Atĩĩa Ngelekanyʼo ya Athani—Osea
1. Nĩ ĩkũlyo yĩva ũtonya kwĩthĩwa wĩkũlasya?
1 ‘Nĩ maũndũ maũ ndonya kwĩyĩima nĩ kana nĩmũthũkũme Yeova?’ Nũtonya kwĩthĩwa wĩkũlasya ĩkũlyo yĩu ĩla wasũanĩa moseo ma Yeova na tei wake. (Sav. 103:2-4; 116:12) Osea nĩweeyumĩtye kwĩka ũndũ Yeova wamwĩaĩe, o na kau aĩ no nginya eyĩime maũndũ mana. Tũtonya ata kũatĩĩa ngelekanyʼo ya Osea?
2. Tũtonya kũatĩĩa ata ngelekanyʼo ĩla Osea watwiĩie ya kũmĩĩsya ĩla tũũtavanyʼa?
2 Tavanyʼa o na Yĩla Kũte Kũseo: Osea eelekelye ũvoo ũla watavanasya mũno mũno kwa ũsumbĩ wa mbaĩ ĩkũmi wa Isilaeli, ũla wausũĩtwe nĩ maũndũ mathũku. Mũsumbĩ Yelovoamu wa Kelĩ nĩweekie ũla Yeova woonaa wĩ ũthũku, na aendeesya ũthaithi wa mĩvwʼanano ũla wambĩĩiwʼe nĩ Yelovoamu wa Mbee. (2 Asu. 14:23, 24) Asumbĩ ala maatĩĩe maendeeie kwĩka maũndũ mathũku nginya ĩla ũsumbĩ ũsu wesie kwanangwa mwaka wa 740 mbee wa kũsyawa kwa Yesũ. O na kũtwʼĩka ũthaithi wa ũvũngũ nĩwaendeee mũno, Osea nĩwaendeeie kwathana e mũĩkĩĩku kwa ĩvinda ya myaka 59. We nũtwʼĩte kũendeea kũtavanyʼa o na ĩla andũ matekwendeewʼa kana ĩla wavĩngwa o ta Osea?—2 Tim. 4:2.
3. Osea oonanisye ata kana Yeova e tei?
3 Eka Andũ Mamanye Kana Yeova Nĩ Ngai wĩ Tei: Yeova eeie Osea atwae “kĩveti ĩlwaya.” (Osea 1:2) Kĩveti kĩu kyeetawa Ngomeli. O na kau nĩkyamũsyaĩe mwana, ĩtina nĩkyesie kũsyaa syana ingĩ ilĩ itaĩ syake. Kwa kwĩthĩwa eyũmbanĩtye kũekea kĩveti kyake kĩlaalai, Osea nĩwoonanisye ũndũ Yeova waĩ na tei mwingĩ kwelekela Aisilaeli ala meelilile. (Osea 3:1; Alo. 9:22-26) Nĩtwĩyũmbanĩtye kwĩyĩima maũndũ mana nĩ kana tũtetheesye andũ onthe mamanye kana Yeova e tei?—1 Ako. 9:19-23.
4. Tũtonya kwĩyĩima maũndũ maũ nĩ kana tũmũthũkũme Yeova?
4 Athũkũmi amwe ma Yeova nĩmatiĩte mawĩa maseo nĩ kana matũmĩe ĩvinda yingĩ kũmũthũkũma. Angĩ nĩmatwʼĩte kwĩkala mate atwae kana matatwaanĩte, na angĩ makekala mate na syana nĩ kana mamũthũkũme Yeova. Twasũanĩa kwa ũliku ũndũ Osea weekie, no twone ta tũtesa kwĩka take. Ĩndĩ, twaendeea kwona vata wa tei mwingĩ wa Yeova na tweekwatya veva wake mũtheu ũtwĩkĩe vinya, Yeova nũtonya kũtũtũmĩa o ta Osea.—Mt. 19:26; Avi. 2:13.