Tũmĩa Kĩsese kya jw.org Ũtavanyʼanĩ​—“Uwe Rafiki ya Yehova”

Kĩlungu “Mafundisho ya Biblia” kĩla kĩ Kĩsesenĩ kitũ kya jw.org, ungu wa kyongo “Uwe Rafiki ya Yehova” ve vitio, mbathi, na maũndũ angĩ ma kwĩka maseũvĩwʼe syana. We nũtũmĩaa maũndũ asu me kĩlungunĩ kĩĩ ũitavanyʼa? Ethĩwa nĩwĩmanyĩasya Mbivilia na mũsyai wĩ na syana nini, nũseo ũkamwonyʼa maũndũ asu. Kwĩka ũu no kũtume enda kũsisya maũndũ angĩ Kĩsesenĩ kitũ.

Ĩvindanĩ ya kambeini ya kũnengane tulakiti Ũvoo wa Ũsumbĩ Na. 38, mwana-a-asa ũmwe nĩwanengie kĩveti tulakiti ĩsu na kyambĩĩa kũmĩsoma o saa isu. Kĩveti kyu kyaĩ na syana nini ila syendeeiwʼe mũno nĩ tulakiti ĩsu. Mwana-a-asa ũsu nĩwamĩneeneie kwa ũkuvĩ na amonyʼa Kĩsese kitũ kĩla kyonanĩtwʼe ĩthangũnĩ ya ĩtina ya tulakiti ĩsu. Nũndũ kĩveti kyu nĩkyendeeiwʼe mũno, mwana-a-asa ũsu nĩwatwie kũmonyʼa ĩmwe ya vitio sya syana aitũmĩa simũ yake.

Mwĩĩtu-a-asa ũmwe nĩwamũtavisye mũndũ mũka mathũkũmaa ĩmwe waĩ na syana ĩũlũ wa Kĩsese kitũ, na amũelesya kana nĩkĩthĩawa na ũvoo ũtonya kũtethya mĩsyĩ. Mũndũ mũka ũsu nĩwasyaisye jw.org vamwe na syana syake. Ĩtina, mũndũ mũka ũsu nĩweeie mwĩĩtu-a-asa witũ kana syana syake isembangaa nyũmba sinĩte “Tuhubiri,” ũmwe wa mbathi ila syĩ kĩlungunĩ “Uwe Rafiki ya Yehova.”

Nĩ ũseo o naku ũkamanya maũndũ ala me kĩlungunĩ kĩĩ kya jw.org na ũyumya imwe sya vitio, mbathi, kana maũndũ ma kwĩka ala me vo wĩkĩe simũnĩ yaku. Weeka ũu, ũkeethĩwa ũtonya kũtũmĩa kĩlungu kĩĩ kya jw.org ũtavanyʼanĩ. Ũsu nĩ mũio mũseo ta kĩ wa kũtũtetheesya kũendeea kũmũthũkũma Mwĩaĩi!—Meko 20:19.