetheesya syana syĩthĩwe na ngwatanĩo nzeo vamwe na asyai na vamwe na Yeova. (Kũt. 6:6, 7) Ũtonya kũtũmĩa kĩlungu kĩĩ ata kũtetheesya syana syaku?
2. Ũtonya kũmanya ata ũvoo ũla waĩle kwĩmanyĩsya na syana syaku?
2 Elewa Syana Syaku: Kĩla kana kethĩawa na mavata me kĩvathũkanyʼo. (1 Ako. 13:11) Kwoou, ũtonya kũmanya ata ũvoo ũla waĩle syana syaku? Ĩkũlye: ‘Nĩ kyaũ kĩtonya kwendeesya syana syakwa? Itonya kũelewa nĩ ũvoo wĩana ata? Itonya kwĩmanyĩsya vandũ va ĩvinda yĩana ata?’ Ethĩwa syana syaku syĩ na myaka ĩtatũ kana nthĩ wa ĩsu, no mũneenee kĩlungu kĩla kĩ na kyongo “Masomo Yangu ya Biblia.” Mĩsyĩ ĩmwe nĩtanĩaa kwĩmanyĩsya ngewa sya Mbivilia ungu wa kĩlungu “Wafundishe Watoto Wako.” Ĩngĩ, no ũsũanĩe kũtũmĩa nzĩa ii iatĩĩe.
3. Asyai matonya kũtũmĩa nesa ata ilungu sya kwĩmanyĩsya ila syĩ ungu wa “Miradi ya Ibada ya Familia”?
3 Miradi ya Ibada ya Familia: Kĩlungu kĩĩ nĩ kya kũtetheesya asyai kũmanyĩsya syana syoo. Wavingũa kĩlungu kĩĩ, vinyĩĩa vala vaandĩkĩtwe pakua na ũisoma “Mwongozo kwa Wazazi,” nĩ kana ũmanye ũndũ ũtonya kũkĩtũmĩa nesa. Tũmĩa ilungu sya mavisa, ta kĩla kya kũvaka mavisa langi, kũmanyĩsya syana ila nini. Tetheesya syana ila nenange itũmĩe ilungu syonthe kwĩmanyĩsya. Nũndũ kĩla kĩlungu kya kwĩmanyĩsya kĩ na maũndũ me kĩvathũkanyʼo makonetye ngewa ĩmwe ya Mbivilia, nĩ laisi syana syonthe kwĩmanyĩsya vamwe nthĩnĩ wa ũthaithi wa mũsyĩ.
4. Nĩ maũndũ maũ me ungu wa kĩlungu “Uwe Rafiki ya Yehova”?
4 Uwe Rafiki ya Yehova: Vitio, mbathi, na maũndũ angĩ ma kwĩka ala me ungu wa kĩlungu kĩĩ nĩ ma kũtetheesya asyai mamanyĩsye syana syoo Ndeto ya Ngai. (Kũt. 31:12) Kĩla vitio yĩ na ĩsomo ya vata. Maũndũ ta mathaũ ma kũmantha syĩndũ nĩmathingĩlĩĩlaa masomo asu ilĩkonĩ sya syana. Nũndũ syana nĩsyendete kwina, mbathi sya Ũsumbĩ nĩsyĩkĩawa Kĩsesenĩ kĩĩ kwondũ wasyo. Kwina nĩkũitetheeasya kũlilikana maũndũ ala syeemanyĩsya.
5. Nĩkĩ asyai maĩle kũmũvoya Yeova amatetheesye kũmanyĩsya syana syoo ũla wʼo?
5 Yeova eenda inywʼĩ asyai mũee syana syenyu kwa nzĩa ĩla yaĩle. Kwoou voyai Yeova amũtetheesye kũmanyĩsya syana syenyu ũla wʼo. (Asi. 13:8) Yeova nũtonya kũmũtetheesya mũee syana syenyu nesa, syĩthĩwe syĩ ‘mbũĩ kũvika ũtangĩĩo ũla wĩ kwondũ wa mũĩkĩĩo syĩ nthĩnĩ wa Klĩsto Yesũ.’—2 Tim. 3:15; Nth. 4:1-4.