Ĩvinda ya Kũlilikana Kĩkwʼũ kya Yesũ Ĩkatũnenge Mwanya wa Kũmũtaĩa Yeova

1. Tũkakwata mwanya mũseo wa kwĩka ata ĩvindanĩ ya kũlilikana kĩkwʼũ kya Yesũ?

¹ Ĩvinda ya kũlilikana kĩkwʼũ kya Yesũ Matukũ 14, Mwei wa 4, ĩkatũnenga mwanya mũseo wa kũmũtaĩa Yeova nũndũ wa ũseo wake. Ĩandĩko ya Luka 17:11-18 nĩyonanĩtye ũndũ Yeova na Yesũ monaa andũ ala matũngaa mũvea. Ũndũ wa kũmakya nĩ kana, mũndũ o ũmwe katĩ wa andũ ĩkũmi ala mavoiwʼe mangũ no we wasyokie kũtũnga mũvea. Ĩvinda yĩla yũkĩte, wovosyo ũkamina mowau onthe na andũ mayĩkala tene na tene! Vate nzika, tũkamũtũngĩaa Yeova mũvea kĩla mũthenya nũndũ wa moathimo asu. Ĩndĩ tũkatũnga mũvea ata ĩvindanĩ ya kũlilikana kĩkwʼũ kya Yesũ?

2. Nĩ kyaũ kĩtonya kwongela mea maitũ ma kũtũnga mũvea kwondũ wa wovosyo?

² Ĩthĩwa na Mea ma Kũtũnga Mũvea: Mea ma kũtũnga mũvea maumanaa na mosũanĩo maitũ. Kũsoma maandĩko ma ĩvindanĩ ya kũlilikana kĩkwʼũ kya Yesũ kũkatuma twĩthĩwa na mea ma kũtũnga mũvea kwondũ wa wovosyo. Tũtonya kũkwata maandĩko asu kũndũ kwĩ kĩvathũkanyʼo ta nthĩnĩ wa kalenda kana nthĩnĩ wa kavuku ka Kuyachunguza Maandiko Kila Siku. Tata ũsome maandĩko asu wĩ na mũsyĩ waku. Kwĩka ũu kũkongeleela mea maitũ ma kũtũnga mũvea kwondũ wa wovosyo, na ũu ũituma twaĩlya mwĩkalĩle witũ.—2 Ako. 5:14, 15; 1 Yoa. 4:11.

3. Nĩ kwa nzĩa syĩkũ tũtonya kwonanyʼa kũtũnga mũvea ĩvindanĩ ya kũlilikana kĩkwʼũ kya Yesũ?

³ Tũnga Mũvea: Kũtũnga mũvea kwonanawʼa na meko. (Ako. 3:15) Ũla mũndũ wavoiwʼe mangũ nĩweekĩie kĩthito amũmantha Yesũ nĩ kana amũtũngĩe mũvea. O na nĩwatanĩie kũtavya andũ angĩ ĩũlũ wa kũvowʼa kwake. (Luka 6:45) Tũkoonanyʼa mũvea kwondũ wa wovosyo kwĩsĩla kũthokya angĩ na kĩthito moke ũmbanonĩ wa kũlilikana kĩkwʼũ kya Yesũ? Kwosa ũvainia mũtetheesya kana kwongela ũthũkũmi witũ ĩvindanĩ yĩu nĩ nzĩa ĩngĩ ya kũtũnga mũvea. Wĩoo wa kũlilikana kĩkwʼũ kya Yesũ, tũkoonanyʼa mũvea kwa kũthokya andũ ala makoka ũmbanonĩ ũsu na kũmasũngĩa makũlyo moo.

4. Tũtonya kũtũmĩa ĩvinda ya kũlilikana kĩkwʼũ kya Yesũ nesa ata?

⁴ Ũmbano ũũ wa kũlilikana kĩkwʼũ kya Yesũ ũkeethĩwa witũ wa mũthya? (1 Ako. 11:26) Tũyĩsĩ. Ĩndĩ kĩla twĩsĩ nĩ kana ũmbano ũsu wavĩta, ũsu ũkeethĩwa wĩ mwanya mũseo wa kũtũnga mũvea wavĩta. Ũkatũmĩa ĩvinda yĩu nesa? Ekai ndeto sya kanywʼa witũ, na mosũanĩo ma ngoo sitũ matanĩthye Yeova, Mwovosya waitũ.—Sav. 19:14.