Ũndũ Tũtonya Kwĩthĩwa Atavanyʼa Aseo—Kũsũngĩa Ala Matekwenda Kũtwĩthukĩĩsya

Nĩkĩ Nĩ Ũndũ wa Vata?: Kwasũanĩa wĩsĩ ve mũisyo ũkumĩla ũla ũtonya kũwaa andũ malea kũkĩa. Na nũndũ wa ũu ũithi kwa mũtũi ũmũtavye ĩũlũ wa mũisyo ũsu, ĩndĩ vandũ va kũkwĩthukĩĩsya aikwĩa nũkwatene. O na akwĩa nũkwatene, ndwĩmwĩkĩsya ngoo. Aingĩ isionĩ sitũ nĩmaleaa kũtwĩthukĩĩsya, mateũmanya kana ũvoo ũla twĩ nawʼo nũtonya kũmatangĩĩa. Nĩvatonyeka ũkethĩa makwatene ĩvinda yĩu twamathokea. (Mt. 24:37-39) Kana ũkethĩa mewʼĩte maũndũ mate ma wʼo ĩũlũ witũ. (Mt. 11:18, 19) No mone ko tũte kĩvathũkanyʼo na ndĩni ila syĩthĩĩtwe na meko mathũku. (2 Vet. 2:1, 2) Ethĩwa mwene nyũmba ndanendeewʼa twamũthokea ya mbee, tũyaĩle kũmwĩkĩsya ngoo.

Ũndũ Tũtonya Kwĩka:

Ũtanathi ũtavanyʼa wa nyũmba na nyũmba, sũanĩa maũndũ matonya kũwetwa nĩ andũ ala matekwenda kũkwĩthukĩĩsya na ũisũanĩa ũndũ ũtonya kũmasũngĩa.
Ethĩwa mwene nyũmba ndekwenda kũkwĩthukĩĩsya, tata ũendee kũneena nake wĩ mũuu. Nũtonya kwĩka ũu kwa kũmũkatha. Kwa ngelekanyʼo, akwĩa e na ndĩni yake, no ũmwĩe, “Nĩtũtanaa mũno ĩla tweethĩa mũndũ wendeeawʼa nĩ Ngai taku.” Mavinda amwe, kwĩtĩkĩlana na maũndũ ala mwene nyũmba ũkũtũtavya nĩũtuma atwĩthukĩĩsya. Kwa ngelekanyʼo, akwĩa nũkwatene, no ũmwĩe: “Nĩnakũelewa. Ĩndĩ ndanathi no nende kũũtiĩa kavuku ke vaa ũsome.” Ũndũ ũngĩ ũtonya kwĩka nĩ kũkũlya mwene nyũmba ĩkũlyo. No ũmũkũlye, “Nĩ Mbivilia ĩtakwendeeasya kana nĩ maũndũ ma ndĩni?”
Ndũkamathingʼĩĩsye. Lilikana kana Yeova ndalasimĩthasya andũ mamwĩthukĩĩsye. (Kũt. 30:19) Kĩla mũndũ akakua mũio wake mwene mbee wa Yeova. (Aka. 6:5) Ethĩwa mwene nyũmba nĩwalea vyũ kwĩthukĩĩsya, nũseo kũthi. Kwĩka ũu nĩũtuma mwene nyũmba ũsu esa kwenda kwĩthukĩĩsya ĩvinda yũkĩte.—1 Vet. 3:15.

Tata Kwĩka Ũndũ Ũũ Mweinĩ Ũũ:

Ĩla mwakomana na mũndũ ũtekwenda kwĩthukĩĩsya, mwaumaalũka kũlanyʼa na ũla ũũtavanyʼa nake ũndũ wĩĩalĩte kũneena na mũndũ ũsu nesa.