Mwei wa 8 Ũkeethĩwa Mwei wa Mwanya wa Kũtavanyʼa!

1. Nĩ kambeini yĩva ya mwanya ĩkethĩwa nthĩ yonthe ĩvinda yĩĩ tũthengeee myaka 100 kuma Ũsumbĩ wa Ngai wasumbĩka?

¹ Myaka 100 kuma Ũsumbĩ wa Ngai wambĩĩa kũsumbĩka ĩkilye ĩnathela. Kwoou, yĩĩ nĩ ĩvinda ĩseo ta kĩ ya kũmũtaĩa Yeova kwĩsĩla kambeini ya mwanya! Mweinĩ wa 8 kũkeethĩwa na kambeini ya nthĩ yonthe ya kũnengane tulakiti nzaũ ĩla yĩ na kyongo, Nĩ Va Tũtonya Kũkwata Mosũngĩo ma Makũlyo Ala ma Vata Thayũnĩ? Tulakiti ĩno yĩĩkĩa andũ vinya mamanthe mosũngĩo ma makũlyo ala ma vata Mbivilianĩ na nĩyĩeleetye ũndũ Kĩsese kya jw.org kĩtonya kũmatetheesya.

2. Tũtonya kwĩka ata nĩ kana twongeleele ‘wasya mũnene wa kũtaĩa Yeova’ ũla ũkewʼĩka Mwei wa 8?

² Wasya Mũnene wa Kũtaĩa Yeova: Mĩvango nĩyĩkĩtwe nĩ kana wĩthĩe ala mekwenda kwongela ũthũkũmi woo no mose ũvainia mũtetheesya Mwei wa 8. Mweinĩ ũsu, atavanyʼa ala avatise makeethĩwa matonya kwosa ũvainia wa masaa 30. Nĩkwĩthĩwa Mwei wa 8 wĩ na Mawakatano, Mawathanthatũ, na Mawakyumwa atano, atavanyʼa aingĩ ala methĩawa wĩanĩ ũkeethĩa matonya kwosa ũvainia. Syana sya sukulu o nasyo ikeethĩwa itonya kwosa ũvainia nũndũ sukulu ikeethĩwa syĩ mbinge. Ethĩwa wĩ na mũmanyĩwʼa wa Mbivilia wĩkĩte maendeeo, kana wĩ na mwana ũkwenda kũtwʼĩka mũtavanyʼa, neena na mũvangĩthya wa nzama ya atumĩa. Ũkeethĩwa wĩ ũndũ wa kũtanĩthya mũno kwa asu kwĩthĩwa atavanyʼa na kũthũkũma vamwe naitũ mweinĩ ũsu wa mwanya! O na kau mavainia aingĩ ma kĩla ĩvinda nĩmathyũmũaa mweinĩ ũsu wa 8 mamina kwĩanĩsya masaa moo, no mavange maalyũle mĩvango yoo nĩ kana matanĩe kambeini ĩsu ya mwanya. Yĩĩ nĩyo ĩvinda ya mĩsyĩ kũneenea ũndũ makongeleela ‘wasya mũnene wa kũtaĩa Yeova’ ũla ũkewʼĩka Mwei wa 8.—Esa. 3:11; Nth. 15:22.

3. Twĩ na wĩkwatyo mwaũ kwelekela kambeini ĩno ya mwanya?

³ O na kau ĩvindanĩ ĩvĩtu nĩkwĩthĩĩtwe na kambeini ingĩ, twĩĩkwatya kana kambeini ĩno yĩĩthĩwa yĩ ya mwanya vyũ. No tũvikĩĩe ũtalo mweũ wa masaa, wa atavanyʼa, na wa mavainia atetheesya mweinĩ ũsu wa 8? Tũiminĩĩa mwaka wa ũthũkũmi wa 2014, twĩmũvoya Yeova aathime athũkũmi make nthĩ yonthe nĩ kana Mwei wa 8 wĩthĩwe mwei wa mwanya vyũ wĩanĩ wa kũtavanyʼa!—Mt. 24:14.