Nĩtũtonya Kwambĩĩa Kwĩmanyĩsya Mbivilia na Andũ Ala Tũmatwaĩaa Makaseti Kĩla Mwei
1. Nĩkĩ ũseũvyo wa Yeova wĩthĩĩtwe ũyĩkĩa atavanyʼa vinya mamanthe andũ ma kũmatwaĩaa makaseti kĩla mwei?
1 Andũ aingĩ mayendeeawʼa nĩ kwĩmanyĩsya Mbivilia naitũ, ĩndĩ nĩmendete kũsoma makaseti maitũ. Nũndũ wa ũu, ũseũvyo wa Yeova wĩthĩĩtwe ũyĩkĩa atavanyʼa vinya mamanthe andũ ma kũmatwaĩaa makaseti kĩla mwei. Andũ masoma makaseti maitũ kĩla mwei, ĩtina wa ĩvinda nĩmatonya kwĩthĩwa na wendi wa kwĩmanyĩsya Ndeto ya Ngai. (1 Vet. 2:2) Nĩvatonyeka ĩtina wa kũsoma ũndũ mũna, makendeewʼa na mayĩtĩkĩla tũmamanyĩsye Mbivilia.
2. Tũtonya kũtetheesya ata ala tũmatwaĩaa makaseti kĩla mwei mendeewʼe nĩ kwĩmanyĩsya Mbivilia?
2 ‘Nyithya’ Mbeũ sya Ũla Wʼo: Vandũ va o kũtia makaseti, ea ngewa vamwe na mwene nyũmba, na ũitata wĩthĩwe na ũnyanya nake. Kwĩthĩwa na ũnyanya nake kũkaũtetheesya ũmanye maũndũ ala mamũthĩnasya, na maũndũ ala ũĩkĩĩaa. Ũu ũkatuma ũmanya nzĩa ya kũmũtetheesya. (Nth. 16:23) Ĩyũmbanyʼe kĩla ĩvinda ũimũsyokea. Ethĩwa nĩvatonyeka, ngʼithya mbeũ sya ũla wʼo kwa kũweta kwa ũkuvĩ ũndũ mũna kuma ĩkasetinĩ, na ũisoma ĩandĩko yĩla yĩũkwete mbau. (1 Ako. 3:6) Andĩka matukũ ala wamũsyokea, ĩkaseti kana ĩvuku yĩla wamũtiĩa, kĩla mwaneenea, na ĩandĩko yĩla mwasoma.
3. Twaĩle kũsyokea mũndũ tũmũtwaĩaa makaseti kĩla mwei ĩtina wa ĩvinda yĩana ata?
3 Twaĩle Kũsyokea Mũndũ Ĩtina wa Ĩvinda Yĩana Ata? Waĩlĩte kũsyokaa savalĩ ũmwe kĩla mwei ũmatwaĩe makaseti ma mĩtũkĩ. Ĩndĩ, kwosana na mĩvango yaku na ethĩwa mwene nyũmba nũkwendeewʼa mũnango, no ũmũsyokee mbee wa savalĩ ũmwe kwa Mwei. Kwa ngelekanyʼo, no ũmũsyokee ĩtina wa kyumwa kĩmwe kana ilĩ, na ũimwĩa, “Navĩtĩla ngwonyʼe ũndũ mũna nthĩnĩ wa makaseti ala nĩnakũtiĩe.” Kwĩka ũu kũkatuma mwene nyũmba ũsu enda kũsoma ũvoo mũna kuma ĩkasetinĩ yĩu. Ethĩwa mwene nyũmba nũsomete ũvoo ũsu wamwonyʼa, no ũmũkũlye ũndũ ũũeleiwe na ũiũneenea kwa ũkuvĩ. Kana ethĩwa nĩwendete kũsoma mavuku maitũ, no ũmũsyokee na ũimũtwaĩa tulakiti, mbulosua, kana ĩvuku yĩla tũũnengane mweinĩ ũsu.
4. Twaĩle kwĩka ata mavinda kwa mavinda nĩ kana tũmanye ethĩwa ala tũmatwaĩaa makaseti kĩla mwei nĩmekwendeewʼa nĩ kwĩmanyĩsya?
4 Ndũketeele mwene nyũmba ese kũũkũlya mwĩmanyĩsye Mbivilia. Niwe waĩle kũmũkũlya. O na ethĩwa ndendeeawʼa nĩ kwĩmanyĩsya Mbivilia, mavinda kwa mavinda no ũmwonyʼe kĩlungu “Mosũngĩo ma Makũlyo ma Mbivilia,” nthĩnĩ wa ĩkaseti ya Mũsyaĩĩsya na ũimũkũlya kana no mũkĩneenee. Kwa nzĩa ĩsu nũtonya kwambĩĩa kwĩmanyĩsya Mbivilia nake kwa ndatĩka mbũthũ. Ĩndĩ, ethĩwa vaitonyeka mũkambĩĩa kwĩmanyĩsya Mbivilia, endeea kũmũtwaĩaa makaseti kĩla mwei. Nĩvatonyeka akesa kwendeewʼa.