Ũndũ Tũtonya Kwĩthĩwa Atavanyʼa Aseo—Kũandĩka Ũvoo Ĩũlũ wa Ala Mendeewʼa

“Ĩsũvĩe mwene, vamwe na momanyĩsyo maku.” (1 Tim. 4:16) Ndeto isu mbeveee sya mũtũmwa Vaulo kwĩ Timotheo syonanyʼa kana ithyonthe twaĩlĩte kũtata ũndũ tũtonya twĩthĩwe atavanyʼa aseango, twĩthĩwe twĩ atavanyʼa eũ kana tũtavanĩtye kwa ĩvinda ĩasa. Kĩlungu kyeũ kĩ na kyongo, “Ũndũ Tũtonya Kwĩthĩwa Atavanyʼa Aseo,” kĩkethĩawa nthĩnĩ wa Ũthũkũmi Witũ wa Ũsumbĩ na kĩkatũtetheeasya twĩthĩwe atavanyʼa aseango. Kĩla kĩlungu kĩkaneeneaa ũndũ ũmwe wa vata na kĩyonanyʼa ũndũ tũtonya kũũtũmĩa. Atavanyʼa onthe meĩkĩwa vinya kĩla mwei matũmĩae ũndũ ũla waneenewa. Mwei wathela, vakeethĩawa na kĩlungu nthĩnĩ wa Ũmbano wa Ũthũkũmi kĩla kĩkatũnengae mwanya wa kũelesya ũndũ tũnatethekie nũndũ wa kũtũmĩa ũndũ ũsu. Mweinĩ ũũ, twĩĩkĩwa vinya tũandĩke ũvoo ĩũlũ wa ala mendeewʼa.

Nĩkĩ Nĩ Ũndũ wa Vata?: Nĩ kana twĩanĩsye wĩa witũ, ve maũndũ angĩ twaĩle kwĩka eka o kũtavanyʼa. No nginya tũsyokee andũ ala mendeewʼa na tũimamanyĩsya nĩ kana tũngʼithye mbeũ sya ũwʼo ila tũnavandie ngoonĩ syoo. (Mt. 28:19, 20; 1 Ako. 3:6-9) Nĩ kana tũngʼithye mbeũ isu, no nginya tũsyokee mũndũ ũla tũnaneenie nake, tũneenee maũndũ ala meũmũthĩnyʼa, na tũineenea ũndũ ũla tũnavangie tũũneenee twamũsyokea. Kwoou, ĩla twakomana na mũndũ ũkwendeewʼa, nĩ ũndũ wa vata tũandĩke ũvoo ĩũlũ wake.

Tũtonya Kwĩka Ũu Ata?

• Kĩla ĩvinda waĩle kwĩthĩwa na vandũ va kũandĩka ũvoo ĩũlũ wa andũ ala mekwendeewʼa. Ĩla ũkũandĩka, vanga maũndũ nesa, ia nesa tũthangũ tũla waandĩka ũvoo ũsu, na ũyongeleela ũvoo kĩla ĩvinda wasyoka. Andĩka ĩũlũ wa mũndũ ũsu wamina kũneena nake oou.

• Andĩka ũvoo ĩũlũ wa mwene nyũmba. Andĩka ĩsyĩtwa yake, namba ya nyũmba yake, namba yake ya simũ, kana namba sya vosita. Nĩ kyaũ wonie ĩũlũ wake na mũsyĩ wake?

• Andĩka maũndũ ala mwaneenea. Mwasoma maandĩko meva? Aasya aĩkĩĩaa kyaũ? Wamũtiĩa ĩvuku yĩva? Andĩka saa, mũthenya, na matukũ ala wamũthokea.

• Andĩka maũndũ ala ũvangĩte kwĩka wasyoka. Wamwĩa mũkaneenea kyaũ? Mwavanga wĩsyoka ĩndĩĩ?

• Kĩla ĩvinda wasyoka, andĩka maũndũ ala mwaneenea. Vai ũthũku o na waandĩka maũndũ maingĩvĩte ata.

Tata Kwĩka Ũndũ Ũũ Mweinĩ Ũũ:

• Ĩla ũkũandĩka ũvoo ĩũlũ wa mũndũ wendeewʼa, elesya mũtavanyʼa ũla wĩ nake maũndũ ala ũkũandĩka.