Ĩsandũkũ ya Ĩkũlyo

◼ Syana syaĩle kwĩmanyĩsya kyaũ nĩ kana iime kĩ-veva?

Asyai nĩmatataa ũndũ matonya kũea syana kwosana na “mosilĩlo na motao ma Mwĩaĩi.” (Aev. 6:4) Kwa ngelekanyʼo, asyai nĩmonete vata wa kũsoma ĩandĩko ya kĩla mũthenya vamwe na syana syoo kĩla kwakya. Ĩvindanĩ ya ũthaithi wa mũsyĩ kana mavindanĩ angĩ, mĩsyĩ nĩtonya kũnyuva kũsisya vitio na kũmĩneenea, kũneenea ũndũ mũna kuma ĩvukunĩ Vijana Huuliza, kũthaũka ũndũ mũna ũwetetwe Mbivilianĩ, kana kwĩmanyĩsya ũndũ matonya kũtavanyʼa. O na ũu wĩ o vo, nĩ kana syana ‘syĩthingʼĩĩsye kũendeea mbee kũvikĩa wĩanĩu [kana, ũima],’ no nginya imanyĩwʼe maũndũ maito ma Mbivilia.—Aevl. 6:1.

Ekai tũsũanĩe maũndũ ala tũmanyĩasya andũ kĩsionĩ kitũ. Ĩla twathokea mũndũ ya mbee kana ĩla twamũsyokea, nĩtũtataa twambĩĩe kwĩmanyĩsya Mbivilia nake tũitũmĩa ĩvuku Mbivilia Yo Ĩmanyĩasya Ata? Twamina ĩvuku yĩu nake, twambĩĩaa kwĩmanyĩsya ĩvuku “Ĩyĩkalyei Ene Wendonĩ wa Ngai.” Nĩkĩ twĩkaa ũu? Twĩkaa ũu nũndũ ĩvuku Mbivilia Ĩmanyĩasya yĩthĩawa na momanyĩsyo ma mũsingi ma Mbivilia. Ĩvuku ‘Wendo wa Ngai’ yĩmamanyĩasya ũndũ matonya kũtũmĩaa myolooto ya Mbivilia. Kwĩmanyĩsya mavuku asu elĩ kũtetheeasya ala eũ methĩwe na “mĩi mĩlũmu” nthĩnĩ wa Klĩsto na ‘mailũlũmĩlwʼa mũĩkĩĩonĩ.’ (Ako. 2:6, 7) Mavuku asu tyo matethye syana sitũ? Syana sitũ nĩsyaĩle kũmanyĩwʼa ĩũlũ wa wovosyo, Ũsumbĩ wa Ngai, na ũndũ kwĩkĩkaa ĩla mũndũ wakwʼa. Ĩngĩ, syana nĩsyaĩlĩte kũmanya nĩkĩ Ngai ũekete ũthũku ũendeee na kĩla kyonanasya twĩ mĩthenyanĩ ya mũminũkĩlyo. No nginya syĩkĩĩe vyũ kana Ngũsĩ sya Yeova nĩsyo syĩ na ũwʼo. O na ĩngĩ, syana nĩsyaĩlĩte kũelewa myolooto ya Mbivilia na ũndũ itonya kũmanyĩsya “ilĩko syoo.” (Aevl. 5:14) Asyai maĩlĩte kũmanyĩsya syana syoo kwosana na ũkũũ wasyo na ũtonyi wasyo wa kũkwatya maũndũ. Ĩndĩ o na vailyĩ ũu, syana mbingĩ nitonya kwambĩĩa kwĩmanyĩsya maũndũ maito ma Mbivilia syĩ o nini.—Luka 2:42, 46, 47.