Ũndũ Tũtonya Kwĩthĩwa Atavanyʼa Aseo—Kwonanyʼa Nũkwendeewʼa Nĩ Angĩ

Nĩkĩ Nĩ Ũndũ wa Vata?: Yesũ ndaelekanasya andũ, na nĩwendeeawʼa nĩ kĩla mũndũ e ũmwe ũmwe. Kwa ngelekanyʼo, ve ĩvinda Yesũ waeteiwe mũndũ waĩ kĩlalinda na nokwĩthĩwa oonie kana mũndũ ũsu ndaĩ mwĩanĩe. Nũndũ wa ũu, nĩwamwosie amũtwaa vandũ vate andũ na amũvosya. (Mko. 7:31-35) Oonanisye nĩwathĩnĩkĩaa amanyĩwʼa make nũndũ nĩwaeleawa maũndũ ala matatonya na ndamatavasya ũvoo mwingĩ savalĩ ũmwe. (Yoa. 16:12) O na kũtwʼĩka e na kĩanda kĩnene ĩtunĩ, Yesũ nĩwendeeawʼa nĩ kĩla mũndũ e ũmwe ũmwe. (2 Tim. 4:17) Na nũndũ twĩ aatĩĩi ma Yesũ, o naitũ twaĩle kwĩka take. (1 Vet. 2:21; 1 Yoa. 3:16, 18) O na ĩngĩ, tũkeethĩwa tũtonya kũtetheesya mwene nyũmba nesa twamũthĩnĩkĩa ĩla twĩ ũtavanyʼanĩ na twatata kũmanya maũndũ ala wendete, na ala meũmũthĩnyʼa. Nũtonya kũtwĩthukĩĩsya amanya kana nĩtũkwendeewʼa nĩwe mwene na kana kĩtumi kitũ kya kũmũthokea ti kũthi o kũmũtavya ũvoo kana kũmũtiĩa ĩvuku.

Ũtonya Kwĩka Ũu Ata?:

Ĩyũmbanyʼe nesa. Ndũkethĩwe na wia, ĩthĩwa na ũthyũ mũtanu, na ũyĩthĩwa na ũnyanya.
Ĩthĩwa wĩ metho. Nũkwona maũndũ mekwonanyʼa kana e na syana? nũtanĩaa kũvanda na kũĩmĩa tũmĩlũnda twa malaa kana mboka, na nũtanĩaa kũĩthya nyamũ sya mũsyĩ ta ngitĩ na mbaka? kana nũkwona maũndũ mekwonanyʼa nĩ mũndũ wa ndĩni? No ũvĩndũe ndeto syaku sya kwambĩĩsya ũneenanyʼa syosane na maũndũ asu.
Mũkũlye woni wake, na ũimwĩthukĩĩsya nesa ũteũmũtilĩĩla. Mũsisye ĩla ũkũneena nĩ kana amanye nũmwĩthukĩĩsye. Mũtũngĩe mũvea nũndũ wa kwĩyĩelesya na ũimũkatha kuma ngoonĩ. Ndũkamũkananĩsye.
Ĩthĩwa ũtonya kũvĩndũka. Ethĩwa ve vata, neenea maũndũ ala meũthĩnyʼa mwene nyũmba vandũ va kĩla wĩĩvangĩte kũneenea. Ti ũndũ wĩ vinya kũneenea ũndũ ũsu nũndũ makaseti, tulakiti, na mbulosua sitũ ineeneaa maũndũ me kĩvathũkanyʼo. Ethĩwa wamũthokea masaa mataĩle, kwa ngelekanyʼo twasye weethĩa akwatene, mwĩe nũkũelewa na ũineena kwa ũkuvĩ.

Tata Kwĩka Ũndũ Ũũ Mweinĩ Ũu:

Ĩla mũkwĩka ũthaithi wa mũsyĩ, ĩthĩwai na mawonanyʼo ma ũndũ mũtonya kũvĩndũa ũneeni wosane na kĩla mwene nyũmba waweta, kana ĩla mũũtavanyʼa mumĩte nyũmba ĩmwe mũendete ĩla ĩngĩ wĩ na mũtavanyʼa ũla mwĩ ĩmwe, ũngamai vanini na ũmwe wenyu ayonanyʼa ũndũ mũtonya kũvĩndũa ũneeni wosane na kĩla mwene nyũmba waweta.
Mavindanĩ amwe mũyĩka ũmbano wa kũthi ũtavanyʼa, mwana-a-asa ũla ũtongoesye no aneenee maũndũ ala tũtonya kwĩka nĩ kana twonanyʼe nĩtũkwendeewʼa nĩ mũndũ, kana vethĩwe na wonanyʼo ũkwonanyʼa maũndũ asu.